Ձեր վստահելի աղբյուրը

«Կարող էի պահանջս գրել տանից, ֆեյսբուքյան իմ էջում և դուխով հայտարարություններ անել, դա մի բան է և մեկ այլ բան է վարչապետի աչքերի մեջ նայելով՝ պահանջել նրա հրաժարականը»,-հիմնավորելով խորհրդարանական աշխատանքները չբոյկոտելու իրենց գործողությունները՝ ճեպազրույցի ժամանակ հայտնեց «Լուսավոր Հայաստան» խմբակցության ղեկավար էդմոն Մարուքյանը:

Ըստ պատգամավորի կանխատեսումների, ամենաուշը  6 ամսից տեղի են ունենալու արտահերթ ընտրություններ, բայց կարող է  և սխալվի:

«Կգա հունիս-հուլիս ամիսները և կքննարկենք, թե ինչու դա տեղի չունեցավ: Քաղաքական գործիչները մի բան են կանխատեսում, հետո, եթե այն տեղի չի ունենում, ասում են թե ինչու այն տեղի չունեցավ»,- հայտնեց Մարուքյանը և նկատեց, որ Հայաստանի քաղաքական պատմության մեջ մեկ դեպք է եղել, երբ ընդդիմության պահանջով ինչ-որ բան է եղել և այն 2018 թվականին Սերժ  Սարգսյանի  հրաժարականն է եղել:

Նա հայտնեց, որ նոր ընտրությունների գնալու մասին իշխանությունների հետ  որևէ քննարկումներից տեղեկություններ չունի:

«Եթե խոսքը գնում է ընտրական նոր օրենսգիրքն ընդունելու և հետո նաև ընտրությունների գնալու մասին, ապա, բնականաբար, քննարկումենր պետք է լինեն, որովհետև խաղի կանոնները պետք է պարզ լինեն բոլոր խաղացողների համար»,-հայտնեց Մարուքյանը:

Ըստ պատգամավորի, եթե ընդունվի նոր ընտրական օրենսգիրք, ապա  ընտրությունները պետք է անցկացվեն 6 ամիս հետո, որը Վենետիկի հանձնաժողովի պահանջ է, իսկ եթե օրենքը չի փոխվում, ապա վաղն էլ կարող է լինել ընտրություն:

Էդմոն Մարուքյանի խոսքով, ընտրությունների խաղի կանոնների մեջ է մտնում մեդիայով բոլորին հավասար պայմաններ ապահովելը, և մեկ կուսակցության կողմից մի քանի միլիոն դոլարով մյուսի ձայնի լռեցման բացառելը: 

Էդմոն Մարուքյանը կարծում է, որ միայն «Լուսավոր Հայաստանը» կարող է անցկացնել արդար ընտրություններ, քանի որ բացի իրենցից ոչ մեկին չեն վստահում:

«Եթե հիմա ինչ-որ մարդիկ, ինչ-որ տեղ, ինչ-որ  մարդկանց սպառնում են և կառավարությունը չի կարողանում այդ մարդկանց ձերբակալի, կամ չի էլ գտնում այդ մարդկաց, ես կարո՞ղ եմ հույս ունենալ, որ ինչ-որ մեկը, որը ընտրակաշառք է բաժանում, այդ մարդուն բռնելու են: Դրա համար պետք է լինի երաշխիքներ՝ անկախ նրանից, թե ով է կազմակերպելու ընտրությունները, որպեսզի բոլորը վստահ լինեն արդյունքների մեջ»,- հայտարարեց պատգամավորը:

Նա հայտնեց, որ «Լուսավոր Հայաստան»-ը ԲՀԿ-ի հետ վայր չի դնի մանդատները, իսկ իրենք գնացել են կառավարության հետ հարցուպատասխանի, քանի որ բարձրացրել են ժողովրդին հուզող հարցերը՝ ասելու որ սահմանների դեմարկացիա է կատարվում GPS-ով, Լաչինի մջանցքով զենք, զինամթերք կարո՞ղ է անցնել, թե ոչ:

Պատասխանելով Արցախի Հանրապետության անկախության ճանաչման հարցին՝ պատգամավորը հայտնեց, որ պետական գաղտնիք պարունակող հանգամանքներ կան գործընթացում, դրա համար էլ չի մեկնաբանի, բայց հայտնեց, որ նման քայլեր համապատասխան մարմինների հետ արդեն մեկ ամիս է ինչ սկսել են: