Գագիկ Մինասյան. ՀՀ նախագահը առաջարկել է հնարավոր լուծումներից լավագույնը
Էլեկրաէներգիայի սակագնի բարձրացման դեմ ընթացող բողոքի ակցիաների, ինչպես նաև հարցի առնչությամբ հանրապետության տնտեսական քաղաքականության պատասխանատուների հետ անցկացված խորհրդակցության ընթացքում ՀՀ նախագահ Սերժ Սարգսյանի հայտարարության վերաբերյալ panorama.am-ը զրուցել է ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանի հետ:
Պրն. Մինասյան, ինչպե՞ս կգնհատեք ստեղծված իրավիճակը:
Նախևառաջ, բերեք հասկանանք, թե ի՞նչ են, այդուամենայնիվ, պահանջում ցուցարարները: Նրանց գլխավոր պահանջը, սակագնի բարձրացման վերաբերյալ որոշման կասեցումն էր: Հանրապետության նախագահը, ըստ էության, առաջարկում է մի լուծում, ըստ որի, կասեցվում է բարձացման որոշումը: Ընդ որում, դա արվում է ոչ միայն քաղաքացիների, այլև տնտեսվարող սուբյեկտների համար: Շատ կարևոր, որ սա արվում է նաև տնտեսվարողների համար: Այս քայլը ըստ էության, բացառում է այն, ինչից ամենից շատ վախենում էին բոլորը, առ այն, որ կգնա շղթայական ռեակցիա և կհանգեցնի այլ ծառայությունների և ապրանքների գների բարձրացման: Ըստ էության, ի կատար է ածվում ցուցարարների հիմնական առաջարկը: Այս կասեցումը էներգերիկ համակարգի համար կարող է լինել փոխհատուցմամբ, կամ առանց դրա:
Մյուս կողմից, ի՞նչ իրավիճակ կստեղծվեր, այն պարագայում երբ, որոշումը ուղղակի, առանց որևէ իրական լուծման, պետբյուջեից տրվելիք փոխհատուցման կասեցվեր: Այդ դեպքում, եթե պարզվեր, որ բարձրացումը արդարացված է, տնտեսվարող սուբյեկտները կհայտնվեին չհիմնավորված, շեշտում եմ, չհիմնավորված վատ տնտեսական վիճակում, որը կհանգեցներ համակարգի քայքայման, նոր վարկերի ներգրավման անհրաժեշտության: Արդյունքում համակարգի վերականգնման համար կպահանջվեին շատ ավելի մեծ գումարներ:
Երկրի ղեկավարը առաջարկում է ցուցարարների ներկայացուցիչների մասնակցությամբ հրավիրել միջազգային լավագույն կառույցներին, և պարզել թե այդյո՞ք հիմնավոր է արդեն իսկ կասեցված էլեկտրաէներգիայի սակագնի բարձացումը: Եթե պարզվի, որ բարձրացումը հիմնավոր չէ, ապա նման իրավիճակի ստեղծման մեղավորները պատասխանատվության կենթարկվեն օրենքի ողջ խստությամբ, իսկ կասեցումը կկրի մշտական բնույթ: Բացի դրանից, պետական գանձարան կվերադարձվեն տնտեսվարող սուբյեկտներին փոխանցված գումարները: Իսկ եթե պարզվի, որ բարձրացումը հիմնավոր է, ապա դա արդեն իսկ կլինի ընդունելի որոշում: Հստակ է, որ նախագահը, ըստ էության, լուծել է ցուցարարների առաջ քաշված խնդիրը:
Արդյունքում ՀՀ նախագահի կողմից առաջարկվող լուծման ճանապարհը ոչ միայն համապատասխանում է ցուցարարների պահանջներին, այլև հնարավոր երկու լուծումներից լավագույն է: Այսինքն` ոչ թե կասեցնել և չփոխհատուցել, այլ, ընդհակառակը` կասեցնել և փոխհատուցել մինչև աուդիտի վերջնական եզրակացությունը:
Սակայն, ցուցարարները պահանջում են նաև պատասխանատվության ենթարկել նստացույցի մասնակիցների դեմ ուժ կիրառած իրավապահներին:
Այս հարցով նշանակվել է ծառայողական քննություն, և ես վստահ եմ, որ դրա արդյունքում կպատժվեն բոլոր մեղավորները, անկախ այն հանգամանքից թե օրինախախտները կհանդիսանան ցուցարար, թե՛ իրավապահ:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց
