Տեր Եսայի քահանա. Այդ ընտանիքին օգտագործում է «Նոր Հայաստան, Նոր հայրապետ» շարժումը»
Եկեղեցում պատարագների ժամանակ հավատացյալների հասցեին անվայել արտահայտություններ թույլ տված անձինք ամուսիններ են։
Տեր Եսայի քահանա Արթենյանը ճանաչում է նրանց արդեն մի քանի տարի, գիտի ընտանիքի պատմությունը, կարծում է, որ նրանց օգտագործում է «Նոր Հայաստան, Նոր հայրապետ» շարժումը։
Panorama.am-ի հետ զրույցում Տեր Եսային պատմեց, ընտանիքն ունի խուլ դուստր։ Նա մոտ 7-8 տարի առաջ հաճախում էր Սուրբ Երրորդություն եկեղեցու խուլերի համայնք, ակտիվորեն մասնակցում էր համայնքի կյանքին, բացի խլությունից նա առողջական որևէ խնդիր կարծես թե չի ունեցել։ Հետո ընտանիքը մեկնում է Ֆրանսիա, հանձնվում ճամբար։
«Ես չգիտեմ՝ ինչ է տեղի ունեցել այնտեղ։ Աղջիկ երեխան դառնում է ավելի հաշմանդամ, սայլակով է շարժվում, կասկածներ կան, որ ներքին օրգանների վաճառք է եղել, ես չգիտեմ՝ ծնողների համաձայնությամբ, թե՞ ոչ։ Հետո չգիտեմ ինչ պատճառներով ու հիմնավորումներով, նրանց արտաքսում են Ֆրանսիայից։ Իրենց պատմածով, դեպորտ անելուց հետո իրենք դիմում են այնտեղի եկեղեցուն ու տարբեր հոգևորականների, որոնք բնականաբար չեն կարողացել օգնել իրենց կացության օրինականացնելու հարցում։ Նրանք ասում են, քանի որ եկեղեցին իրենց չի օգնել, ուրեմն բոլոր դժբախտությունների պատճառը հոգևորականներն են»,-ընտանիքի պատմությունը ներկայացրեց քահանան։
Տեր Եսայի քահանայի խոսքով, դրանից հետո ամուսինները սկսել են երևակայական մեղավորներ փնտրել՝ մեկ Հայրապետին են մեղադրում, մեկ արքեպիսկոպոս Կճոյանին, մեկ իրեն, մեկ էլ նախկին իշխանությունների ներկայացուցիչներին։
«Հայտարարում են, իբր թե այս մարդիկ իրենց աղջկան բռնաբարել են, նրան օրգանները հանել են վաճառքի և այլն։ Ինձ մեղադրում են, թե ես իրենց բանկ եմ տարել, թղթեր են ստորագրել, հետո էլ ասում են, թե Տեր Եսային չի եղել, խուլերի թարգմանիչն է եղել։ Այսպես արդեն քանի տարի է նրանք գնում են տարբեր վայրեր ու աղմուկ են բարձրացնում, իսկ վերջին շրջանում նրանց արածներն այլ չափեր ստացան՝ պատարագներն են խանգարում, ճչոցներ արձակում, իբր բողոքի ակցիաներ են անում Վեհափառի դեմ»,-պատմեց Տեր Եսային։
Մոտ երեք տարի առաջ, երբ «մեղադրյալների» ցուցակոմ դեռ Տեր Եսային չկար, խոսել է ընտանիքի հետ, փորձել է հասկացնել, որ նրանց հայտարարություններն աբսուրդ են ու զրպարտություն։ Դրանից հետո ինքն էլ է հայտնվում ցուցակում։
«Իրավապահները վաղուց են տեղյակ, նույնիսկ Սուրբ Սարգիս եկեղեցում նրանք ականատես եղան, թե ինչպես են խանգարում պատարագը։ Նրանք մեզ չեն լսում, ինձ իրենց թշնամի են համարում, ադեկվատ չէ նրանց պահվածքը։ Ես կարծում եմ, որ նրանց օգտագործում է «Նոր Հայաստան, նոր Հայրապետ շարժումը, քանի որ բոլոր տեսանյութերում, որ մենք տեսնում ենք համացանցում, կողքից ինչ-որ մեկը նկարում է, հետո մենք պարզեցինք, որ հենց այդ շարժման անդամներն են նրանց բերում, ուղղորդում»,-կարծիք հայտնեց քահանան։
Հիշեցնենք, որ սեպտեմբեր-հոկտեմբեր ամիսներին մուտք գործելով Երևանի «Սբ. Զորավոր», «Սբ. Գրիգոր Լուսավորիչ» և «Սբ. Աննա» եկեղեցիներ, պատարագի ժամանակ երկու անձինք բացահայտ անհարգալից վերաբերմունք են դրսևորել հավատացյալների նկատմամբ: Ոստիկանությունից հայտնեցին, որ փաստի առթիվ ոստիկանության նյութեր են նախապատրաստվում: