ԵՊՀ Հոգաբարձուների խորհրդի նիստը տեղի չի ունեցել. խորհրդի անդամների կեսից ավելին ներկա չէին

Այսօր հրավիրված ԵՊՀ Հոգաբարձուների խորհրդի նիստը տեղի չի ունեցել, քանի որ քվորում ապահովված չէր:

ԵՊՀ-ից հայտնում են, որ նիստի առաջարկվող օրակարգում ներառված էին 2018-19
ուստարում «Երևանի պետական համալսարան» հիմնադրամի գործունեության հիմնական
ուղղություններով կատարված աշխատանքների վերաբերյալ ռեկտորի հաշվետվության
ներկայացում և 2016-2020 թթ. «Երևանի պետական համալսարան» հիմնադրամի
զարգացման ռազմավարական ծրագրով 2018-19 ուստարում նախատեսված աշխատանքների
կատարողականի հաստատում:

Բացի դրանից՝ առաջարկվող օրակարգում ներառված էր նաև «Երևանի պետական համալսարան» հիմնադրամի՝ 2019 թ. (հունվար-դեկտեմբեր) եկամուտների և ծախսերի կատարողականի մասին հաղորդում:

Ըստ  «Երևանի պետական համալսարան» հիմնադրամի կանոնադրության՝ Հոգաբարձուների խորհրդի նիստն իրավազոր է, եթե դրան մասնակցում է խորհրդի անդամների կեսից ավելին։

ԵՊՀ ՈՒԽ նախագահ Դավիթ Ափոյանն ասել է, որ ուսանող անդամների բացակայությունը բողոքի նշան է՝ ուղղված  «Բարձրագույն կրթության և գիտության մասին» ՀՀ օրենքի նախագծով կառավարման խորհրդի կազմում ուսանող անդամների թվի կրճատմանը:

«Ես ֆիզիկապես այստեղ եմ, բայց չեմ ստորագրել՝ չհաստատելով ներկայությունս: Մենք ցանկանում ենք կառավարության ուշադրությունը կրկին հրավիրել այն հանգամանքի վրա, որ ուսանողների մասնակցությունը շատ կարևոր է բուհի կառավարմանը, և նրանց թվի կտրուկ կրճատումն ուղիղ հարված է հասցնում բուհի ինքնավարությանը»,- ասել է  Դավիթ Ափոյանը և փաստել, որ առաջիկայում այլ քայլեր կիրականցնեն՝ ի նշան բողոքի:

Դավիթ Ափոյանը շեշտել է, որ ուսանողների բողոքն ուղղված չէ կոնկրետ անձի դեմ և ներողություն է  խնդրել նիստին ներկա անդամներից:

ԵՊՀ հոգաբարձուների խորհրդի նախագահ Գևորգ Մուրադյանն իր կարծիքն է հայտնել բողոքի վերաբերյալ՝ այն համարելով անարդյունավետ, և նիստը համարել է  փակված: