Ձեր վստահելի աղբյուրը

Սարսանգի ջրամբարի վերաբերյալ՝ վերջին շրջանում ադրբեջանական կողմի հնչեցրած հայտարարությունների և ԼՂՀ-ի որդեգրած դիրքորոշման վերաբերյալ «Փաստինֆո» լրատվական գործակալությունը զրուցել է «Եվրոպական ինտեգրացիա» ՀԿ-ի ղեկավար Կարեն Բեքարյանի հետ: Ներկայացնում ենք նյութն ամբողջությամբ:

«Ես հիմա ավելի մեծ մտավախություն ունեմ, որ ադրբեջանական կողմը բավականին պրովոկացիոն ձեռագիր է որդեգրում Սարսանգի ջրամբարի առնչությամբ: Այսինքն՝ ի՞նչ են փորձել անել մշտապես. մեծ փաթեթից, անունը դնենք բանակցային գործընթաց, տրոհել, առանձնացնել ինչ-որ էլեմենտներ, այդ առանձնացված էլեմենտների վրա փորձել ձեռք բերել դիվիդենտներ»,- ասել է «Եվրոպական ինտեգրացիա» ՀԿ-ի ղեկավար, վերլուծաբան Կարեն Բեքարյանը՝ համոզմունք հայտնելով, որ Սարսանգի ջրամբարի հետ կապված շահարկումը այդ ձեռագրի հերթական դրսևորումն է՝ «փորձել ընդհանուր փաթեթից դուրս տարբեր կառույցներից ինչ-որ բան պոկել՝ փաստաթղթեր, ստորագրություններ և այլն»:

Ըստ Կ. Բեքարյանի՝ Ադրբեջանը մի քանի անգամ ցույց է տվել, զինադադարի հաստատումից հետո ընկած այս ժամանակահատվածում, որ այսպիսի PR ակցիաներին հաջորդում է ինչ-որ սադրանք: «Ես կարծում եմ՝ մենք պետք է բավականին զգոն և ուշադիր լինենք, որովհետև չեմ բացառում անգամ, որ նրանք ինչ-որ պրովոկացիա պատրաստելու PR ակցիայի մեջ են գտնվում»,- նշել է նա:

Նրա համոզմամբ՝ նպատակը շատ հստակ է և շատ պարզ. իբրև թե ցույց տալ միջազգային հանրությանը, որ Ադրբեջանը այս ստատուս-քվոյի պարագայում արդեն իրեն անվտանգ չի զգում: «Սա արդեն փորձել են այլ կողմից ներկայացնել, ձեռագիրը պարզ է՝ փորձել ցույց տալ նաև, որ այդտեղ վտանգ, հումանիտար, էկոլոգիալական խնդիր կա, որպեսզի դրանից անտեղյակ կառույցների, կազմակերպությունների, անձանց մոտ տպավորություն ստեղծեն և դրա տակ պրովոկացիոն էլեմենտների համար որոշակի PR ստեղծեն: Սա առաջին կողմն է:

Երկրորդ կողմն այն աննորմալ արձագանքն է, որ եղավ Սարսանգի ջրամբարի ռեսուրսները համատեղ օգտագործելու վերաբերյալ ղարաբաղյան նախաձեռնությանը: Էլի ձեռագիրն երևում է: Այսինքն՝ եթե դու ունես կամք ինչ-որ բան կարգավորելու, դու այդպիսի բանից պետք է բռնվես: Կարող է այդ առաջարկի մեջ կա քո համար անընդունելի էլեմենտ, դա արդեն երկխոսության տեղ է տալիս՝ հասկանալու, թե որտեղ կա համատեղ շահ կամ շահի հատում, կամ կարիքների գնահատում և այլն: Բայց՝ չէ՛: Միանգամից այդ նախաձեռնությունը այն կարգի արձագանքի է արժանանում, որ նախաձեռնողը, երևի, փոշմանում է»,- ընդգծել է Կ.Բեքարյանը:

Նա ավելի քան համոզված է, որ ադրբեջանական կողմից խնդրին օբյեկտիվ անդրադարձ չկա, այլ նորից փորձ է արվում քաղաքական շոու սարքել: «Բայց էլի եմ կրկնում՝ սա առաջին անգամը չի, երկրորդ անգամ չի, վերջին անգամ չի, սա ձեռագիր է արդեն: Նմանատիպ շահարկումներ եղել են Արցախում անտառների հրդեհների, ոչ միայն ջրամբարի, այլև ավելի լայն՝ ջրային ռեսուրսների, ընդհանուր օգտագործման հետ կապված»,- նշել է Կ. Բեքարյանը:

Որպես օրինակ նա հիշատակել է արցախյան կողմի վերջին նախաձեռնություններից մեկը, որը դարձյալ անպատասխան մնաց: Խոսքը Լեռնային Ղարաբաղի Հանրապետության արտգործնախարարի, իսկ հետո նաև ԼՂՀ նախագահի կողմից հնչեցված առաջարկի՝ գոնե կրոնական՝ և մահմեդական, և քրիստոնեական, տոների օրերին հրադադարի ռեժիմը հստակ պահպանելու, ցանկացած խախտումներից զերծ մնալու մասին է:

«Ցանկացած նախաձեռնության նկատմամբ ռեակցիան չի գալիս ըստ նախաձեռնության կետի և բովանդակության: Սա է խնդիրը: Հարց է առաջանում՝ ստատուս-քվոյին իրապես դեմ լինողը չի՞ օգտվի ցանկացած նախաձեռնությունից: Էլ չեմ ասում, որ ինքը լիքը նորմալ բան կնախաձեռնի: Այս ամենը ցույց է տալիս որոշակի ձեռագիր՝ խառնել, խախտել, կառուցողական ցանկացած տիպի նախաձեռնություններ փորձել ի չիք դարձնել, զրոյի հավասարեցնել»,- ասել է Կ.Բեքարյանը:

Նա միաժամանակ ընդգծել է, որ չի կասկածում, որ եթե Սարսանգի ջրամբարի հետ կապված այդ նախաձեռնության մասին ադրբեջանական ժողովուրդը պատշաճ տեղեկացվեր, շատերը, անգամ եթե բարձրաձայն կողմ չարտահայտվեին այդ համագործակցությանը, այդուհանդերձ ուրախ կլինեին դրանից, քանի որ այն կաշխատեր ի նպաստ այդ շրջանում ապրող շարքային գյուղացիների: «Դրա համար ես միշտ հորդորում եմ մեր գործընկերներին, բոլորին՝ մի նույնացրեք ադրբեջանական ժողովուրդ ասածը այսօրվա իշխանական կամ ալիևյան կլանի հետ. իրականում դրանք շատ տարբեր բաներ են»,- նշել է «Եվրոպական ինտեգրացիա» ՀԿ-ի ղեկավար, վերլուծաբան Կարեն Բեքարյանը: