Իշխանության մեջ շատ մարդիկ կան, որ շահագրգիռ են այդ առևտրով. Լևոն Շիրինյան
ՀՀ վարչապետի պաշտոնակատար Նիկոլ Փաշինյանը օտարերկրյա լրագրողների հետ ասուլիսում հայտարարել է, որ Հայաստանը պատրաստ է դիվանագիտական հարաբերություններ հաստատել Թուրքայի հետ, բայց առանց Լեռնային Ղարաբաղին վերաբերող նախապայմանների։
«Մենք պատրաստ ենք ուղիղ հարաբերություններ հաստատել Թուրքիայի հետ առանց որևէ նախապայմանների և հույս ունենք, որ Թուրքիան նույն դիրքորոշումը կունենա»,- ասել է նա։
Panorama.am-ի թղթակիցը թեմայի շուրջ խոսեց քաղաքագետ Լևոն Շիրինյանի հետ՝ խնդրելով հայտարարության համատեքստում դիտարկել նաև Հայոց ցեղասպանության թեման։
Panorama.am- Պարոն Շիրինյան, ի՞նչ է նշանակում Թուրքիայի հետ հարաբերություններ՝ առանց նախապայամանների։ Արդյո՞ք՝ նաև առանց Ցեղասպանության ճանաչման հարցի։
Լևոն Շիրինյան- Այդ հարցը չկա, գոյություն չունի։ Ցեղասպանությունը հայկական կողմը ճանաչման իմաստով դիտել է ինքնուրույն մի հարց, որը քաղաքականության հետ կապ չունի։ Շարունակում ենք նույնը, բայց որ Ցեղասպանության ճանաչումը դառնա Թուրքիայի հետ հարաբերությունների կարգավորման նախապայման, պաշտոնապես չի դրվում։ Չի ասում՝ «Ճանաչիր, որ հարաբերվեմ»։ Հայաստանն ի վիճակի՞ է Թուրքիայի հետ հարաբերությունները նախապայմանով կարգավորել։ Չի կարող։ Քայքայված տնտեսությմբ երկիրը կարո՞ղ է նախապայմաններ առաջադրել։ Երկրորդ, այդ հարցն ունի փորձագիտական լրջագույն ուսումնասիրության կարիք։
Panorama.am- Այսինքն՝ եթե Հայաստանը տնտեսապես հզոր երկիր լիներ, կարո՞ղ էր Թուրքիայի հետ հարաբերությունների համատեքստում բարձրացնել Հայոց ցեղասպանության հարցը։
Լևոն Շիրինյան -Իրավունք էլի ունենք, բոլոր իրավունքները՝ թե բարոյական, թե իրավական։ Բայց եթե մեր տնտեսության օրինակ տեքստիլ արտադրության ճյուղն էապես կախված է Թուրքիայի մատակարարումներից, բացի այդ՝ Հայաստանը խնդիրների մեջ է Ադրբեջանի հետ, այս հետհեղափոխական շրջանում Հայաստանը կարո՞ղ է նախապայման առաջ քաշել։
Panorama.am- Պարոն Շիրինյան, հայ-թուրքական արձանագրությունների չեղարկումից հետո ինչո՞ւ կրկին վերադառնալ նույն խնդրին, որից վերջապես ազատվել էինք։
Լևոն Շիրինյան- Հայաստանում իշխանության փոփոխություն է տեղի ունեցել, և վարչապետն էլ ենթադրում է, որ երկար ժամանակ վարչապետ է լինելու։ Նա իր դիրքորոշումն է հայտնում։ Այսինքն՝ հարց կա՝ նորը պաշտպանո՞ւմ է հնի տեսակետը, թե ոչ։
Panorama.am- Իսկ Ձեր կարծիքով, ինչո՞ւ է հինը վերահաստատվում, ոչ թե նոր կոնցեպտ առաջադրվում։ Նոր կոնցեպտ չկա՞։
Լևոն Շիրինյան- Կոնցեպտների առանձին փոփոխություն չկա։ Նիկոլ Փաշինյանն այսպես է վարվում, որպեսզի վստահություն լինի իր հանդեպ։
Panorama.am- Պարոն Շիրինյան, այս պայմաններում, երբ հայաստանյան շուկան ողողված է ամենատարբեր թուրքական ապրանքներով, ի՞նչ կլինի տեղական արտադրողի ապագան, երբ Թուրքիայի հետ հարաբերություններ հաստատվեն։
Լևոն Շիրինյան- Վիճակը շատ վատ կլինի։ Պետք է տնտեսության զարգացում ապահովենք։ Մենք պետք է նվազեցնենք Թուրքիայից մեր կախվածությունը, խրախուսենք ներքին արտադրողին։ Պետությունը պետք է պաշտպան կանգնի արտադրողին, ոչ՝ ներկրողին։ Բայց իշխանության մեջ շատ մարդիկ կան, որ շահագրգիռ են այդ առևտրով։
լուսանկարը՝ 2009 թ. հայ-թուրքական արձանագրություններից ստորագրումից հետո
Հարակից հրապարակումներ`
- Թուրքայից պատասխանել են Փաշինյանին
- Նիկոլ Փաշինյան. Հայաստանը պատրաստ է հարաբերություններ հաստատել Թուրքիայի հետ, բայց առանց նախապայմանների