Բաբկեն Պիպոյան. Պետբյուջեից կամայական գումար պետք է ծախսվի ռացիոնալ
Կառավարության արտահերթ նիստում այսօր ընդունած 11-րդ միջոցառումն ավելի շատ ծաղրի ու քննադատության արժանացավ քաղաքացիների կողմից։ Սոցիալական ցանցերի օգտատերերի մեծ մասը նկատում են՝ երևի նման ընտանիքներ չգտնվեն, որոնք փետրվարին սպառել են մինչև 10 հազար դրամի գազ ու 5 հազար դրամի էլեկտրաէներգիա։
Կառավարության այս ծրագրի շահառուները հենց նման բաժանորդներն են, գործադիրը որոշել է բյուջեից վճարել նրանց պարտքի 50 տոկոսը, իսկ եթե արդեն վճարել են՝ ուրեմն այն կդառնա կանխավճար հաջորդ ամսվա համար։
Նույնսիկ գյուղերում, որտեղ մարդիկ վառարաններում փայտ ու աթար են վառում տները տաքացնելու համար, այսքան քիչ սպառում ապահովել այն էլ ձմռան ամսվա ընթացքում չեն կարող։ Այս անգամ էլ ստացվեց ռուսական հայտնի ասացվածքի պես։
Պաշտոնական տեղեկատվության համաձայն, այս ծրագրի շահառու է հանդիսանում 220 հազար բաժանորդ և 660 հազար քաղաքացի։
«Սա աջակցություն չէ, այլ աջակցության իմիտացիա է, սխալ շահառուներ են առանձնացվելու: Այդքան ծախսին մոտ են այն բնակարանները, որտեղ մարդը հիմնական չի բնակվում: Այսինքն՝ մարդու երկրորդ կամ երրորդ տունն է: Չշարունակեմ»,- ֆեյսբուքյան իր էջում նման գրառում է կատարել «Իրազեկ և պաշտպանված սպառող ՀԿ նախագահ Բաբկեն Պիպոյանը։
Panorama.am-ի հետ զրույցում սպառողների իրավունքների պաշտպանությամբ զբաղվող փորձագետը նկատեց, այո, այս ծրագիրն ինչ-որ չափով կարող է լուծել սոցիալական խնդիր, շահառուների թվում կլինեն մարդիկ, ովքեր դրա կարիքն իսկապես ունեն, առաջնային օգնության ենթակա խմբում կլինեն։
«Բայց այս որոշումն աջակցության դաշտ է ստեղծում այնպիսի անձանց համար, որոնց չարժե այս փուլում աջակցություն ցուցաբերել՝ հաշվի առնելով սոցիալ-տնտեսական իրավիճակն ու բյուջեի հնարավորությունները»,- ասաց Պիպոյանը։
Նա նկատեց, որ շահառուների առումով էլ կան դեռևս պատասխաններ չստացած հարցեր, տեղեկատվությունը թերի է, իսկ արտակարգ իրավիճակում նման ծրագրերը հանրային դաշտ բերելուց առաջ տեղեկատվությունը պետք է մանրակրկիտ կերպով տրամադրվի, ինչը չի արվել։
«Կամայական սոցիալական ծրագիր այս փուլում ողջունելի է, բայց պետք է դրանք արդյունավետ իրականացվեն։ Մենք մտնում են կառավարության դրության մեջ, հասկանում ենք, որ բյուջեի հնարավորությունները սահմանափակ են, այդ դեպքում, պետք է կամայական գումար ծախսվի խիստ ռացիոնալ»,- ընդգծեց ՀԿ նախագահը։
Նա մի օրինակ է, բերում, ենթադրենք մի ընտանիք, տունը տաքացնում է էլեկտրաէներգիայով, արդյունքում ամսական գազի սպառումը կազմել է 8 հազար դրամ, իսկ հոսանքինը՝ պայմանական 45 հազար դրամ, արդյունքում այս ընտանիքը 53 հազար դրամ ընդհանուր գումար է վճարում, և ունի այդ հնարավորությունը, իսկ պետությունից ստանում է 4 հազար դրամ, սպառած գազի գումարի 50 տոկոսը։
Միաժամանակ կարելի է դիտարկել մի ընտանիք, որը ծայրը ծայրին հասցնելով տունը ջեռուցելու համար ծախսել է 12 հազար դրամի գազ, նա փաստորեն չի դառնա սոցիալական խնդիր լուծելուն կոչված այս ծրագրի շահառու։
«Իրականում ճշգրիտ առաջարկություն անելու համար պետք է մի շարք թվեր ունենալ, բայց հեչ պարտադիր չէ գնալ Վրաստանի ճանապարհով, կարելի էր գնալ այլ ճանապարհով, բայց եթե որոշվել է գնալ այս ուղիով, ապա պետք էր ամեն ինչ անել՝ բացառելու անարդյունավետ ծախսը»,- նշեց նա։
Հարակից հրապարակումներ`
Լրահոս
Տեսանյութեր
Բագրատ Սրբազան. Ուրախ եմ, որ իմ կոչով դուրս են եկել փողոց ոստիկանները
