Ձեր վստահելի աղբյուրը

Ապրիլ ամսվա ընթացքում գրանցված աշխատողների կրճատման թիվն ավելի քան 12 000 է եղել։ Այս մասին այսօր տեղի ունեցած ասուլիսում հայտարարեց Պետական եկամուտների կոմիտեի հարկ վճարողների ընթացիկ հսկողության հարկային տեսչություն-վարչության պետի տեղակալ Արթուր Հակոբյանը՝ ներկայացնելով 2020 թվականի հունվար-մայիսին պետական բյուջեի հարկային մուտքերի ցուցանիշները:

Վարչության պետը հայտնեց, որ շատ հարկ վճարողներ չեն ազատել իրենց աշխատակիցներն, բայց քանի որ ապրիլ ամսին տնտեսական գործունեության սահմանափակումների ակտիվ ամիսն էր՝ աշխատավարձ չի հաշվարկվել և եկամտի հարկման զրոյական բազա է կիրառվել 74 հազարից ավելի աշխատակիցների համար:

Բանախոսը հայտնեց, որ եկամտային հարկի գծով միայն ապրիլ ամսին՝ մարտի համեմատ շուրջ 2.6 մլրդ դրամի պակաս հավաքագրում է եղել: Շրջանառության հարկի գծով ևս արձանագրվել է նվազում 7 տոկոսի չափով և այն, ըստ Արթուր Հակոբյանի, միայն համավարակով պայմանավորված չէ, այլ այն հանգամանքով, որ 2020 թվականից մինչև 24 մլն շրջանառություն ունեցող ընկերություններն  ազատվել են որոշակի հարկեր վճարելուց:

ՊԵԿ պաշտոնյան նշեց, որ համաճարակի պայմաններում էլ ոչ պակաս հետևողական են եղել հարկ վճարողների պարտականությունների կատարման գործընթացի վերահսկողության առումով:

Արթուր Հակոբյանի խոսքով, մարտ-ապրիլին իրականացվել է 3565 թեմատիկ ստուգում, որից 2743-ը եղել է ՀԴՄ կիրառության կանոնների ուղղությամբ և արձանագրվել է 1739 խախտման դեպք:

Չգրանցված աշխատողներին արձանագրելու նպատակով իրականացվել է 329 ստուգում, որոնց արդյունքում հայտնաբերվել է 406 չգրանցված աշխատող: Միայն հսկիչ դրամարկղային կտրոնների տրամադրման ուղղությամբ, ըստ ՊԵԿ պաշտոնյայի, ապրիլ ամսին կատարվել է 864 ստուգայց, որից 596-ի դեպքում արձանագրվել են խախտումներ:

Արթուր Հակոբյանը նաև հայտնեց, որ 2020 թվականի առաջին եռամսյակում 1000 խոշոր հարկ վճարողները պետական բյուջե են մուծել 245.6 մլրդ դրամ, որը 24.6 մլրդ դրամով, կամ 11 տոկոսով ավել է 2019 թվականի նույն ժամակահատվածի համեմատ։

Բանախոսը հավաստիացրեց, որ այն միայն առաջին եռյակի, կամ հնգյակի հավելյալ վճարները չեն, այլ ապահովվել են ամբողջ 1000 վճարողներից համաչափ:

«Օրինակ 100-րդ հորիզոնականի հարկ վճարողն 13 տոկոսով ավելի հարկ է վճարել, քան նախորդ տարի 100-րդ հորիզոնականի հարկ վճարողը: Ստորին շեմը՝ 1000-րդ հարկ վճարողը շուրջ 10 տոկոսով ավելի հարկ է վճարել, քան նախորդ տարի այդ նույն հորիզոնականը զբաղեցրածը»,- նկատեց բանախոսը:

Արթուր Հակոբյանը հայտնեց, որ հունվար-մայիս ամիսներին ՊԵԿ-ը հավաքագրել է 583.6 մլրդ դրամ, իսկ նախորդ տարվա նույն ցուցանիշը 581 մլրդ դրամ է եղել: Այսինքն, ըստ բանախոսի, այս տարի 2,2 տոկոսով ավելի է հավաքագրվել նախորդ տարվա 5 ամիսների համեմատ:

«2.2 տոկոս աճը բավականին հեռու է մեր հիմնավորված ակնկալիքներից և առանձին հարկերի գծով և առանձին ամիսներին գրանցվել է նաև նվազումներ»,- հայտնեց Պեկ պաշտոնյան և տեղեկացրեց, որ ԱԱՀ-ի գծով նախորդ տարվա համեմատ նվազումները ապրիլին կազմել է շուրջ 16 տոկոս, իսկ մայիս ամսին՝ 24 տոկոս:

Արթուր Հակոբյանը, սակայն հույս հայտնեց, որ հոնիսին ավելի լավ ցուցանիշ կլինի, քանի որ այդ երկու նվազումները եղել են տնտեսական գործունեության սահմանափակումների պատճառով:

Եկամտային հարկի գծով նույնպես կա պակաս հավաքագրում, որը սակայն, ըստ բանախոսի, կապված է 2020 թվականի հունվարից ուժի մեջ մտած համահարթ 23 տոկոս դրույքաչափով, որը փոխարինեց նախկին 28 և 36 տոկոսներին:

Պատասխանելով հարցին, թե ինչո՞ւ «Զանգեզուր»-ի պղնձամոլիբդենային կոմբինատն այս անգամ հնգյակում չէ՝ Արթուր Հակոբյանը նշեց, որ այն պայմանավորված է պղնձի գնի անկմամբ և հարկային պարտավորությունների հետաձգմամբ, որոնք պետք է կատարվեին մարտին և հավաստիացրեց, որ որևէ ապառք չկա: