Ձեր վստահելի աղբյուրը

Գործադիրի այսօրվա նիստում մինչև օրակարգի հարցերին անցնելը, վարչապետ Նիկոլ Փաշինյանն անդրադարձավ վերջին օրերին գազալցակայաններում գազի գնի բարձրացմանը:

Նրա խոսքով՝ երեկվանից սոցիալական ցանցերը ողողված են տեղեկատվությամբ, թե գազալցակայաններում գազի թանկացում է տեղի ունեցել, ուստի հրավիրել է Շուկայի վերահսկողության տեսչական մարմնի ղեկավարին, որպեսզի տեղեկատվություն ներկայացնի:

ՇՎՏՄ ղեկավար Արմեն Կոտոլյանը հայտնեց, որ գազի գնի փոփոխություն տեղի չի ունեցել, խնդիրը նրանում է, որ ամսական միջին հաշվարկներով գազի խտությունը վերջին տարիներին եղել է 7.1, բայց վերջին 3-4 օրվա ընթացքում «Գազպրոմ Արմենիա»-ից գազի խտությունը գալիս է 7,9ով:

«Դա նշանակում է, որ խտությունն աճել է և տնտեսվարողներն իրենց ծրագրերի մեջ փոփոխությունների պետք է անեին, որը չեն արել, և սպառողները ստիպված են եղել ավելի գումար վճարել: Մենք բոլոր տնտեսվարողներին տեղեկացրել ենք, որ անպայման ամեն օր փոփոխություն կատարեն իրենց դիսպենսերներում և ճիշտ խտություն տեղադրեն, որպեսզի սպառողները ստիպված չլինեն ավելի գումար վճարելու»,-ասաց նա:

Արմեն Կոտոլյանն նշեց նաև, որ ամեն օր «Գազպրոմ Արմենիան» գազի խտություն է տալիս ու ԱԳԼՃԿ-ներում այդ խտությունը պետք է փոփոխեն: Նա հիշեցրեց, որ կառավարությունը բնական գազի համար որոշել է նոր չափման միավոր սահմանել` խորանարդ մետրը փոխարինելով կիլոգրամներով, բայց դեռ այդ օրենքը չի ընդունվել ԱԺ-ում:

Վարչապետը հարցրեց, թե դա հնարավո՞ր է կապված լինի այն գործընթացի հետ, որ վերջին մեկ տարվա ընթացքում իրականացնում են գազալցակայաններում: Խոսքը վերաբերում է  ստվերի կրճատմանն ու չարաշահումների դեմ պայքարին. «Հնարավո՞ր է, որ գազալցակայանների տերերը իրենց խելքով փորձում են այսպիսի պրովոկատիվ գործողություններով որոշակի դժգոհություն հարուցել: Հնարավո՞ր է այս սցենարը»։

Պետական եկամուտների կոմիտեի նախագահ Դավիթ Անանյանը նշեց, որ տեսականորեն հնարավոր է:

Նիկոլ Փաշինյանը նշեց նաև, որ երեկ մանիպուլյատիվ տեղեկություններ էին տարածվում, թե իբր կառավարության որևէ գործողության արդյունքում գազի գինը փոխվել է. «Ուզում եմ արձանագրել, որ որևէ նման գործողություն տեղի չի ունեցել: Երկրորդ, նույնիսկ մանիպուլյատիվ տեղեկություն կար, որ դա կապված է կառավարության կողմից ընդունված օրենքի նախագծի հետ: Նախ, այդ օրենքը ԱԺ-ում դեռ չի քննարկվել: Երկրորդ, մեր փորձագիտական գնահատականներով, այդ օրենքը  չի կարող գազի գնի փոփոխման պատճառ դառնալ: Հետևաբար, որքան վերլուծում եմ, այստեղ մենք կարող ենք այլ խնդրի հետ գործ ունենալ, որ ոմանք փորձում են մանիպուլյացիաներ անել: Այստեղ պետական մարմինների արձագանքը պետք է լինի շատ կոշտ: Ուզում եմ կրկնել, որ որոշ նախկին օլիգարխներ, եթե մտածում են, թե իրենք կարողանալու են այս իրավիճակում մանիպուլյացիաների դաշտ մտնել, սխալվում են: Ուզում եմ բոլորին վերջին անգամ զգուշացնել, որ մեր բարեկրթությունը որևէ մեկը չփորձի մեկնաբանել որպես թուլություն, թե չէ շատ դաժան հարված կստանան անձնապես, բոլորն առանց բացառության: Որևէ մեկը թող չտրվի գայթակղությանը կառավարության հակահարվածի ուժն իր ծնոտին զգալու: Ես սա շատ ուղիղ եմ ասում, շատ հասցեական եմ ասում»:

Նա հանձնարարեց ՊԵԿ-ին  և այլ պատկան մարմիններին շատ արագ արձագանքել, գտնել ու խիստ պատժի ենթարկել այն տնտեսվարողներին, որոնք այս իրավիճակում փորձում են որոշակի մանիպուլյացիաներ անել:

Նիկոլ Փաշինյանը նշեց նաև, որ ստվերի դեմ պայքարում կոմպրոմիս չունեն.  «Չլինի Հայաստանում գազալցակայան, որը ՀԴՄ չխփի: Եթե պետք է ՀԴՄ խփեն ու սնանկանան, չնայած էդպիսի բան հնարավոր չէ, ուրեմն թող սնանկանան: Ապօրինի, ժողովրդի հաշվին, պետության հաշվի հարստացողներ մարդիկ Հայաստանում չեն լինելու: Ես ուզում եմ, որ մենք բոլորս սա հստակ արձանագրենք»:

Փաշինյանը սա համարեց ազգային անվտանգության հարց, ապա դիմելով ԱԱԾ տնօրեն Արթուր Վանեցյանին՝ հանձնարարեց ուշադրություն դարձնել այս թեմային:

«Հայաստանում խոսքի և տեղեկատվության ազատությունը երաշխավորված է, բայց եթե որոշ հանցավոր շրջանակներ միլիոններ են ծախսելու սոցիալական ցանցերում, լրատվամիջոցներում հասարակական կարծիքի մանիպուլյացայի համար, դա ազգային անվտանգության խնդիր է: Հույս ունեմ, որ ձեր ծառայությունը կկարողանա այդ հարցում ապահովել կոնկրետ արդյունքներ:  Ընդհուպ սոցիալական ցանցերում կան հեղափոխության դրոշով հանդես եկող ֆեյքեր, որոնք բռնությունների կոչեր են անում: Այս կարգի մանիպուլյացիաները պետք է կոշտ հակահարված ստանան: Կարծում եմ, որ ՀՀ օրենսդրությունը նման հնարավորություն տալիս է՝  իհարկե որևէ կերպ կասկածի տակ չդնելով Հայաստանում խոսքի ազատության իրավունքը», -ասաց վարչապետը: