Ձեր վստահելի աղբյուրը

«Երևան Էքսպո» կենտրոնում այսօր կայացավ «Ինժեներական կրթության հեռանկարները Հայաստանի դպրոցներում» թեմայով կոնֆերանսը, որի ընթացքում ներկայացվեցին առկա ինժեներական ծրագրերը: Կոնֆերանսի նպատակն է համախմբել ինժիներական կրթության կարևորության շուրջ հետաքրքրված բոլոր կողմերին:

Ինֆորմացիոն Տեխնոլոգիաների Ձեռնարկությունների Միության գործադիր տնօրեն Կարեն Վարդանյանը տեղեկացրեց, որ ամռան ընթացքում անցկացրել են 55 խմբավարաների վարժանք, որոնից 49 շրջաններից են եղել: Ծրագիրն իրականացվել է երկու փուլով, նախ նախագծվել են ռոբոտը և պատրաստել են համապատասխան ձեռնարկը, երկրորդ փուլով կրթվել են համապատասխան խմբավարներն ու 55 դպրոցում ստեղծվելու են խմբակները:

Կարեն Վարդանյանն ընդգծեց, որ իրենք հատուկ ուշադրություն են դարձնում նախ շրջանների վրա. այնտեղ ավելի մեծ պոտենցիալ են նկատել: Կարեն Վարդանյանը նշեց, որ այսօր արդեն ռոբոտաշինության բնագավառում սովորող 700 երեխա կա շրջաններից, իսկ ամբողջ Հայաստանում սովորող` 900 երեխա:

Ծրագրի մեկնարկին նպատակ է եղել ներգրավվել միայն ավագ դպրոցի աշակերտներին, բայց ընթացքում ներառվել են 5-րդ դասարանից սկսած: «5-12-րդ դասարաններից հետո երեխան դպրոցից դուրս է գալիս գրեթե պատրաստ աշխատելու»,- ասաց նա:

«Ռոբոտաշինությունը սկսվում է դպրոցից» ծրագրի հովանավորներն են «ՎիվաՍել-ՄՏՍ» ընկերությունը և «ՔՐՈՆԻՄԵՏ» բարեգործական հիմնադրամը: Տեխնիկական հովանավորն է «Արթին Վարուժան» ընկերությունը, գործընկերներն են «Վորլդ Վիժն Հայաստանը» և «Քաունթերփարթ Ինթերնեշնլ Հայաստանը»:

«ՔՐՈՆԻՄԵՏ» բարեգործական հիմնադրամի տնօրեն Աննա Սեդրակյանը Panorama.am-ի թղթակցի հետ զրույցում ասաց, որ Ինֆորմացիոն Տեխնոլոգիաների Ձեռնարկությունների Միության հետ սկսել են աշխատել 2011 թվականից, իսկ «Ռոբոտաշինությունը սկսվում է դպրոցից» ծրագրին մասնակցել են ամենասկզբից:

«Տարաբնույթ ծրագրեր իրականացնելով տարբեր սոցիալական խավերի և տարբեր ֆիզիկական հնարավորություններ ունեցող երեխաների համար, մենք հասկացանք, որ միակ արժեքավոր բանը, որ մենք կարող ենք տալ երեխաներին, ֆունդամենտալ գիտելիքն է: Այս ծրագիրն իր մեջ իսկապես պարունակում է հեռանկարներ, ինովացիոն, ստեղծագործական մոտեցում` երեխաների կրթության նկատմամբ: Համոզված եմ, որ հետագայում այս երեխաները հենց որ դպրոցից դուրս գան, նույն պահանջախնդրությամբ արդեն կվերաբերվեն իրենց ապագա կրթությանը: Ի վերջո, կկարողանան որոշակի փոփոխություն բերել թե մեր կրթական համակարգի, թե մեր տնտեսական զարգացման մեջ»,- ասաց նա:

Աննա Սեդրակյանը ծրագրի ընթացքը գնահատում է բավարար, նրա խոսքով, շատ մեծ աշխատանք է տարվել ծրագրի բոլոր մասնակիցների կողմից: Նա նշեց, որ նախատեսվում է հաջորդ տարի եռապատկել դպրոցների քանակը` մոտավորապես հասցնելով 180-ի: «Եթե այս արագությամբ շարունակենք, ապա տասը տարի հետո մենք ինժիներական մտքի և ռոբոտաշինության մեջ կլինենք առաջատար: Դա իսկապես այն ոլորտն է, որտեղ Հայաստանը մրցունակ է, որտեղ մենք այսօր կարող ենք մրցել գերտերությունների հետ»,- ասաց նա և հավելեց, որ իրենք մոտ 30 մլն դրամ են ներդրել: Աննա Սեդրակյանը կարծում է, որ ծրագիրը կշարունակվի նաև 2014-15 թթ.-ին:

ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանն իր հերթին ընդգծեց, որ դպրոցական տարիքում ստացած գիտելիքները մնայուն են, իսկ կրթական ծրագրերին նոր որակ հաղորդելու ձգտումը կարևոր առաքելություն ունի:

«Այն ռոբոտաշինությամբ հետաքրքրված սովորողների շրջանում կմեծացնի բացահայտելու և նորը ստեղծելու ձգտումը: Այս ամենին հասնելու համար հարկավոր է ապահովել զարգացած ինժիներական մտքով սերունդների հերթափոխ»,- ասաց նա: Ռաֆ Յիրիկյանը նշեց, որ ծրագրի մեկնարկի պահին քիչ մարդիկ էին հավատում հաջողությանը: «Մենք ուզում էինք սա դարձնել ազգային ծրագիր, որպեսզի այն կապվի հայ անվան հետ: Երբ մի կարևոր գաղափարի հավատում եք, այն կհաջողվի, պիտի զինվել համբերությամբ, աջակցել և տարի առ տարի կքաղենք պտուղները»,- ասաց նա և հայտնեց, որ կշարունակեն կանգնած մնալ ծրագրի կողքին:

Կրթության և գիտության նախարար Արմեն Աշոտյանն էլ նշեց, որ եթե կրթական այս մոդելը զարգանա, այն կարող է ներառվել նաև հանրակրթական ուսուցման մեջ որպես առանձին առարկա, ինչպես շախմատինն է: Ըստ նախարարի` այն կարող է դառնալ մեր կրթական համակարգի կարևորագույն բռենդերից մեկը: «Մենք կարողանում ենք հայաֆիկացնել ՏՏ ոլորտում կիրառվող մի շարք գործիքներ: Կարևոր է, որ հեղինակները առանձքային բաղադրիչ են համարում մեր մայրենի լեզվով կրթական միջավայր ունենալու հնարավորությունը»,- ասաց նախարան ու նշեց, որ ծրագրին Կրթության և գիտության նախարարության աջակցությունը կլինի շարունակական:

Կոնֆերանսի ընթացքում «Նաիրի» կոնսորցիումի գլխավոր ինժեներ Վահագն Պողոսյանը ներկայացրեց իրենց մշակած ՏՏ ուսուցման ժամանակից մեթոդաբանության վրա հիմնված լաբորատորիայի դպրոցական հայեցակարգը:

Հավելենք, որ այսօր նաև հանձնվեցին վարժանքին մասնակցած խմբավարների հավաստագրեր և ռոբոտ կոնստրուկտորային կոմպլեկտներ: Կայացավ նաև «Նաիրի» կոնսորցիումի «Աղուէս» ծրագրով ստեղծված կրթական անիմացիաների և խաղերի մրցանակաբաշխությունը: Մրցույթին մասնակցել է 86 երեխա, որոնցից 15-ն են հաղթող ճանաչվել: Նրանք ստացել են դրամական պարգևներ, մի մասն էլ` խրախուսական մրցանակներ: