Ձեր վստահելի աղբյուրը

Հայաստանում մեկնարկել է «ԱրմԹեք Կոնգրես 2011»-ը: Բացման խոսքում ՀՀ վարչապետ Տիգրան Սարգսյանն ասաց, որ բարձր տեխնոլոգիաների երկօրյա համաժողովի նպատակն է աջակցել Հայաստանի բարձր տեխնոլոգիաների ոլորտի շարունակական զարգացմանը` միաժամանակ խթանելով միջազգային գործարար կապերի ամրապնդումը և ներդրումների հետագա աճը: Նա ասաց, որ վերջին տարիներին այս ոլորտում մեծ հաջողություններ է արձանագրվել, որին առավել նպաստել է ինտերնետ հասանելիության մատչելիությունը: Հայաստանում ինտերնետից օգտվում է 341 հազար մարդ: Բջջային հեռախոսի միջոցով ծառայություններից օգտվողների թիվը 3 միլիոնից ավել է: «Այսպիսի փոփոխությունները ինտերնետ հասանելիության տեսակետից նշանակում է, որ որակապես փոխվել է ՀՀ հասարկությունը` մի կողմից այն այսօր ավելի երիտասարդացել է ինտերնետային ծառայություններից օգտվողների տեսակետից, մյուս կողմից` ինտերնետը մուտք է գործել գրեթե բոլոր բնագավառներ»,- նշեց Տիգարն Սարգսյանը` ընդգծելով, որ ինտերնետ ծառայությունների, հեռահադորդակցության ոլորտի ձեռբերումները նպսստում են տնտեսության զարգացմանը: Վարչապետը ոլորտի զարգացման գործում կարևորեց նաև տաղանդաշատ մասնագետների առկայությունը, ինչը հնարավորություն է տվել համագործակցել աշխարհի առաջատար ընկերությունների հետ:

«Տեղեկատվական տեխնոլոգիաների և հաղորդակցության ոլորտը վերջին երեք տարիներին դինամիկ զարգացում է ունեցել, չնայած տնտեսական ճգնաժամին, որի բացասական ազդեցությունը զգացվել է նաև Հայաստանի տնտեսության վրա»,- ասաց Հայաստանի վարչապետը: Նա նշեց, որ դեռևս ունեն չբացահայտված պոտենցիալ, աճի տեմպերը լինելու է արագ:

Վարչապետը տեղեկացրեց, որ ոլորտում գործում է 300 ձեռնարկություն, 5500 մասնագետ, բայց նկատվում է մասնագետների աճ այս ոլորտի նկատմամբ: Ոլորտի արտադրանքը տարեկան կազմում է 200 միլիոն դոլար, որը կարելի է համադրել հանքահումքային արդյունաբերության հետ:

Վարչապետը հավաստիացրեց, որ կառավարության ու մասնավոր հատվածի միջև սերտ համագործակցությունը կշարունակվի նաև հետագայում: «Շարունակվելու են հանդիպումները, քանի որ դրանց ընթացքում հայտնաբերվում են այն խոչընդոտները, որ առկա են, ու որոնց վերացումն ավելի կնպաստի ոլորտի զարգացմանը: Այս հավատիացումները ոչ միայն հուսադրող են, այլ նաև իրատեսական` հաշվի առնելով վերջին երեք տարիների ընթացքում մեր համագործակցության արդյունքում հասած հաջողությունները»,- ասաց ՀՀ վարչապետ Տիգրան Սարգսյանը: Համաժողովը, ըստ նրա, հնարավորություն կտա նաև հայտնաբերել գործարար և ներդրումային նոր հնարավորություններ, ստեղծել նոր կապեր և ընդլայնված մասնագիտական ցանց: Համաժողովին հանդես կգան ներկայացուցիչներ Հայաստանի, ԱՄՆ-ի, Ռուսաստանի, Եվրոպայի, ԱՊՀ մի շարք երկրների խոշորագույն ընկերությունների ներկայացուցիչներ։

Բարձր տեխնոլոգիաների երկօրյա համաժողովն անցկացվում է ՀՀ անկախության 20-ամյակին նվիրված միջոցառումների շրջանակում և կրում է «Սովորել անցյալից, բացահայտել ապագան» խորագիրը։
Նշենք, որ համաժողովը կազմակերպվում է վարչապետի բարձր հովանու ներքո` ՀՀ կառավարության, Ձեռնարկությունների Ինկուբատոր Հիմնադրամի, «Սինոփսիս Արմենիա» ընկերության, «Վիասֆեր Տեխնոպարկի», Հայկական զարգացման գործակալության, ՏՏ ձեռնարկությունների միության և «Յունիքոմփ» ընկերության աջակցությամբ։ Գլխավոր հովանավորն է «ՎիվաՍել-ՄՏՍ» ընկերությունը։

Տեղեկացնենք նաև, որ «ԱրմԹեք Կոնգրեսը» առաջին անգամ անցկացվել է 2007թ.-ին ԱՄՆ-ի Կալիֆորնիա նահանգի Սան Ֆրանցիսկո քաղաքում։ Ապա հաջորդել են «ԱրմԹեք Կոնգրես» 2008-ը Երևանում և 2009-ը` ԱՄՆ-ում։ Իսկ 2010թ.-ին կազմակերպվել է սեմինար-հանդիպում Երևանում՝ կոնգրեսի հետագա ռազմավարության քննարկման նպատակով։