«Թուրքական գարունը» սկսվել է. քրդերն ու ալևիները մի ուղղությամբ են շարժվում. Փորձագիտական գնահատականներ Իրանից
Շուրջ մեկ շաբաթ է, ինչ Թուրքիայի տարբեր քաղաքներում տեղի են ունենում լայնամասշտաբ բողոքի ցույցեր: Արևմտյան ԶԼՄ-ների հաղորդմամբ՝ այս օրերի ընթացքում շուրջ 2000 մարդ է ձերբակալվել, ոստիկանների հետ բախումների ժամանակ տասնյակ մարդիկ են վիրավորվել, իսկ երեք հոգի արդեն զոհվել է:
Թուրքիայում տեղի ունեցող զարգացումների վերաբերյալ պաշտոնական Թեհրանը չեզոք դիրքորոշում է որդեգրել՝ համարելով, որ դա այդ երկրի ներքին խնդիրն է: Անկարայում տեղի ունեցած բողոքի ցույցերից մեկի ընթացքում, երբ ձերբակալվեց Իրանի մի քաղաքացի, փորձ արվեց ներկայացնել, թե Իրանը միջամտում է բողոքի ցույցերին, սակայն, ԻԻՀ ԱԳՆ պաշտոնական ներկայացուցիչ Սեյյեդ Աբբաս Արաղչին «ՖԱՐՍ» լրատվական գործակալությանը տված հարցազրույցում, հերքելով այդ տեղեկատվությունը, նշեց, որ Իրանը չի միջամտում Թուրքիայում տեղի ունեցող խռովություններին, որ դրանք Թուրքիայի ներքին խնդիրն են:
Ինչևէ, իրանական մամուլում ակտիվորեն լուսաբանվում է Թուրքիայում տեղի ունեցող զարգացումները, տարածաշրջանային հարցերով զբաղվող իրանցի փորձագետներն ու վերլուծաբանները ներկայացնում են իրենց տեսակետները:
Եվ ահա, նրանցից մեկը՝ Թուրքիայի հարցերով իրանցի փորձագետ Հասան Հանիզադեն, իրանական «ՖԱՐՍ» լրատվական գործակալությանը տված հարցազրույցում, անդրադառնալով Թուրքիայում տեղի ունեցող բողոքի ցույցերի սկսման շարժառիթներին, նշում է, որ Էրդողանի կառավարության վարած քաղաքականության հանդեպ ժողովրդի դժգոհությունը, Սիրիայի հանդեպ Անկարայի դիրքորոշումը, Թուրքիայի որոշ ռազմակայաններ Սիրիայի սալաֆիական խմբավորումներին տրամադրելը, ահաբեկչական խմբերին քիմիական զենքով ապահովելը հարուցել է հասարակության զայրույթը, ինչն էլ լայնածավալ բողոքի ցույցերի առիթ հանդիսացավ:
Իրանցի վերլուծաբանը, անդրադառնալով բողոքի ցույցերին քրդերի հնարավոր ներգրավվածությանը, նշել է. «Էրդողանը Թուրքիայի քրդերին խաբել է: Վերջերս քրդերի առաջնորդների և Էրդողանի կառավարության միջև տեղի ունեցած բանակցությունների ժամանակ Էրդողանը նրանց խոստումներ է տվել, սակայն մինչ օրս դրանք չի կատարել: «ՊԿԿ»-ի անդամների մեծ մասը զենքերը հանձնելուց հետո հասկացել է, որ Էրդողանը իրենց խաբել է, ուստի Թուրքիայի տարբեր քաղաքներում տեղի ունեցող բողոքի ցույցերում քրդերի ներկայությունը արդեն իսկ նկատելի է»:
Հասան Հանիզադեի խոսքով՝ քրդերն ու ալևիները, որոնց թիվը հասնում է 30 միլիոնի (Թուրքիայի բնակչությունը շուրջ 72 միլիոն է) ընթանում են նույն ճանապարհով, մեծ հնարավորություններ ունեն փոփոխության ենթարկելու Էրդողանի քաղաքականության որոշ ուղղություններ:
Իրանցի վերլուծաբանը, անդրառնալով Թուրքիայում տեղի ունեցող զարգացումների հետագա ընթացքին, նշում է. «Թուրքական գարունը սկսվել է. Մարդիկ այդքան թանկ վճարելուց հետո պատրաստ չեն հրաժարվել իրենց պահանջներից: Թուրքիայի կառավարության կողմից ցուցարարների հանդեպ կատարված ոչ իսլամական և անմարդկային գործողությունները վկայում են, որ Էրդողանը ոչ մի կարևորություն չի տալիս հասարակական կարծիքին: Իհարկե, Էրդողանի կառավարություն պետք է հրաժարական տար, սակայն, նրա կառավարության քաղաքագիտական գրականության մեջ հրաժարական բառը գոյություն չունի: Էրդողանը մտածում է միայն իր իշխանության ամրապնդման մասին»:
Արմեն Իսրայելյան, իրանագետ
Լրահոս
Տեսանյութեր
Հայաստանում շատ են աշխատում, քիչ վճարվում. Աշխատանքի օրը՝ աշխատավորների խնդիրների մասին