Ձեր վստահելի աղբյուրը

HSBC-ի Expat Explorer վերջին հետազոտության համաձայն՝ Բեռլինը, Բուենոս Այրեսը, Լոնդոնը, Նյու Յորքը և Փարիզը աշխարհի մշակութային առաջատարներն են: Մինչդեռ առողջ ապրելակերպը կամ կյանքի ավելի բարձր որակը կարևորող  օտարերկրացի աշխատողները նախընտրում են Սիդնեյը, Վանկուվերը և Մադրիդը:

HSBC-ի երևանյան մասնաճյուղից հայտնում են, թեև Հայաստանն ընդգրկված չէ Expat Explorer-ի հետազոտության մեջ, այն ևս իր յուրահատկությունն ունի արտասահմանցի աշխատողների և այցելուների համար:

Փոլ Էդգարը՝ HSBC Հայաստանի գլխավոր գործադիր տնօրենը, մեկնաբանում է.

«Թեև օտարերկրացի աշխատողները հաճախ տեղափոխվում են նոր երկրներ կարիերայի առաջխաղացման ու ֆինանսական ավելի լավ հնարավորությունների համար, մեկ այլ կարևոր խթան է այն, որ նրանք ձգտում են նոր մարտահրավերների: Նոր մշակույթ բացահայտելը, նոր քաղաքի միջավայրը, լեզուն, ավելի առողջ կենսակերպ վարելը կամ անձի զարգացման հեռանկարները գրավում են նրանց: Աշխարհի երկրները լի են հնարավորություններով և անակնկալներով:

Սրա մասին է վկայում նաև Հայաստանում իմ փորձառությունը: Հատկապես հաճելի են տեղացիների հետ շփումը, լեզուն սովորելը, հարուստ մշակույթի հետ ծանոթանալը, պատմամշակութային վայրեր այցելելը: Որպես իմ նոր տուն՝ աշխատում եմ հնարավորինս շատ բան քաղել երևանյան մշակութային ու գործնական միջավայրից: Հայաստան գալուց անմիջապես առաջ բնակվում էի Հնդկական օվկիանոսում գտնվող Մավրիկիոս կղզում: Թեև Մավրիկիոսի լողափերը, հանգստավայրերն ու ստորջրյա լողը իդեալական են հանգստի համար, սակայն Երևանի կյանքի որակն ու աշխուժությունն ինձ ավելի են դուր գալիս»:

Հայաստանի զբոսաշրջության պետական կոմիտեի փոխանցմամբ՝ հետաքրքրությունը Հայաստանի հանդեպ տարեցտարի աճում է ինչպես զբոսաշրջիկների, այնպես ես երկրում հաստատվել ցանկացող օտարերկրացիների շրջանում:

2017 թ.-ին Հայաստան զբոսաշրջային այցելությունների թիվը նախորդ տարվա համեմատ աճել է 18,7%-ով՝ կազմելով 1,484,779: Այցելող զբոսաշրիկների թվաքանակում առյուծի բաժինը կազմում են ՌԴ-ի (584,561), Վրաստանի (319,902) և Իրանի (220,147) քաղաքացիները, ընդ որում նրանց այս թվերը 2016-ի համեմատ աճել են համապատասխանաբար շուրջ 28.8, 11.9 և 16.5%-ով։ Նախորդ տարվա համեմատ, 2017թ.-ի ընթացքում Հայաստան այցելող զբոսաշրջիկների թիվն աճել է նաև Հնդկաստանի՝ 11,585 այցելու, աճ՝ 185,5%, Ֆիլիպինների 22,007 այցելու, շուրջ 159%, ինչպես նաև ԱՄԵ-ի քաղաքացիների շրջանում (8,299 այցելու, 132%) :

Հայաստանի ազգային վիճակագրական ծառայության տվյալների համաձայն՝ 2017թ.-ին Հայաստանում կացության կարգավիճակ ունի 6,042 օտարերկրացի, որոնց մեծամասնությունը՝ 1,138 և  938-ը  Իրանի և Հնդկաստանի քաղաքացիներ են համապատասխանաբար: 2017թ-ի դեկտեմբերի դրությամբ վավեր ժամանակավոր կացության իրավունք ուներ 3,919 օտարերկրացի, իսկ վավեր մշտական կացության կարագավիճակ՝ 5,766 օտարերկրացի: Վավեր մշտական կացություն ստացած օտարերկրացի մեծ մասը՝ 2,618-ը ԱՊՀ երկրներից էին, իսկ 2,230-ը՝ ԵՄ  երկրներից: