Ձեր վստահելի աղբյուրը

Մարդու իրավունքների եվրոպական դատարանում Սահմնադրական դատարանի նախագահի ու դատավորների ներկայացուցիչ Սիրանույշ Սահակայանը երեկ հայտարարեց, որ Եվրոպական դատարանը, հաշվի առնելով խախտումների բնույթը և բարձրացված հարցերի կարևորությունը, հանձնառել է գործի անհապաղ քննություն։

Panorama.am-ը ՀՀ շատ քաղաքացիների շահերը ՄԻԵԴ-ում ներկայացրած ու հաղթանակ գրանցած փաստաբան Արա Ղազարյանից հետաքրքրվեց, թե ո՞ր դեպքերում է Եվրոպական դատարանն առաջնահերթ ճանաչում դիմումներն ու անհապաղ քննություն սկսում։

«Դիմումն անհապաղ քննության վերցվում է, երբ կա  Կոնվենցիայի լուրջ բնույթի խախտում կամ էլ երկրի ներսում համակարգային բնույթի լուրջ խնդիր՝ օրենքներում կամ պրակտիկայում։ Այս երկու հարցերից յուրաքանչյուրը գործին տալիս են առաջնահերթություն»,-ասաց փաստաբանը։

Նրա խոսքով, պրիորիտետ ճանաչված գործերը քննվում են մեկ-երկու տարվա ընթացքում, մինչդեռ այս դեպքում  օրերի հարց է։

Հիշեցնենք, որ ըստ Սիրանույշ Սահակյանի,  հուլիսի 2-ին Հայաստանի Կառավարությանը ՄԻԵԴ-ի կողմից ուղղվել են մի շարք հարցեր, կողմերին տրամադրել դիրքորոշումներ ներկայացնելու ժամկետներ։ Այդ նպատակով Եվրոպական դատարանն արդեն իսկ սահմանել է նոր ժամկետ՝ սույն թվականի օգոստոսի 28-ը։

«Սա բավականին զարմանալի է։ Սովորական գործերով այս փուլին հասնում են 5-6-րդ տարում, իսկ առաջնահերթ ճանաչված գործերով՝ հիմնական երկրորդ տարում ամենաքիչը, բայց մենք տեսնում են այդ գործընթացը տեղի է ունենում օրերի ընթացքում։ Պատկերացնո՞ւմ եք՝ որքան լուրջ է ՄԻԵԴ-ն ընդունել այդ գործը»,-ասաց Ղազարյանը՝ ավելացնելով, որ կառավարություններին հիմնականում երկու տարիների ընթացքում հարցեր չեն ուղարկվում։

Հարցին, թե անահապաղ քննություն նշանակելիս ՄԻԵԴ-ը հատկապես ո՞ր հիմքով է՝ կոնվենցիայի լուրջ խախտո՞ւմ, թե՞ համակարգային խնդրի առկայություն, առաջանորդվել, փաստաբանը հստակ պատասխանել դժվարացավ։

«Երկու խնդիրն էլ, ըստ էության կա, քանի որ տեղի ունեցածը ոչ թե մեկ պաշտոնատար անձի չիմացության արդյունքում  խախտում էր, այլ տարբեր պետական մարմիններ կազմակերպված կերպով խախտումներ են թույլ տվել։ Սա համակարգային խնդիր էլ կարող է դիտարկվել, խոսքը Սահմանդրության նորմերի շրջանցման մասին է»,-նշեց նա։

Նման տեմպով քննության իրականացման պարագայում ՄԻԵԴ որոշումը կարելի է ակնկալել ամիսների ընթացքում։

«Գիտե՞ք, իմ 18 տարվա պրակտիկայում նման արագությամբ քննության երբեք ես չեմ հանդիպել։ Նույնիսկ առաջնահերթություն ստացած գործերով։ Արդեն ֆիզիկապես հարցեր են կոմունիկացվել։ Իսկապես այստեղ ամեն ինչ շատ արագ է ընթանում, ինձ թվում է այս գործի քննությունն ամիսներ կտևի»,-ասաց Ղազարյանը։

Փաստաբանից հետաքրքրվեցինք, հիմնվելով ՄԻԵԴ նախադեպային վճիռների վրա, կարո՞ղ է գործի ելքի վերաբերյալ ենթադրություններ անել։ Ղազարյւանն ասաց՝ վստահ է, որ դատավորները կշահեն այս գործը։

Հարցին, ենթադրվո՞ւմ է ՄԻԵԴ-ի որոշումը կլինի այս իշխանությունների օրոք,  փաստաբանն արձագանքեց.

«Ես չգիտեմ, այս իշխանությունները դեռ որքան կմնան, չեմ կարող ասել։ Բայց սովորաբար իշխանությունները մտածում են՝ մենք արեցիքն, մինչև ՄԻԵԴ-ը որոշում կայացնի, կանցնեն տարիներ։ Վերջին 5-6 գործերը, որ ես շահել եմ, որոշումը եղել  է դիմումը ներկայացնելու  9-10-րդ տարում։ Այո, իշխանությունները որպես կանոն նման հաշվարկ անում են, բայց երբեմն, ինչպես ասում են, շաբաթը ուրբաթից շուտ է գալիս»,-ասաց Ղազարյանը։