Քաղաքացիները թակարդ են որակում ՃՈ աշխատանքը
Սարյան փողոցից Արամի փողոց մուտքը վարորդների համար արգելվում է: Երթևեկության այս փոփոխությունն ուժի մեջ է մտել փետրվարի 18-ից, ոստիկանությունն իր պաշտոնական էջում հայտարարել է այդ մասին, նաև ճանապարհային նշանները փոխել, բայց ինչպես փաստում են վարորդները, հարակից խանութների, գրասենյակների աշխատակիցները գծանշումները, տեղադրված նշաները բավարար կերպով տեսանելի չեն: Դրա հետևանքով Սարյան փողոցում խառնաշփոթ է ստեղծվել, օրական մի քանի տասնյակ մեքենա է տուգանվում:
Panorama.am-ի նկարահանման մոտ երեսուն րոպեների ընթացքում ավելի քան մեկ տասնյակ մեքենա Սարյանից թեքվեց Արամի, մի մասին հետ բերել հաջողվեց: Տուգանքը, ըստ ներկաների, 20 հազար դրամ է կազմում:
Վարորդները պնդում են, որ կատարված փոփոխություններին զուգահեռ տեղում պետք է ՃՈ աշխատակիցներ լինեն, անտեղյակ վարորդներին առաջին մի քանի օրերին փոփոխությունների մասին իրազեկեն: Քանի դեռ ՃՈ աշխատակիցներ չկան, վարորդներին տուգանքից փրկելու գործը ստանձնել են մոտակա «Հայփոստ»-ի շենքում աշխատողները:
«Հերթափոխով աշխատում ենք, քիչ է մնում՝ պառկենք մեքենաների տակ: Երկու օրում մի քանի հարյուր վարորդի լավություն ենք արել»,-Panorama.am-ի հետ զրույցում պատմեցին նրանք:
Վարորդները նշում են, որ կարմիր գույնով աջ թեքվելն արգելող նշան պետք է լինի, բացի անհրաժեշտ գծանշումներ ճանապարհին՝ ասֆալտի վրա չեն արվել:
«Եթե մարդը տասը տարի շարունակ եկել է ու հանգիստ աջ թեքվել, հիմա բնազդաբար գալիս է ու նույն ճանապարհով գնում: Արգելող նշանները լավ տեսանելի չեն, եթե թակարդ է, թող այդպես էլ ասեն»,-նշում են նրանք:
Ի դեպ, դեպի Արամի մուտքի արգելքը վատ է անդրադարձել «Հայփոստի» շենքի առաջին հարկում հեռախոսներ ու հեռախոսների մասեր վաճառողների, հեռախոս սարքողների աշատանքի վրա:
«Առաջ մարդիկ մտնում էին Արամի փողոց, էդ լայն հատվածում կայանում, գալիս էին գործերը վերջացնում, գնում: Հիմա կայանելու տեղ չկա: Հայփոստի շենքի դիմացը լայն է, խնդրում ենք ՃՈ-ին թույլ տա, որ այդ հատվածում մեքենաները կարողանան թեք կանգնել: Դրա արդյունքում երկու անգամ ավելի շատ մեքենաներ կարող են կանգնել, առևտուրն էլ գոնե կաշխուժանա: Այս փոփոխությունը բացասբար է ազդում է մեր ընտանիքիների վրա, մոտ հիսուն ընտանիք է այդ աշխատանքով ապրում»,-ասացին նրանք:
Ոստիկանությունից Panorama.am-ին հայտնեցին, որ տուգանված մեքենաների թվի, տուգանքի չափի վերաբերյալ տեղեկատվություն այսօր տրամադրել չեն կարող: Մի քանի օր անց միայն հնարավոր կլինի տվյալներ տրամադրել տուգանված վարորդների թվի, ինչպես նաև տուգանքի չափի մասին: