Ամերիկացի կոմպոզիտոր. Խաչատրյանի անվան մրցույթը մեծ իրադարձություն է համավարակով սահմանափակված աշխարհում
Այսօր մեկնարկում է Խաչատրյանի անվան 16-րդ միջազգային մրցույթը ջութակ մասնագիտությամբ։ Աշխարհում կորոնավիրուսի տարածման պայմաններում մրցույթն իրականացվում առցանց ձևաչափով՝ կիրառելով բարձր տեխնոլոգիաների ընձեռած հնարավորությունները։
Առցանց հարթակում հեռարձակված ասուլիսում մրցույթի ժյուրիի նախագահ‚ ՀՀ ժողովրդական արտիստ Էդուարդ Թադևոսյանն ընդգծեց, որ Արամ Խաչատրյանի անվան մրցույթն արդեն իսկ ունի իր ուրույն տեղն ու կշիռը միջազգային մրցույթներում։
Խաչատրյանի անվան միջազգային մրցույթի նախագահ, արտակարգ և լիազոր դեսպան, ՀՀ արվեստի վաստակավոր գործիչ Արմեն Սմբատյանի խոսքով, այն, ինչ կատարվում է այսօր Հայաստանում, այսինքն միջազգային մրցույթի մեկնարկը, շատ հետաքրքիր է։
«Հայաստանը կարողացավ գտնել համահունչ հնարավորություն, որ հնչի Արամ Խաչատրյանի երաժշտությունը, նաև ծանոթանան նոր արվեստագետների, անունների հետ»։
Նա նշեց, որ մրցույթի նկատմամբ հետաքրքրությունը մեծ է, ինչի մասին վկայում է մասնակցության աշխարհագրությունը։ Ա. Սմբատյանը կարևորեց այն փաստը, որ այս մրցույթի շնորհիվ աշխարհում շատ երաժիշտներ սովորել ու նվագում են Խաչատրանի Ջութակի կոնցերտը։
Մրցույթին մասնակցելու իրավունք է ստացել 19 ջութակահար։ Մասնակիցների աշխարհագրությունը լայն է‚ նրանք ներկայացնում են Թայվանը‚ Կորեայի Հանրապետությունը‚ Հոնկոնգը‚ Ռուսաստանը‚ Ֆրանսիան‚ Լյուքսեմբուրգը‚ Կանադան‚ Դանիան‚ Շվեդիան‚ Ճապոնիան‚ Ավստրիան‚ Հունաստանը‚ Հայաստանը։
Ժյուրիի անդամ կոմպոզիտոր, երաժշտական պրոդյուսեր Բոբ Լորդն (ԱՄՆ) ուրախ է մաս կազմել այս հիանալի ձեռնարկին։
«Սա մեծ իրադարձություն է համավարակով սահմանափակված աշխարհում»,- ասաց նա։
ՀՀ կրթության‚ գիտության‚ մշակույթի և սպորտի նախարար Արայիկ Հարությունյանը նշեց, որ Արամ Խաչատրյանը հայ մշակույթի խորհրդանիշներից է, այդ իսկ պատճառով նրա անվան մրցույթին մեծ նշանակություն են տալիս։
«Իհարկե, կորոնավիրուսը մեծ աղետ է ամբողջ աշխարհի համար, բայց ժամանակակից տեխնոլոգիաների միջոցով մրցույթն իրականացվելու է ու նոր շունչ է հաղորդվելու»,- նշեց Ա. Հարությունյանը։
Մրցույթը կկայանա երեք փուլով, կշարունակվի մինչև հունիսի 15-ին։ Սահմանված են հետևյալ մրցանակները. առաջին մրցանակակիրը կարժանանա 10000 ԱՄՆ դոլարին համարժեք դրամական պարգևի‚ երկրորդ տեղը զբաղեցրած մասնակիցը կպարգևատրվի 5000 ԱՄՆ դոլարին համարժեք դրամով‚ իսկ երրորդ մրցանակակիրը կստանա 3000 ԱՄՆ դոլարին համարժեք դրամական պարգև։ Կշնորհվեն նաև մի շարք հատուկ մրցանակներ‚ մասնավորապես՝ «Հանդիսատեսի համակրանք»‚ Լյուդվիգ վան Բեթհովենի ռոմանսի‚ Նիկոլո Պագանինիի կապրիսի լավագույն մեկնաբանության համար և այլն։ Ի դեպ‚ Լյուդվիգ վան Բեթհովենի ռոմանսները մեծ կոմպոզիտորի 250-ամյա հոբելյանի շրջանակներում ընդգրկված են մրցույթի 1-ին փուլում որպես պարտադիր ծրագիր։
Հատուկ մրցանակ է սահմանել նաև մրցույթի գործընկեր «Պարմա» ձայնագրման ընկերությունը. խաչատրյանական ստուգատեսի հաղթողը ձայնագրման պայմանագիր կկնքի «Պարմայի» հետ։ PARMA Recordings-ի գործադիր տնօրեն Բոբ Լորդը‚ որ նաև մրցույթի ժյուրիի անդամ է‚ հաջողություն է մաղթում բոլոր մասնակիցներին և նշում‚ որ իրենք պատրաստ են աջակցել նոր սերնդի տաղանդավոր երաժիշտներին։
Խաչատրյանի անվան միջազգային մրցույթը Միջազգային երաժշտական մրցույթների համաշխարհային ֆեդերացիայի (World Federation of International Music Competitions) անդամ է‚ մրցույթի կազմակերպիչն է «Արամ Խաչատրյան-մրցույթ» մշակութային հիմնադրամը։ Խաչատրյանի անվան միջազգային մրցույթը նպատակ ունի բացահայտել տաղանդաշատ երիտասարդ երաժիշտների, նրանց ընձեռել մասնագիտական առաջընթացի հնարավորություններ‚ ինչպես նաև մրցույթի միջոցով է՜լ ավելի հանրայնացնել Արամ Խաչատրյանի արվեստը։
Հարակից հրապարակումներ`
- Արամ Խաչատրյանի ծննդյան օրն է
- Խաչատրյանի անվան միջազգային մրցույթին կմասնակցի 13 երկրի 19 ջութակահար
- Խաչատրյանի 16-րդ միջազգային մրցույթը կանցկացվի առցանց