Ձեր վստահելի աղբյուրը

Հայաստանի նախագահը տեղյակ է Air Armenia ընկերության սեփականատիրոջ հետ կապված միջադեպից, համապատասխան մարմինները հետևողական են լինելու, որպեսզի հարցը լուծվի օրենքի շրջանակում: Այդ մասին հայտարարել է վարչապետ Հովիկ Աբրահամյանը` անդրադառնալով Air Armenia-ի սեփականատեր Արսեն Ավետիսյանին Ֆուտբոլի ֆեդերացիայի նախագահ Ռուբեն Հայրապետյանի թիկնապահների կողմից ծեծելու մասին հարցին: Նշենք, որ Հովիկ Աբրահամյանն այս հայտարարությունն արել է «Բազե-2015» միջոցառմանը:

Հովիկ Աբրահամյանը կատարվածը բացասական երևույթ է համարել անկախ նրանից, թե ում անվան հետ է կապվում այդ երևույթը:

«Այդպիսի բոլոր խոսակցություններին, որոնք համապատասխանում են իրականությանը, ես բացասաբար են վերաբերվում: Այդ հարցը պետք է լուծվի իրավական դաշտում, օրենքին համապատասխան: Ես դատապարտում եմ այդպիսի վարքը՝ անկախ այն հանգամանքից, թե ով է այն ցուցաբերում, եթե անգամ իմ մերձավորը»,-ասել է Հովիկ Աբրահամյանը:

Air Armenia-ի սեփականատեր Արսեն Ավետիսյանը օգոստոսի 15-ին երեկոյան ծեծի էր ենթարկվել: Նա այժմ գտնվում է «Հերացի» թիվ 1 հիվանդանոցային համալիրի դիմածնոտային վիրաբուժության բաժանմունքում: Panorama.am-ին ԵՊԲՀ մամուլի խոսնակը տեղեկացրել էր, որ Ավետիսյանն ունի քթի ոսկրի կոտրվածք` թեթև տեղաշարժով և ազդրի թիակի թեթև սալջարդ: Ոստիկանությունից տեղեկացրել էին, որ կատարվածի կապակցությամբ հետաքննություն է կատարվում:

Հարակից հրապարակումներ`
«Էյր Արմենիա»-ի սեփականատիրոջը ծեծի ենթարկելու փաստով հետաքննություն է կատարվում
«Էյր Արմենիա»-ի սեփականատերը քթի կոտրվածք է ստացել