Ձեր վստահելի աղբյուրը

«Ս Ընդ Ս» ընկերությունն արտահանման նախնական պատվեր է ստացել ամերիկյան դիստրիբյուտորից։ Ընկերությունը ներկայացնում է «Աղորիք» ապրանքանիշը, որի ներքո արտադրվում են մակարոնեղեն և ոչ ալկոհոլային ըմպելիքներ։

Բիզնես Արմենիայից հայտնում են, որ իրենց աջակցությամբ «Աղորիք» ապրանքանիշով Միացյալ Նահանգներ կարտահանվեն մակարոնեղենի հայկական ավանդական տեսակներ (արիշտա, թաթարբորակի), բոված մակարոնեղեն։

«Դեպի Միացյալ Նահանգներ արտահանումների գործընթացում Բիզնես Արմենիայի աջակցությամբ հայաստանյան սննդամթերք արտադրողների և ՏՏ ընկերությունների խնդիրները հավաքագրվել և ներկայացվել են Հայաստան-ԱՄՆ Առևտրի և ներդրումների հարցերով խորհրդի երկրորդ նիստում, որին հետևել են մի շարք ընկերությունների բանակցություններն ամերիկյան դիստրիբյուտորների հետ ու արտահանման գործարքներ կնքել»,- նշել է Բիզնես Արմենիայի Արտահանողների աջակցության բաժնի կառավարիչ Անահիտ Մկրտչյանը։

«AAA Food» դիստրիբյուտորական ընկերության հետ պայամանագիր է կնքվել, որը ստանձնել է «Աղորիք» ապրանքանիշի ներկայացուցչի պարտականությունները Միացյալ Նահանգներում։

«ԱՄՆ այցի ընթացքում հանդիպումներ ենք ունեցել տարբեր դիստրիբյուտորների հետ և նախնական խմբաքանակների արտահանման պայմանավորվածություններ ձեռք բերել։ Ներկայում աշխատում ենք փաստաթղթավորման և բեռնափոխադրումների կազմակերպման հարցերի շուրջ, որի ընթացքում նույնպես ստանում ենք Բիզնես Արմենիայի աջակցությունը»,-նշել է «Ս Ընդ Ս» ընկերության գործադիր տնօրեն Սուրեն Ասրիյանը։

Առաջին, փորձնական խմբաքանակը կարտահանվի շուրջ 2 ամսից, իսկ հիմնական արտահանումը տեղի կունենա 2019 թվականից։