Ձեր վստահելի աղբյուրը

Մի խումբ լրագրողներ, իրավապաշտպաններ և ձերբակալված լրագրող Խադիջա Իսմայիլովայի ընկերներ ԱՄՆ-ում՝ Ադրբեջանի դեսպանատան առջև, Վրաստանում և Մոլդովայում անցկացրել են բողոքի ցույցեր ի պաշտպանություն Իսմայիլովայի: Այս մասին հաղորդում է «Ազատություն ռադիոկայանի» կայքը:

Ինչպես նշվում է նյութում, ցուցարարները ԱՄՆ-ում իրենց աջակցությունն են հայտնել Իսմայիլովային և պահանջել անհապաղ ազատ արձակել նրան: Ցույցի մասնակիցներն Իսմայիլովայի ձերբակալությունը համարել են «անարդար» և «նրան լռեցնելու ու կաշառակերության հետագա բացահայտումները կանխելու հերթական փորձ»:

Ըստ աղբյուրի՝ ցույցի ավարտից հետո մասնակիցները բանաձև են ընդունել և փոխանցել Ադրբեջանի դեսպանատանը:

«Ես գիտեմ, որ Խադիջան այս պահին մեզ կասեր` իմ բանտարկության պատճառով խնդիրներր մի՛ ստեղծեք. խնդիրը քաղբանտարկյալների առկայությունն է Ադրբեջանում»,-հայտարարել է ֆոտոլրագրող Ամանդա Ռիվկին:

Վրաստանում և Մոլդովայում ևս անցկացվել են համանման բողոքի ցույցեր՝ որտեղ պահանջել են ազատ արձակել Խադիջա Իսմայիլովային: Ինչպես հաղորդում է «Կավկազսկի ուզել»-ի թղթակիցը, Թբիլիսիում բողոքի ցույցը տևել է մեկ ժամ և անցկացվել առանց միջադեպերի: Ցույցը կազմակերպիչներ չի ունեցել, այն նախաձեռնել են լրագրողները: Դրա ընթացքում մասնակիցները՝ ի պաշտպանություն Իսմայիլովայի, հավաքել են ստորագրություններ ու փոխանցել Ադրբեջանի դեսպանատանը:

Համաձայն աղբյուրի տվյալների՝ ցույցին ներկա է եղել նաև MeydanTV ադրբեջանական անկախ հեռուստաալիքի մասնաճյուղի ներկայացուցիչ Հաջի Հաջիևը, ով հաղորդել է, որ դեկտեմբերի 9-ին հեռուստաալիքը ստիպված է եղել փակել Բաքվի իր գրասենյակը:

«Այն, ինչ ներկայումս կատարվում է Ադրբեջանում, քաղաքացիական հասարակության ոչնչացում է: Փաստացիորեն Ադրբեջանում բացակայում է քաղաքացիական հասարակությունը, սպառնացել, ձերբակալել և տարբեր միջոցներով փակել են ՀԿ-ները: Իսկ փաստաթղթերում կան իշխանությունների կողմից հովանավորվող բազմաթիվ ՀԿ-ներ, որոնք ֆոն են ստեղծում, թե իբր մենք հասարակական սեկտոր ունենք»,-նշել է նա:

Ցույցի մասնակիցներից մեկի՝ Netgazeti առցանց մեդիա ռեսուրսի խմբագիր Մայի Մեցխվարիշվիլիի խոսքերով՝ նախքան ձերբակալության այս դեպքը, Ադրբեջանում արդեն իսկ ձերբակալվել են մի շարք բլոգերներ, լրագրողներ և իրավապաշտպաններ:

«Օգոստոսից ավելի սուր է շարունակվում ձերբակալությունների այս շարքը, իսկ Խադիջայի ձերբակալությունը վերջին կաթիլն էր», - հայտարարել է Մեցխվարիշվիլին:

Ցույցի մեկ այլ մասնակից՝ Թամար Գուրչիանին, «Կավկազսկի ուզել»-ի թղթակցին ասել է, որ Ադրբեջանի կառավարությունը մեծ սխալ է թույլ տվել՝ ձերբակալելով լրագրողին:

«Չնայած՝ կառավարությունը վաղուց արդեն իսկ թույլ է տվել այդ սխալը՝ ձերբակալելով իրեն քննատադող մարդկանց, լրագրողներին և իրավապաշտպաններին: Իշխանությունները պետք է հասկանան, որ միջազգային հանրությունը չի ների նրանց այս քայլը»,- ասել է Գուրչիանին:

Ինչպես նշում է «Էխո Կավկազ»-ը, լրագրողի կողմնակիցներն անցկացրել են բողոքի ցույց Մոլդովայում` Քիշնևում ևս, կրկին Ադրբեջանի դեսպանատան առջև: Համաձայն աղբյուրի տվյալների՝ այդ ակցիային զուգահեռ՝ Բաթումիում՝ Ադրբեջանի հյուպատոսարանի առջև, նույնպես անցկացվել է բողոքի ցույց՝ Իսմայիլովային աջակցելու նպատակով: Այստեղ հավաքված վրացի լրագրողները համերաշխություն են հայտնել իրենց ադրբեջանցի գործընկերոջը և պահանջել անաչառ հետաքննություն:

Նշենք, որ ադրբեջանցի հայտնի լրագրող Խադիջա Իսմայիլովային ձերբակալել են դեկտեմբերի 5-ին հարցաքննությունից հետո: Սաբայիլի շրջանի դատարանը նրա նկատմամբ խափանման միջոց է սահմանել երկու ամիս ժամկետով նախնական կալանք: Լրագրողը մեղադրվում է ինքնասպանության դրդելու հոդվածով: Եթե նրա մեղքն ապացուցվի, ապա Իսմայիլովային սպասվում է 3-7 տարի ազատազրկում:

Խադիջա Իսմայիլովան բազմիցս եղել է Ադրբեջանի կառավարության թիրախն իր լրագրողական գործունեության պատճառով: Նա մի շարք լրագրողական հետաքննությունների հեղինակ է, որտեղ մերկացրել է Ադրբեջանի իշխանության բարձր օղակներում կաշառակերության մեծ չափերն ապացուցող փաստեր: Վերջին շրջանում նա թոք-շոու էր վարում «Ազատություն ռադիոկայանում»:

Նյութեր թեմայի շուրջ`
Միջազգային կազմակերպություններն ու մամուլը` ադրբեջանցի լրագրող Խադիջա Իսմայիլովայի ձերբակալության մասին
Արևմուտքը քննադատում է Ադրբեջանի իշխանություններին լրագրող Խադիջա Իսմայիլովայի ձերբակալության համար