Ձեր վստահելի աղբյուրը

Արցախի «Կատարո» գինու գործարանը ստորագրված փաստաթղթի հետևանքով անցնելու է թշնամու հսկողության տակ, քանի որ այն գտնվում է Հադրութի շրջանի Տող գյուղում։

«Փաստինֆո»-ն Հայաստանի գործատուների միության նախագահ, տնտեսագետ Գագիկ Մակարյանից փորձել է հասկանալ՝ տնտեսական ինչ հետևանքներ կարող է դա ունենալ և հայտնի է, թե նման քանի գործարան, արտադրամաս է անցնելու թշնամու հսկողությանը։

Գագիկ Մակարյանը նկատել է՝ մենք ոչ միայն գործարան ենք տալիս, այլ 30 տարում կառուցված մի շարք այլ կառույցներ։

«Պետք է որոշակի պայմանավորվածությունների ռեժիմ լիներ, որոշակի ժամկետ լիներ, որ գոնե կարողանային դեմոնտաժ անել։ Այդ գործարանները կարելի էր 15 օրում կամ մեկ ամսում դեմոնտաժ անել բերել։ Այդտեղ պետությունը պետք է շահագրգռված լինի։ Արցախի Հանրապետությունը պետք է ուժեր տրամադրի, որովհետև միայն մասնավորի վրա թողնելը դժվար է։ Մասնավորն էլ այս դեպքում տուժում է, որովհետև այդքան ներդրումներ է արել ու թողնում է այնտեղ»,-նշել է Գագիկ Մակարյանը՝ հավելելով, որ վատ պատմությունները դեռ նոր են ի հայտ գալու։

Տնտեսագետը նշել է, որ Արցախն արդյունաբերական քիչ օբյեկտներ ուներ և շատ քիչ գործարաններ էին մնացել։ Գագիկ Մակարյանի դիտարկմամբ վերջին տարիներին Արցախի գյուղատնտեսությունը, արդյունաբերությունն էական զարգացում չի ապրել և եղած գործարանները կարևոր են, աշխատատեղերի, տեղական տուրքերի, բյուջեի համար.

«Արցախը հատուկենտ գործարաններ ունի, դրա համար գրեթե ամեն ինչ Հայաստանից էին ներկրում։ Տեղական արտադրանք գրեթե չկար։ Կան բազմաթիվ փոքր ձեռնարկություններ, որոնք պահածոներ են արտադրում, որոշակի հյութեր, միկրո կամ կենցաղային մակարդակի արտադրանք։ Արցախում մոտ 40 փոքր ձեռնարկություն կա, որոնք որոշակի պոտենցիալ ունեն։ Դրանք էլ հիմնականում Ստեփանակերտում են, բայց իրենց վերամշակման տարածքները որոշակիորեն ընկնում են այդ տարածքների մեջ։

Այսինքն տուժելու են»,- ասել է Գագիկ Մակարյանը։