Արթուր Սողոմոնյան. Հույս ունեմ՝ կկարողանանք «Փյունիկ»-ը զարգացնել

«Փյունիկ» ֆուտբոլային ակումբի նոր սեփականատեր, ռուսաստանաբնակ գործարար Արթուր Սողոմոնյանն այսօր լրագրողների հետ հանդիպմանը շնորհակալություն հայտնեց հայաստանյան ակումբի նախկին սեփականատիրոջը՝ նման ակումբ ու ակադեմիա ստեղծելու համար, որը կարողացել է ֆուտբոլիստների նման սերունդ աճեցնել:

«Հենրիխ Մխիթարյան, Էդգար Մանուչարյան, Վարդան Մինասյան ու շատերը: Ուրախ եմ, որ ես էլ այդ պատմության մաս դարձա, հույս ունեմ՝ կկարողանանք զարգացնել ակումբը»,-ասաց նա:
Սողոմոնյանի խոսքով, ինքը ակումբը ձեռք չի բերել գումարի դիմաց, այն իրեն հանձնվել է:

«Ցավոք սրտի, Հայաստանում  ակումբներն այն վիճակում են, որ ավելի շատ ծախսեր են  պահանջում, այս պահին դժվար է խոսել եկամուտների մասին: Բաց ես հույս ունեմ, կամաց-կամաց իրավիճակը կփոխվի»,-ասաց ակումբի նոր սեփականատերը:

Նրա խոսքով, գործարքը դեռ չի ավարտվել:

Նա այսօր դժվարացավ ներդրումների վերաբերյալ հստակ թվեր ներկայացնել, ասաց «տարեկան մեկ մլն դոլարից շատ, գուցե երկու կամ երեք միլիոն»: 

«Փյունիկ»-ի նախկին սեփականատեր Ռաֆայել Հայրապետյանը, ով Ֆուտբոլի ֆեդերացիայի նախագահ Ռուբեն Հայրապետյանի որդին է, ակումբին ու նոր սեփականատիրոջը մաղթեց նորանոր հաջողություններ ու ձեռքբերումներ:

Մանրամասները՝ տեսանյութում: