Կարեն Վարդանյան. Արժանապատվությունիցս ցածր եմ համարում Արսեն Թորոսյանի հետ գործ ունենալ
Առաջատար տեխնոլոգիաների ձեռնարկությունների միության գործադիր տնօրեն Կարեն Վարդանյանը չի պատրաստվում հայց ներկայացնել դատարան կամ դիմել ԱՆ անձնական տվյալների պաշտպանության գործակալություն։
«Ես արժանապատվությունիցս ցածր եմ համարում Արսեն Թորոսյանի հետ որևէ գործ ունենալ դատական մասով, իսկ գաղափարական ու փաստական մասով անպայման կպատասխանեմ»,- ասաց Վարդանյանը Panorama.am-ի հետ զրույցում։
Հիշեցնենք, որ նախարար Արսեն Թորոսյանը ֆեյսբուքյան իր էջում արձագանքել էր Կարեն Վարդանյանի հարցազրույցում հնչեցրած հայտարարություններին։
«Քիչ առաջ աչքովս ընկավ մի այսպիսի վերնագրով հարցազրույց`«Կորոնավիրուսը համաշխարհային մեծ բլեֆ է․ Եկել է վակցինա ծախելու ժամանակը»:
Հարցազրույցը ԱՏՁՄ գործադիր տնօրեն Կարեն Վարդանյանի հետ էր, ով էլ նման և այլ նմանատիպ անհեթեթ պնդումների հեղինակն էր:
Ցավում եմ, որ գիտության և գիտական ապացույցների վրա հիմնված մի ամբողջ ոլորտ կարող է ներկայացված լինել նման մտքեր արտահայտող անձի կողմից ու շատ եմ ցանկանում, որ պարոն Կարեն Վարդանյանը հանկարծ չվարակվի կորոնավիրուսային հիվանդությամբ, քանի որ հաշվի առնելով վերջինիս քրոնիկական հիվանդությունները, չի բացառվում հիվանդության խիստ բացասական ելքը»,- նշել էր Թորոսյանը։
Նրա գրառման ներքո բազմաթիվ օգտատերեր հիշեցրել էին անձնական տվյալների պաշտպանության, բժշկական գաղտնիքի հրապարակման, վիրավորելու անթույլատրելիության մասին։
«Որքան էլ Կարեն Վարդանյանը սխալ ու նաև միգուցե վտանգավոր քարոզ է անում, կարծում եմ նախարար Թորոսյանը պետք է ներողություն խնդրի՝ նրա առողջական վիճակին հղում անելով ոչ հարգալից պատասխանի համար»,- գրել էր օգտատերերից մեկը հենց նախարարի գրառման ներքո։
«Դուք նախարար ե՞ք, թե՞ վիրավորված կին։ Անձնական անկետայի տվյալներից բացի, ուրիշ արգումենտ չունե՞ք։ Ո՞ւր մնաց բժշկական էթիկան, դիմացինի առողջության վերաբերյալ ինֆորմացիայի հանրայնացումը ինչպե՞ս կորակեք»,- նախարարին արձագանքել էր մեկ ուրիշը։
Շատերն էլ Թրոսյանին նման գրառման համար քննադատեցին անձնական էջերում։
ԱՆ մամուլի խոսնակ Ալինա Նիկողոսյանից Panorama.am-ը հետաքրքրվեց՝ պատրաստվո՞ւմ է նախարարը ներողություն խնդրել Կարեն Վարդանյանից։
«Չեմ մեկնաբանում»,- ասաց Ա. Նիկողոսյանը։
Ձեռնարկությունների միության նախագահը նշեց՝ նման գրառամբ Թորոսյանն ինքն իրեն ոչնչացրել է։ «Ես հիմա գնամ իր մակարդակին հասնե՞մ, դա սխալ է»,- կրկնեց նա։
Կարեն Վարդանյանը նշեց՝ միշտ էլ իր կարծիքն է հայտնում, նաև հիմնավորում։
Panorama.am-ի հետ զրույցում էլ պնդեց, անիմաստ տեղը տնտեսությունը քայքայեցին, նաև իրենց կազմակերպության վրա է ստեղծված իրավիճակը բացասաբար անդրադարձել։
«Արսեն Թորոսյանը, երբ ինձ մեղադրում է ոչ պրոֆեսիոնալ լինելու համար, թող տեսնի իր «պրոֆեսիոնալիզմի» հետևանքները»,- նշեց Վարդանյանը՝ դիահերձում չիրականացնելու պարագայում կասկածի տակ դնելով կորոնավիրուսը՝ որպես մահվան պատճառ։
ԱՆ անձնական տվյալների պաշտպանության գործակալության պետ Գևորգ Հայրապետյանը հստակ պատասխան չունի՝ խախտվե՞լ է անձնական տվյալների պաշտպանության իրավունքը։
«Նման տեղեկությունները որևէ ձևով օգտագործելը, այդ թվում նաև հրապարակելը, անձնական տվյալի մշակում է։ Արդյո՞ք անձնական տվյալի մշակումն իրավաչափ է, թե՞ ոչ, հնարավոր չէ ասել առանց համապատասխան քննության, քանի որ պարզ չէ, թե ինչ աղբյուրներից է ստացել նման տեղեկություն։ Բազմաթիվ «ապա»-ներին պատասխանելու համար պետք է քննություն իրականացվի»,- Panorama.am-ի հետ զրույցում ասաց Հայրապետյանն ու ավելացրեց, քննություն կսկսեն, եթե Կարեն Վարդանյանը դիմի գործակալություն՝ առարկելով իր անձնական տվյալների հրապարակման դեմ։
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում