Ձեր վստահելի աղբյուրը

«Պարտադիր չէ՝ բոլորը սովորեն բուհում, այն երեխաները, որոնք արհեստ ձեռք բերելու ցանկություն ունեն, կարող են կրթություն ստանալ ուսումնարաններում և քոլեջներում: Պետությունն էլ պարտավոր է ապահովել այդ հնարավորությունը»,- խորհրդարանում ասաց ԱԺ «Իմ քայլը» խմբակցության պատգամավոր Մխիթար Հայրապետյանը։

Պատգամավորը նշեց, որ Կրթության մասին գործող օրենքով միայն անվճար հիմունքներով կարող են աշակերտները սովորել նախնական և միջին մասնագիտական կրթական հաստատություններում։ Բայց պետական միջոցների սղության պատճառով բոլոր  ցանկացողներին հնարավորություն չի տրվում պետական պատվերի շրջանակում սովորել միջին մասնագիտական հաստատություններում։

«Մենք առաջարկում ենք հնարավորություն տալ աշակերտներին վճարովի հիմունքներով սովորել նախնական և միջին մասնագիտական կրթական հաստատություններում»,- ասաց Հայրապետյանը։

Նա նշեց՝ երկրորդ փոփոխությամբ էլ առաջարկվում է հեռակա ուսուցման հնարավորություն չունեցող արվեստի քոլեջներում սովորողներին հնարավորություն ընձեռել հեռակայելու. «Օրինակ, Ռոմանոս Մելիքյանի քոլեջն ավարտելուց հետո ուսանողին հնարավորություն է ընձեռվում անմիջապես 2-րդ կուրսում սովորել որևէ բուհում։ Այս դեպքում խտրականություն է առաջանում, քանի որ հաճախ ուսանողները հնարավորություն չեն ունենում երկրորդ կուրսում ստացիոնար սովորել, իսկ հեռակայի հնարավորություն չկա»։

Հայրապետյանը նշեց՝ ներկայացվող փոփոխությունների ուղերձն այն է, որ   բոլոր արհեստավորները, միջին մասնագիտական կրթություն ստացած պրոֆեսիոնալները կարող են ապրել ոչ պակաս բարեկեցիկ, քան ոչ այնքան պրոֆեսիոնալ իրավաբանները, միջազգայնագետները, արևելագետները և այլք։

ԱԺ «Լուսավոր Հայաստան» խմբակցության պատգամավոր Վիկտոր Ենգիբարյանը հետաքրքրվեց՝ արդյոք մասնավոր ընկերությունները կարո՞ղ են ստեղծել միջին մասնագիտական կրթական հաստատություն. «Շատ մասնավոր ընկերություններ, որոնք գործում են արտերկրում, կուզեին այստեղ կրթական հաստատություն ստեղծել, եթե ունենային կադրեր»։

Պատասխանելով հարցին՝ Հայրապետյանն ասաց, որ կոչ են անում տարբեր ընկերություններին՝ համագործակցել միջին և նախնական մասնագիտական կրթական հաստատությունների հետ։ Նա նշեց, որ հաճախ կրթական հաստատությունները չեն ապահովում համապատասխան մակարդակ, որովհետև երեխաները քոլեջներում ոչինչ չեն սովորում։

«Իսկ եթե օրենքի նախագիծն ընդունվի, քոլեջները կունենան սեփական բազան, դասավանդողները լավ կվարձատրվեն, կբարձրացվի կրթության մատուցման մակարդակը»,- ասաց Հայրապետյանը։

ԱԺ «Բարգավաճ Հայաստան» խմբակցության պատգամավոր Սերգեյ Բագրատյանն էլ նշեց, որ անկախության հռչակումից հետո մարդիկ դիպլոմ էին գնում և իրենց համար աշխատատեղ ապահովում, հետո դրան հաջորդեց մյուս փուլը, երբ ոչ ոքի այդ, իր խոսքով, թղթի կտորը պետք չէր. «Հիմա եկել, երրորդ փուլին ենք հասել, որտեղ հավանաբար պետք է և՛ լավ մասնագետ լինի, և՛ դիպլոմ ունենա։ Այս ընթացքում մենք պետք է կարողանանք մոտիվացիաներ գտնել, որ մարդիկ չասեն՝ ինձ պետք չի էդ դիպլոմը, երեխայիս կուղարկեմ ոսկերչի մոտ, կսովորի։ Ինչպե՞ս գտնել այդ բանալին»։

Պատասխանելով հարցին՝ Հայրապետյանը նշեց, որ առաջարկվող փոփոխությունները լավ նախադրյալ են լինելու, քանի որ քոլեջները կունենա հավելյալ բյուջե և ուսուցման մակարդակը կբարձրանա։
ԿԳՄՍ նախարարը նշեց, որ առաջարկվող նախագիծը որևէ խնդիր չի լուծում։

«Մենք փորձել ենք ոլորտը ազատել բալաստային տեղերից։ Դրանք առաջանում են այն պարզ պատճառով, որ ավանդաբար որոշակի մասնագիտությունների նկատմամբ եղած հետաքրքրության պատճառով մենք ունենում ենք մեծ թվով պահանջարկ։ Նախորդ տարի մենք ունեցել ենք 1500 դիմորդ, որոնք չեն ընդունվել միջին մասնագիտական կրթական հաստատություններ։ Հիմական պահանջը եղել է 3 ուղղությամբ՝ IT ոլորտ, բժշկություն և տնտեսագիտություն։ Իսկ գերատեսչություններն ասում են, որ այդ որոլտներին տեղ չտանք, որովհետև շուկան դեֆորմացվում է»,- նշեց Հարությունյանը։

Նրա խոսքով, եթե միջին մասնագիտական կրթական հաստատություններում վճարովի տեղերը ավելացվեն, ապա աշակերտները շարունակելու են իներցիայով գնալ պահանջարկ չունեցող մասնագիտությունների հետևից։

Խորհրդարանը քննարկում է ԱԺ պատգամավորներ Մխիթար Հայրապետյանի, Նաիրա Զոհրաբյանի և Հարություն Բաբայանի կողմից ներկայացված «Կրթության մասին ՀՀ օրենքում փոփոխություն և լրացում կատարելու մասին» և «Նախնական մասնագիտական, արհեստագործական և միջին մասնագիտական կրթության մասին ՀՀ օրենքում փոփոխություններ կատարելու մասին» օրենքների նախագծերի փաթեթը առաջին ընթաերցմամբ ընդունելու հարցը։