Ձեր վստահելի աղբյուրը

Բերձոր քաղաքում այսօր առավոտից բնակիչները մտահոգված են, տարակուսած, միմյանց տեսնելիս առաջինը հարցնում են՝ Բերձո՞րն էլ են տալիս։ Հարցի պատասխանն ավելի շատ ակնկալում են լսել ոչ թե մտերիմներից, բարեկամներից, համաքաղաքացիներից, այլ պատասխանատու ու պաշտոնատար անձանցից, որոնք ավաղ այս օրերին քար լռություն են պահպանում։

«Բերձորում այսօր ես եղել եմ  խանութում, պոլիկլինիկայում, նաև այլ տեղերում։ Մարդիկ իրար հարցնում են՝ Բերձո՞րն էլ ենք տալիս»,-Panoorama.am-ի հետ զրույցում պատմեց քաղաքի մի բնակչուհի։

Քաղաքագետ Արմեն Աղայանն էլ ֆեսյբուքյան իր էջում գրել է. «Բերձորի բնակիչներին հրամայված է մինչև նոյեմբերի 30֊ը լքել տները։ Բանակի մնացորդները, Ստեփանակերտը և մնացած գյուղերը մնացին պատանդ»։

Այսօրվանից Հայաստանն Արցախին կապող միակ ճանապարհը կանցնի Քաշաթաղի շրջանի Բերձոր քաղաքով։  Շրջանի 54 համայնքերից 52-ը, ըստ կառավարության էջում  հրապարակված ցանկի, կանցնի Ադրբեջանին»։

Բերձորցիները նշում են, քաղաք են եկել Քաշաթաղի հյուսիսային գյուղերից տարհանված ընտանիքներ, հիմա ի՞նչ է լինելու թե իրենց, թե ներքին տեղահանվածների խնդիրը։

Հիշեցնենք,  որ Նիկոլ Փաշինյանի կողմից ստորագրած հայտարարության համաձայն,  Լաչինի շրջանը՝ մինչև 2020 թ. դեկտեմբերի 1-ը կանցի Ադրբեջանին։  Լաչինի միջանցքը (5 կմ լայնությամբ), որը կապահովի Լեռնային Ղարաբաղի կապը Հայաստանի հետ և միևնույն ժամանակ չի շոշափի Շուշի քաղաքը, մնում է Ռուսաստանի Դաշնության խաղաղապահ զորախմբի վերահսկողության տակ:

Սակայն Քաշաթաղին հարակից Քարվաճառն Ադրբեջանին հանձնելուց հետո դեպի Բերձոր ճանապարհն անորոշ ժամանակով ու տարածքով բաց է մնում թշնամու զինված ուժերի առաջ։ Դեռ հստակ էլ չէ, թե որտեղ են տեղակայվելու ՌԴ խաղաղապահ ուժերը։

Բնակիչներից մեկը մեզ հետ զրույցում ասաց, եթե թշնամուն են հանձնում Ներքին Սուս ու Քարեգահ գյուղերը, ապա ավելորդ է խոսել 5 կմ լայնությամբ ճանապարհի մասին, այդ գյուղերը հանձնելու դեպքում ճանապարհն ավելի նեղ է լինելու, իսկ Արցախում գտնվող մեր հայրենակիցներն ու զինծառայողները թշնամու ձեռքին կմնան պատանդի կարգավիճակում։

Բերձորի քաղաքապետ Նարեկ Ալեքսանյանը Panorama.am-ի հետ զրույցում Բերձոր քաղաքն ու հարևանությամբ գտնվող Աղավնո գյուղը հանձնելու մասին տարածված խոսակցություններն ու մտահոգություններն անհիմն է որակում, նպատակն էլ համարում է խուճապի տարածումը։

«Ամեն դեպքում այս պահին խոսակցությունների մակարդակ է, պաշտոնական ոչինչ չկա։ Կառավարության հրապարակած ցանկում ոչ Բերձորի, ոչ էլ Աղավնոյի անունները չկան։ Չգիտեմ, ինչու սկսեց թեման արծարծվել, շոշափվել թե ֆեյսբուքյան գրառումներում, թե այն բերձորցիների շրջանում, որոնք ակս պահին գտնվում են Հայաստանի Հանրապետությունում։, ինչպես նաև Բերձորում գտնվող քաղաքացիների շրջանում»,-ասաց Ալեքսանյանը։

Քաղաքապետն այս պահին Բերձորում է։ Տարածված մտահոգությունների մասին խոսել է Քաշաթաղի շրջանի ղեկավար Մուշեղ Ալավերդյանի հետ։

«Շրջանի ղեկավարը, ինչքանով ես եմ տեղյակ, հարցը բարձրացրել է ավելի բարձր մակարդակում, ասել են, որ նման բան չկա։ Համենայն դեպս, նման բան չկա։ Բերձորը մեծ քաղաք է, մենք պետական աշխատակիցներին հորդորել ենք մեկ շաբաթ առաջ վերադառնալ աշխատանքի, փորձենք բնականոն հունով ապրել։ Ահագին մարդ մեր հորդորով վերադարձել է։ Կարծում եմ, եթե նման բան լիներ, չէին թողնի վերջին օրով ասեին»,-ասաց քաղաքապետ Ալեքսանյանը։

Հիշեցրեցինք, որ Մարտակերտի մի քանի գյուղերի բնակիչներին հենց մեկ օր առաջ տեղյակ պահեցին գյուղերը լքելու անհրաժեշտության մասին։ Նարեկ Ալեքսանյանը չի կարծում, Բերձորի հետ նույնը կպատահի։ Քաղաքի 1700 բնակչության կեսը հիմաայնտեղ է, Ադրբեջանին հանձնվելիք հյուսիսային գյուղերի բնակիչներից շատերին էլ հենց այստեղ են տեղավորվել համայնքին ու պետական նշանակության շենքերում, այս պահին դռները փակ սեփական տներում։

«Նրանք մնալու տեղ չունեն։ Եկել են, վեշերը տեղավորել են, սեփականտերերին խնդրել ենք, բանալիները տվել են, մարդկանց տեղավորեն, ի՞նչ անենք»,-նշում է քաղաքապետը։

Քաշաթաղի շրջանի ղեկավար Մուշեղ Ալավերդյանը, Արցախի նախագահ Արայիկ Հարությունյանի խոսնակ Վահրամ Պողոսյանն անպատասխան թողեցին երկարատև ու բազմաթիվ զանգերը։