Ձեր վստահելի աղբյուրը

«Էլեկտրաէներգիայի սակագնի թանկացման դեմ բողոքող երիտասարդները ինչ-որ չափով հաջողության հասան, քանի որ քաղաքականացված չէին, ինչպես նաև քաղաքական դաշտի նկատմամբ վստահություն չկար: Նրանց ուժն իրենց անկազմակերպվածության մեջ էր»: Լրագրողների հետ հանդիպման ժամանակ ասաց քաղտեխնոլոգ Կարեն Քոչարյանը:

Նրա խոսքով, ակցիայի պատճառներն ավելի խորն էին քան 7 դրամը, կամ 17 դրամը. «Ոչ ոք չի հավատում իշխանական, դատական, առողջապահական, կրթական համակարգերին: Անվստահության մթնոլորտ է ստեղծվել»:

Կ. Քոչարյանի կարծիքով, երիտասարդների մոտ շատ բան է ստացվել. «Շատ էլ փորձեն, չեն կարող փչացնել, եթե իրենք իրենց չփչացնեն: Իմ տեսակետից՝ ամեն ինչ նորմալ է ընթանում: Հիմար խոսակցություններ են, որ ծախվել են, վախեցել են: Իրենք իրենց չափով գտան, որ բավարարված են: Եթե աուդիտից հետո պարզվի, որ սակագինը պետք է թանկանա, համոզված եմ, որ տղաները կրկին դուրս են գալու պայքարի: Պայքարող սերունդ ունենք»:

Ըստ նրա, ակցիայի կազմակերպիչների, ակցիայի մասնակիցների միջև որևէ պառակտում չի եղել, նորմալ պրոցես է ընթանում, իրենք իրենց անելիքները, քայլերը կորոշեն, կգան ընդհանուր հայտարարի:

Ինչ վերաբերում է ոստիկանության գործողություններին, Կ. Քոչարյանն ասաց, որ փորձում են հնարավորինս ճիշտ դուրս գալ այս վիճակից, փորձում են խնդիրներ չստեղծել, ցույց տալ, որ ժողովրդավարական երկիր է, հակառակ պարագայում միջազգային կառույցների քննադատությանն են արժանանում:

Քաղտեխնոլոգն այն կարծիքին է, որ ժամանակի ընթացքում Բաղրամյան պողոտայում հավաքված քաղաքացիները, որոնց թիվը գնալով քչանում է, կցրվեն, քանի դեռ աուդիտ է հայտարարված:

«Ամենանշանակալի բաներից մեկը, որ արձանագրել եմ ինձ համար այս գործընթացների ժամանակ որպես Հայաստանի քաղաքացի, քրիստոնյա, մեր եկեղեցու ներկայացուցիչների ներկայությունն էր այնտեղ, կանգնած էին մեր երիտասարդների կողքին»,- ասաց Կ.Քոչարյանը:

Հիշեցնենք, որ Բաղրամյան պողոտայում հունիսի 22-ից շարունակվում է նստացույցը: Քաղաքացիները պահանջում են չեղյալ հայտարարել հունիսի 17-ին Հանրային ծառայությունները կարգավորող հանձնաժողովի կողմից ընդունված օգոստոսի 1-ից էլեկտրաէներգիայի սակագինը 6.93 դրամով թանկացնելու որոշումը: