Ձեր վստահելի աղբյուրը

Խորհրդարանում կառավարության հետ հարցուպատասխանի ժամանակ այսօր «Բարգավաճ Հայաստան» խմբակցության պատգամավոր Սերգեյ Բագրատյանը ԿԳՄՍ նախարար Արայիկ Հարությունյանից հետաքրքրվեց, թե բուհերի ծրագրերից «Հայ գրականություն», «Հայոց լեզու» և «Հայոց պատմություն» առարկաները հանելու որոշումը հանրային քննարկման ինչպիսի հարթակներ է ընդգրկում և դրա վերաբերյալ գիտնականների կարծիքները հաշվառվա՞ծ են, թե՞ ոչ։

«Դա պարտադիր բնույթ ունի՞ , թե՞ հնարավոր է, որ հայեցողական հնարավորություններ նույնպես ընձեռնվեն»,- հարցրեց պատգամավորը։

Ի պատասխան նախարարն ասաց. «Ծրագրերից չեն հանվում այդ առարկաները, այլ դրա պարտադիր բնույթի մասին է խոսքը գնում, քանի որ մեր և ընդհանուր տրամաբանությամբ, մեր աշակերտները 12-ամյա կրթության ժամանակ բավարար գիտելիք են ստանում այս առարկաներից, և ծրագրերի մեծ մասում դրանց կրկնությունը ազդում է ոչ միայն տվյալ մասնագետի որակների վրա, այլ մասնագիտական այդ ծրագրի բովանդակության ու որակի վրա է ազդում»։

Հարությունյանի խոսքով՝ այս հարցում համոզմունքն այն է, որ հանրակրթության ոլորտում փոփոխությունների արդյունքում հանգեցնելու ենք մի իրավիճակի,երբ  որ քաղաքացին, որը բուհ է գալու, ստանալու է բավարար գիտելիք այս առարկաներից և ավելի շատ ուշադրություն է դարձնելու մասնագիտության վրա։

«Բուհերն իրենք կարող են իրենց ծրագրերում ներառել այս առարկաները, բայց դրանք պարտադիր բնույթ չեն կրելու»,- նշեց նա։

Պատգամավորն առաջարկեց՝ երկու կիսամյակ ներառելուց հետո նոր դարձնեն հայեցողական։

«Սա արվում է մասնագիտական գիտելիքներն ավելացնելու համար, բայց սա նախագծի աշխատանքային տարբերակն է, երբ որ վերջնական տարբերակը դրվի շրջանառության մեջ, քննարկումներն ավելի շատ են լինելու, այդ թվում՝ լսումներ ԱԺ-ում»,- հավելեց նախարարը։