Անգամ բուժքույր ունենալու հարցում մարզային որոշ դպրոցների «բախտը չի բերել»
Սուր շնչառական հիվանդությունների տարածման և հանրապետության տարածքում կորոնավիրուսով հիվանդացության դեպքի հաստատման հետ կապված ՀՀ առողջապահական և աշխատանքի տեսչական մարմինն առաջարկում է պահպանել Առողջապահության նախարարության սահմանած նորմերը, որոնց պետք է հետևեն դպրոցները՝ վիրուսի տարածումը կանխելու համար։
Մասնավորապես, նշվում է՝ սուր շնչառական վարակների սեզոնին (աշուն-գարուն) ուսումնական հաստատությունում միջին բուժաշխատողի կողմից պետք է ապահովվի սուր շնչառական վարակներին բնորոշ (հարբուխ, հազ, ջերմություն, փռշտոց, տկարություն) ախտանշաններով հիվանդ երեխաների ամենօրյա ակտիվ հայտնաբերում, որից անմիջապես հետո հիվանդ երեխաներին պետք է տեղափոխել բուժկետ։
Իսկ արդյոք բոլոր դպրոցներն ունեն բուժկետ և կարող են երեխաների նվազագույն զննություն իրականացնել
Երևանի Նիկոլ Աղբալյանի անվան հ. 19 դպրոցից Panorama.am-ի հետ զրույցում հայտնեցին, որ ունեն բուժկետ և 2 բուժքույրերն ամենօրյա ռեժիմով իրականացնում են իրենց վերապահված գործառույթները։
Մեր ճշտող հարցին՝ կոնկրետ ինչ գործառույթներ են իրականացնում բուժքույրերը, դպրոցի փոխտնօրեն Հասմիկ Մանուկյանն ասաց՝ առավոտյան ֆիլտրում է իրականացվում. «Բուժքույրերը կանգնում են դպրոցի դռան դիմաց, եթե աշակերտի մոտ նկատում են որևէ ախտանիշ՝ ջերմություն, հազ, գլխապտույտ, ապա զանգում են երեխայի ծնողին, որպեսզի գա և նրան տուն տանի։ Հետո դասղեկները կապ են հաստատում ծնողների հետ, հասկանում՝ երեխայի մոտ ինչ վիճակ է»։
Նշենք, որ դպրոցի առաջին հերթում սովորող 1360 երեխաներից 328-ը, և երկրորդ հերթում սովորող 681 աշակերտից 570-ը բացակայել են դասից։
Գյումրու թիվ 7 հիմնական դպրոցի տնօրեն Գագիկ Կարապետյանը ևս նշեց, որ դպրոցն ունի բուժկետ, և 3 բուժքույրերն ամեն օր հերթապահում են։
«Սանեդիտկայանից ևս գալիս են, զննում են երեխաներին։ Այսօր 80 բացակա ենք ունեցել (1200 աշակերտից), բայց ոչ բոլորն են հիվանդության պատճառով բացակայել։ Միշտ էլ էս եղանակին 6 տոկոսի հասնող բացակայություններ ունեցել ենք։ Արձակուրդին նախորդող շաբաթ էին բացակայությունները մի քիչ շատ, բայց էդ էլ էն պատճառով էր, որ կորոնավիրուսի հետ կապված մեծ վախ կար երեխաների ու ծնողների շրջանում, հիմա էդ չկա»,- ասաց Կարապետյանը։
Երևանի Լ. Շանթի անվան, հ. 4 դպրոցից էլ մեզ հայտնեցին, որ բուժկետ չունեն, սակայն ունեն բուժքույրի կաբինետ։
Դպրոցի տնօրեն Արմենուհի Զուռնաչյանը տեղեկացրեց, որ ամենօրյա ֆիլտրացիա են իրականացնում։
«Այսօր ունենք 32 բացակա, նրանցից 9 հոգին է հիվանդ»,- ասաց տնօրենը։
Վանաձորի Հովհաննես Թումանյանի անվան թիվ 3 հիմնական դպրոցից մեզ հետ զրույցում ասացին, որ դպրոցում կա բուժկետ, բուժքույրն էլ ամեն առավոտ ջերմաչափում է իրականացնում։ Դպրոցի 535 աշակերտներից 50-ն այսօր բացակայել է դասից։
Եթե քաղաքային մեծ դպրոցներն ունեն բուժկետ, ապա փոքր համայնքներում պատկերը փոքր-ինչ այլ է
Գեղարքունիքի մարզի Ջաղացաձորի միջնակարգ դպրոցի տնօրեն Կարինե Թադևոսյանը մեզ հետ զրույցում հայտնեց՝ բուժկետ չունեն, քանի որ դպրոցը փոքր է (14 աշակերտ ունի)։
«Գյուղում բուժկետ կա, որից հաճախակի օգտվում ենք։ Բժիշկները գալիս են, երեխաներին ու աշխատողներին զննում են։ Վերջին շրջանում ամեն օր բուժքույրը գալիս է դպրոց, երեխաները քիչ են, գալիս, զննում և գնում է։ Այսօր ոչ մի բացակա չենք ունեցել»,- ասաց Թադևոսյանը։
Արագածոտնի մարզի Ագարակ համայնքի միջնակարգ դպրոցից էլ մեզ հայտնեցին, որ դպրոցը բուժկետ չունի, քանի որ կա տարածքի հետ կապված խնդիր.
«Համայնքի ամբուլատորիայից բուժքույր է ամեն օր գալիս, իրականացնում է զննում, հաշվառում է հիվանդ երեխաներին և գնում։ 227 աշակերտից այսօր 10 բացակա ենք ունեցել, սակայն նրանցից 6-ն էին հիվանդ»։
Գեղարքունիքի մարզի Յա. Զարոբյանի անվան թիվ 2 հիմնական դպրոցից էլ ասացին, որ ունեն բուժքույրի կաբինետ, բայց այսօր, օրինակ, բուժքույրը դպրոցում ստուգում չի անցկացրել.
«Մեր դպրոցում շաբաթական 2 օր է գալիս բուժքույրը, աշակերտների թվաքանակի հետ կապված այդպես է պլանավորված։ Նա գալիս է, ջերմաչափում է անում, հիվանդներին տուն ուղարկում։ Բայց նախորդ շաբաթներին, երբ սուր-շնչառական հիվանդությունը շատ տարածված էր, ամեն օր գալիս էր բուժքույրը։ Բայց այսօր չի եկել, վաղը կգա։ Դպրոցի 107 աշակերտներից դասից բացակայել է 12-ը»։
Տավուշի մարզի Ազատամուտ համայնքի միջնակարգ դպրոցի տնօրեն Լիլիթ Ավետիսյանը մեզ հայտնեց, որ դպրոցը բուժկետ չունի, բայց տեղամասի քույրը երբեմն շրջայց է կատարում՝ հասկանալու, թե ինչ վիճակ է դպրոցում։
«Հունվարից սկսած ամեն օր ստուգումներ անում են, բայց օրինակ նոյեմբերին էդպես չի։ Այսօր 464 աշակերտներից 25-ն է բացակա՝ 17-ը հիվանդության պատճառով»,- ասաց Ավետիսյանը։
Մեր զանգած դպրոցներից նաև հայտնեցին, որ դասասենյակներն ավելի հաճախ են մաքրվում, ամեն ինչ փորձում են անել, որպեսզի վիրուսը նահանջի. «Եվ խոնավ, և չոր շորով մաքրում իրականացվում է»։ Այսինքն՝ այս պարագայում դպրոցները կարծես թե մեծամասամբ հետևում են ՀՀ առողջապահական և աշխատանքի տեսչական մարմնի հորդորներին և իրականացնում են մաքրման աշխատանքներ։
Իսկ ահա բուժքույր ունենալու հարցում ոչ բոլորն են «բախտավոր»։
Հարակից հրապարակումներ`
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ
