![](https://panorama.am/news_images/246/737269_1/f55c5e3551faba_55c5e3551febb.thumb.jpg)
«ԲարՔեմփ Երևան 2012»-ի շրջանակներում X-TECH-ը ներկայացրեց Citybugs.am կայքի առաքելությունը
Տեղեկատվական տեխնոլոգիաների ոլորտի շուրջ հազար մասնագետների` ծրագրավորողների, ճարտարագետների, բլոգերների, օն-լայն լրագրողների և սոցիալական ցանցերի ակտիվիստների մասնակցությամբ այսօր մեկնարկեց «ԲարՔեմփ Երևան 2012» ոչ պաշտոնական կոնֆերանսը, որն անցկացվում է արդեն չորրորդ անգամ: «ԲարՔեմփը» ոչ ֆորմալ մթնոլորտում բաց քննարկումների և մտքերի ազատ փոխանակում ապահովող միջոցառման ձևաչափ է, որը լայն տարածում է ստացել ամբողջ աշխարհում:
Ազատ գրանցումներից և բացման արարողությունից հետո մասնակիցները սկսեցին ներկայացնել իրենց շնորհանդեսները: Կոնֆերանսի մասնակիցները քննարկեցին համացանցային տեխնոլոգիաները, ծրագրավորման կիրառական խնդիրները, ճարտարագիտական նորարար լուծումներն ու սոցիալական մեդիայի վերջին զարգացումները տարածաշրջանում և աշխարհում:
«ԲարՔեմփ Երևան 2012»-ի շրջանակներում X-TECH ընկերության ներկայացուցիչ Հովհաննես Աղաջանյանը ներկայացրեց Citybugs.am կայքի առաքելությունը։ Ըստ նրա՝ Citybugs.am-ում ինտեգրվելու է Google Map դինամիկ քարտեզ, որտեղ մանրամասն տեղեկություն է լինելու օգտատերերի խնդիրների մասին:
Հ.Աղաջանյանի խոսքերով՝ այն նպատակ է հետապնդում բարելավելու և տեսանելի դարձնելու բարեփոխումները քաղաքաշինության ոլորտում, բարելավելու հետադարձ կապը հասարակության հետ, ապահովելու Երևանի քաղաքապետարանի գործունեության թափանցիկությունն ու բարձրացնելու բնակչության իրազեկվածության աստիճանը Երևանի կոմունալ խնդիրների վերաբերյալ: Նախատեսվում է, որ կայքը կգործարկվի 2 ամսից:
Նշվեց նաև, որ կայքում գրանցումը կլինի անվճար և բոլոր գրանցված օգտատերերը պետք է իրենց բջջային հեռախոսի համարով ակտիվացնեն հաշիվը: «Կայքի մոդերատորների կողմից կուսումնասիրվի կայքում ավելացված խնդիրների վերաբերյալ ամբողջ ինֆորմացիան և կնշվի, թե արդյոք տվյալ խնդիրը վստահելի աղբյուրից է , թե ոչ»,- ասաց Հ.Աղաջանյանը:
Հարցերի և առաջարկների համար կարելի է միանալ Citybugs.am-ի ֆեյսբուկյան էջին ու ներկայացնել դրանք:
Նշենք, որ միջոցառման աջակիցներն են «Լրատվության այլընտրանքային ռեսուրսների» ծրագիրն ու Ինտերնյուս Հայաստանը, AtTask, BetConstruct, Be2 ընկերությունները, ռուսաստանյան RIA Novovsti գործակալությունը: Միջոցառման գլխավոր գործընկերն է «Օրանժ Արմենիա» ընկերությունը:
Լրահոս
Տեսանյութեր
![ԱՆԻՖ-ի գործով Ավինյանը Քերոբյանի հայտարարությունը սուտ որակեց](https://panorama.am/video_images/17/50276_1/f66a0f86157c73_66a0f86157cb2.png)
![Կոնկրետ թիրախավորված է Գերասիմ Վարդանյանը. Փաստաբան](https://panorama.am/video_images/17/50265_1/f669fa592e5df9_669fa592e5e49.jpg)