Փաշինյան. Բժշկական օգնության ուշացման պատճառով մարդ է մահացել կորոնավիրուսից
«Այսօրվա դրությամբ Հայաստանում շուրջ 200 կորոնավիրոսով հիվանդ քաղաքացի կա, ով սպասում է հոսպիտալիզացիայի ենթարկվելու իր հերթին, այսինքն` մեր առողջապահական համակարգն այսօր այնքան ծանրաբեռնված է աշխատում, որ հոսպիտալիզացիայի ենթակա հիվանդներին չենք հասցնում տեղավորել հիվանդանոցներում»,- պարետատան նիստից հետո կայացած ասուլիսում ասաց վարչապետ Նիկոլ Փաշինյանը։
Նա նշեց, որ արդեն ունեն դեպք, երբ բժշկական օգնության ուշացման պատճառով մարդ է մահացել կորոնավիրուսից. «Ընդ որում՝ ուշացման պատճառը երկակի է՝ հարազատները մի փոքր ուշացրել են հիվանդի վերաբերյալ ճիշտ տեղեկատվության փոխանցումն առողջապահական համակարգին, տեղեկատվությունը ստացվել է ուշացումով և ռեակցիան էլ է եղել ուշացում, դրա պատճառով մենք արձանագրել ենք այսպիսի թերևս առաջին մահը»։
Վարչապետը նշեց, որ երկու մահվան դեպք են ունեցել, երբ պացիենտը պետք է լիներ վերակենդանացման բաժանմունքում, բայց գտնվել է ընդհանուր բաժանմունքում վերակենդանացման բաժանմունքում տեղ չլինելու պատճառով։
Նա նշեց, որ այսօր պարետատան նիստին ընդհուպ մոտացել են քննարկումներով եզրին՝
որոշում կայացnել ու հայտարարել տոտալ և անվերապահ արգելափակում։
«Բայց քննարկումների արդյունքում տեսել ենք, որ այդ որոշումը չի բերելու ցանկալի արդյունքների, դա ցանկալի որոշում չէ ոչ միայն այն պատճառով, որ տնտեսական հետևանքները կլինեն ծանր, բայց առավել ևս այն պատճառով, որ մենք համոզված ենք և վերջին օրերի մեր իրականության մոնիտորինգը ցույց է տալիս, որ այդ կարանտինը չի պահվելու այն որակով, որ մեզ բերի ցանկալի որակի։ Գործ ունենք հակահաճարակային կանոնների համընդհանուր չպահպանման հետ, որը եթե հիմա Հայաստանի բնակավայրերի հատվածները փակենք, այդ չպահման պայմանները տեղափոխվելու են շենքեր, հարևանների տներ։ Հարված ենք հասցնելու տնտեսության ողնաշարին ու չենք ունենալու ցանկալի արդյունք, իսկ բացումից հետո վերադառնալու ենք օրը 500-700 նոր դեպքի։ Իսկ եթե տեսականորեն համարենք, որ մեր ժողովուրդն արդեն իրավիճակի լրջությունն այնքան է գնահատել, որ կպահի այդ կարանտինը, ուրեմն այդ նույն հնարավորությունն ունենք այս պահին և հիմա առանց որևէ վարչական լծակի գործադրման։
Բայց անկախ ամեն ինչի, մենք պետք է արձանագրենք, որ իսկապես հասել ենք կրիտիկական վիճակի, արդեն իսկ քայլում ենք դժոխքի միջով։ Սրա լուծումը գոնե միջնաժամկետ կարող է լինել միայն մի բան՝ իսկապես տոտալ հակահամաճարակային շարժում սկսվի Հայաստանում, մեզանից յուրաքանչյուրն առաջնորդվի այն կանխավարկածով, որ ահա այդ հիվանդանոցային տեղերի բացակայության և սակավության պատճառով կարող է մահանալ ինքը, իր հարազատը։ Մեզանից յուրաքանչյուրը պետք է առաջնորդվի այն կանխավարկածով, որ ինքը վարակված է ու չպետք է վարակի ուրիշներին»,- ասաց Ն. Փաշինյանը։
Նրա խոսքով, այս իրավիճակից ունենք մի ելք. «Թեկուզ դժոխքի միջով քայլելով, պետք է դուրս գանք հակառակ կողմից և դա կարող ենք անել հակահամաճարակային կանոնները ոչ միայն տոտալ պահպանելով, նաև հակահամաճարակային շարժմանը ամենաակտիվ ու հնարավոր մասնակցություն ցուցաբերելու միջոցով՝ ընդհուպ չեզոքացնելով հակահամաճարակային հակաքարոզչության բոլոր միջոցները»։
«Հասել ենք այն եզրին կամ արդեն իսկ հատել ենք այդ եզրը, որից այն կողմ դժոխային իրավիճակ է։ Բայց ուզում եմ ասել, որն է կառավարության անելիքն այս իրավիճակում։ Անում ենք երկու քայլ՝ ուղիղ, անկեղծ, առանց որևէ մի նրբություն թաքցնելու խոսել ու հաղորդակցվել ժողովրդի հետ, ներկայացնել ճշմարտությունը, երկրորդ՝ բոլոր հնարավոր միջոցները ձեռնարվում են հիվանդանոցային, մահճակալային, վերակենդանացման տեղեր ավելացնելու համար»,- ասաց Նիկոլ Փաշինյանը։
Հարակից հրապարակումներ`
- 06.06.2020. Մեկ օրում կորոնավիրուսից 7 հիվանդ է մահացել
- Հունիսի մեկի դրությամբ մենք մահացության շատ ավելի լավ ցուցանիշ ունենք, քան 2019 թվականին. Վարչապետ
- Բոլոր դեպքերում կա անհատական տվյալների պաշտպանության խնդիր, բայց մյուս կողմից կա հանրային շահ.Փաշինյան
- 05.06.2020. 596 նոր դեպք և 8 մահ
- 04.06.2020. Կորոնավիրուսով 15 հիվանդ է մահացել
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին