Ձեր վստահելի աղբյուրը

Երևան քաղաքի մանկապարտեզների ավագ խմբի երեխաներն, ովքեր այս տարի պետք է առաջին դասարան հաճախեն, չստացան քաղաքապետարանի կողմից ավանդական դարձած նվեր պայուսակը։ Մամուլի հրապարակման համաձայն՝ քաղաքապետարանից նշել են, որ իրենք տեղեկություններ ունեն, թե այդ պայուսակները ծնողները չեն օգտագործում և որոշել են դրան հատկացվող գումարը ծախսել է այլ նպատակով։

Panorama.am-ը քաղաքապետարանից ճշտեց, թե ինչ նկատի ունեն այլ նպատակ ասելով։
Քաղաքապետարանի հանրակրթության վարչության պետ Աննա Ստեփանյանի հետ կապ հաստատել այդպես էլ չհաջողվեց, մեր մի քանի զանգին ի պատասխան հասարակայնության հետ կապերի վարչությունից ասացին, որ տիկին Ստեփանյանը շենքում չէ, ժողովի է և չգիտեն երբ կվերադառնա։

Երևանի քաղաքապետարանի մամուլի խոսնակ Հակոբ Կարապետյանը մեզ հետ զրույցում ասաց, որ այլ նպատակով ծախսելու մեջ նախ մտնում է այն որոշումը, որ այս տարի  առաջին դասարան գնալ պատրաստվող երեխաները կարող են մինչև օգոստոսի 30-ն այցելել մանկապարտեզ, իսկ նախկինում ավարտական հանդեսից հետո երեխաները շուրջ երկու ամիս մնում էին տանը, մինչ դպրոց կգնային։

«Ընդհանուր առմամբ նպատակահարամար չի եղել այս տարի պայուսակներ նվիրելը և քաղաքային իշխանությունը մանկապարտեզ գնացող երեխաներին ու նրանց ծնողներին օգնելու այլ միջոցներ է ձեռնարկում՝ ավելացնելով մանկապարտեզում խմբերի թվերը, ավարտական կոնկրետ խմբերի երեխաների համար հնարավորություն ստեղծելով, որպեսզի նրանք ավարտական հանդեսից հետո հուլիս-օգոստոս ամիսներին ևս հաճախեն մանկապարտեզ, ինչը բավականին թեթևացնում է ծնողների գործը»,- նշեց նա։

Ինչ վերաբերում է հարցին, թե սոցիալապես անապահով շատ ծնողների համար դա կարող էր որոշակի ֆինանսական բեռի թեթևացում լիներ, Կարապետյանը պատասխանեց. «Սոցիալական աջակցություն որոշակի թիրախային խմբերի ընտանիքների երեխաները շարունակում են ստանալ քաղաքապետարանից կամ այլ սոցիալական ապահովության մարմիններից աջակցություն»։

Ի դեպ՝ քաղաքապետարանը ազնիվ չի գտնվել և նախօրոք չի հայտնել, որ երեխաների՝ երկու ամիս ավելի մանկապարտեզ հաճախելը կատարում է պայուսակներ չտրամադրելու հաշվին։

Նշենք նաև, որ «ՍիվիլՆեթ»-ն այսօր գրել էր. «Նվազեցվում էնախադպրոցական հաստատությունների՝ մանկապարտեզների հիմնանորոգման և վերանորոգման համար նախատեսված գումարը՝ 91 մլն դրամով, սակայն, ի տարբերություն վերոնշյալ հոդվածափոխության, այս դեպքում պահուստային ֆոնդից որևէ ավելացում նախատեսված չէ»։

Աղբյուրը կապ է հաստատել Երևանի քաղաքապետարանի հետ, թե ինչու է այս գործողությունների արդյունքում նվազեցնում մանկապարտեզներին հատկացվող գումարը, որտեղից ասել են. «Այս տարի հաստատությունների որոշակի մասի նախագծման և շինարարության աշխատանքների մրցույթները կայացել են և ընթացքի մեջ են, սակայն կանխատեսում կա, որ որոշակի մաս մինչև տարվա վերջ չի հասցնի կատարվել, այսինքն՝ այդ 91 մլն դրամը, այդպե թե այնպես, «պարապ մնալու է»։ Որպեսզի համայնքն այդ գումարից օգուտներ քաղի, որոշվել է փոխանցել այն հոդվածին, որտեղ անհրաժեշտությունը քաղաքն ունի, այն է՝ աղբահանությանը։ Այդ գումարն աղբահանությանն ուղղված 1,7 մլրդ դրամի «մի փոքր մասն է»։