Ձեր վստահելի աղբյուրը

«Որքան երկիրը ժողովրդավար է, այնքան տվյալ երկիրը մեծ տնտեսական հաջողություններ ունի, բայց երբ նայում ենք Հայաստանի այսօրվա խնդիրներին, տեսնում ենք, որ դրանք  թաղված են ոչ թե տնտեսական, այլ՝ քաղաքական  դաշտում»,- այս մասին այսօր «Մեդիա-կենտրոն»-ում «Հայաստանի տնտեսությունը վերջին 10 տարիներին. գնահատականներ, մարտահրավերներ և խնդիրներ» թեմայով քննարկման ժամանակ ասաց տնտեսագետ Վահագն Խաչատրյանը:

Նրա խոսքով՝ վերջին 10 տարիները Հայաստանի համար դժվար տարիներ էին, 2008 թ-ին ամբողջ աշխարհում աննախադեպ ֆինանսատնտեսական ճգնաժամ էր, ինչը համեմատելի էր միայն 1933 ԱՄՆ մեծ դեպրեսային հետ:

«Թեև Հայաստանում ասում էին, որ այդ ճգնաժամը  մեզ վրա չի ազդի, քանի որ մենք կղզի ենք, փորձում էին այն թեզն առաջ տանել, թե մենք գլոբալ աշխարհի հետ կապված չենք, բայց  մենք կապված էինք և չէինք էլ կարող կապված չլինել»,- նշեց տնտեսագետը:

Ըստ նրա՝ այդ ճգնաժամից հետո Հայաստանում առկա խնդիրներն ավելի ցայտուն երևացին, մասնավորապես, ցածր կենսամակարդակ, եկամուտների բևեռացում, գործազրկություն, մենաշնորհներ, կոռուպցիոն ռիսկեր, միգրացիա, ստվերայնություն:

Խոսելով գործազրկությունից՝ նշեց, որ 2008 թվականից հետո այն 16-19 %-ի սահմաններում  է. «Սպասում էի, որ 7,5 տոկոս տնտեսական աճի պայմաններում գործազրկության մակարդակը կնվազի, սակայն ԱՎԾ-ի հրապարակած  տվյալներով՝ այն մնացել է անփոփոխ՝ 16,8 %: Ստացվում է, որ յուրաքանչյուր հինգերորդն աշխատանք չունի, իսկ երիտասարդության շրջանում գործազրկությունը  կազմում է 40%»։

Ըստ նրա՝ գործազրկությունը չի համարվել առաջնային խնդիր, մինչդեռ Հայաստանում թիվ մեկ խնդիրը պետք է լինի գործազրկության հաղթահարումը:

«Իրազեկ և  պաշտպանված սպառող» ՀԿ-ի նախագահ Բաբկեն Պիպոյանն էլ նշեց, որ Հայաստանում բացի տնտեսական ցուցանիշներից, արձանագրվում են նաև այլ արդյունքներ ևս, այսինքն՝ այն ռեֆորմները, որոնք իրականացվում են, բարելավում են համաշխարհային հարթակում Հայաստանի վարկանիշը:

«Մամուլի, խոսքի ազատության տեսանկյունից արձանագրում ենք աճ, դատական համակարգում ևս: Սա բերում է նրան, որ եթե տնտեսության վիճակը  կայուն ծանր չլիներ, ապա Հայաստանը նման սոսկալի ծավալների հասնող արտագաղթ չէր ունենա: Իհարկե արտագաղթին միայն տնտեսական վիճակը չի նպաստում, բայց տեսել ենք, որ մնացած այն էլեմենտները, որոնք կարող էին ազդել արտագաղթի վրա, դրանց մասով իրականում ունեցել ենք դրական փոփոխություններ»,-նշեց Բաբկեն Պիպոյանը:

Անդրադառնալով տնտեսական աճին՝ նա ասաց, որ թեև Հայաստանում գրանցվել է  տնտեսական 7 տոկոսի աճ, բայց հասարակությունն այդ աճը չի զգում, քանի որ Հայաստանում նվազագույն սպառողական զամբյուղը  թանկացել է 7%-ով. «Ուստի բնական է, որ այդ աճը չեն զգա»: 

Նա նաև նշեց, որ եթե տնտեսական ցուցանիշներն արհեստական են ավելացնում, դա չի ունենում այն էֆեկտները, որոնք պետք է լինեին: 

Մանրամասները ՝ տեսանյութում: