Վարդան Ոսկանյան. Փաշինյանն անհապաղ պետք է հեռանա, նա և ապիկար է, և դավաճան
«Քաղաքական գնահատականն այն է, որ Փաշինյանը և դավաճան է, և ապիկար։ Ըստ էության, նա չի կարողացել իրականացնել իր հիմնական գործառույթները, և դրանց չիրականացումը բերել է դավաճանական համաձայնությունների կայացման թշնամական կողմի հետ»,- Panorama.am-ի հետ զրույցում հայտարարեց իրանագետ, ԵՊՀ դոցենտ, բանասիրական գիտությունների թեկնածու Վարդան Ոսկանյանը։
Նա մանրամասնեց, Փաշինյանի ու Ադրբեջանի միջև ձեռք բերված համաձայնության հետևանքով Հայաստանը ոչ միայն կորցրել է Արցախի մի մասը, այլև ԼՂ խնդիրն ունի մշուշոտ ապագա, փորձ է արվում այդ հիմնախնդիրը մոռացության մատնել, որովհետև այսօր Հայաստանում ստեղծվող նոր խնդիրները թույլ չեն տալիս հիշել արցախյան հիմնախնդրի գոյության մասին։
«Հետևաբար, այս իշխանությունը թե ապիկար է, թե դավաճան։ Նիկոլ Փաշինյանը պետք է անհապաղ հրաժարական տա»,- ասաց ԵՊՀ դասախոսը։
Նա հիշեցնում է, որ արտահերթ ընտրությունների անցկացման պահանջը դրվել է մտավորական խավի կողմից, դրա հեղինակային իրավունքն ամենևին Փաշինյանինը չէ, բայց ընտրությունները պետք է անցկացվեն մի կարևոր պայմանի՝ այն է նրա անհապաղ հրաժարականի ու նրան իշխանությունից հեռացնելու դեպքում։
«Լինելով պարտության մարմնավորում՝ այս իշխանությունը՝ ի դեմ այդ իշխանության առաջին դեմքի, ունակ չէ կազմակերպելու ընտրական գործընթաց պետության ներսում՝ հաշվի առնելով վստահության այն հսկա դեֆիցիտն ու պակասը, որն ունի այդ իշխանությունն ու հատկապես դրա առաջին դեմքը։ Մի շատ կարևոր հանգամանք պետք է հաշվի առնել։ Եթե Նիկոլ Փաշինյանն իրեն համարում է ժողովրդի կամքի ազատ արտահայտման երաշխավոր, ապա ակնհայտ է, որ նա իր կառավարման ընթացքում, հատկապես պատերազմյան ու հետպատերազմյան իրավիճակում չի կարողացել այդ երաշխավորը լինել»,- մանրամասնեց Ոսկանյանը։
Նա հիմնավորեց, որևէ մեկը չի կարող պնդել, թե հայ ժողովրդի կամքն է արտացոլված նոյեմբերի 9-ի չարաբաստիկ հայտարարության մեջ, կամ հայ ժողովրդի կամքն է արտահայտված ամեն օր Հայաստանի՝ մասնավորապես Սյունիքի, Գեղարքունիքի մարզերի տարբեր հատվածներ թշնամուն հանձնելու մեջ։
«Ընդ որում այդ գործընթացներն ուղղակիորեն բացասական ազդեցություն են ունենում մեր բնակիչների կյանքի, կենսագործունեության վրա, ավելի լայն իմաստով նաև Հայաստանի հետագա կենսունակության վրա։ Տեսեք Սյունիքում կատարվածը, որտեղ Նիկոլ Փաշինյանը չկարողացավ երաշխավորել չորս կիլոմետրանոց հատված։ Իսկ այդ ճանապարհը շատ կարևոր է թե ներհայաստանյան կոմունիկացիան ապահովելու նպատակով, թե Հայաստանի համար կենսական նշանակություն ունեցող Իրանի հետ հարաբերությունների առումով։ Ըստ էության, այժմ Հայաստանի վարչապետի աթոռը զբաղեցնող մարդը ոչ միայն չի կարողացել ապահովել Սյունիքի բնակչության կամքն ու ցանկությունը, այլև չի կարողացել ապահովել Հայաստանի անվտանգությունը՝ հաշվի առնելով Հայաստան-Իրան ցամաքային կապի կարևորագույն նշանակությունը մեր պետության համար»,- նշեց իրանագետը։
Վարդան Ոսկանյանը շեշտեց, որ արտահերթ ընտրություն կազմակերպելու ունակություն այս իշխանությունը չի կարող ունենալ, դրա վառ ապացույցն էին լրատվամիջոցներում հրապարակված տեղեկությունները, որ դեպի Եռալուր սգո երթի բազմամարդ լինելու համար կիրառվել էր վարչական ռեսուրս, եղել էր վարչական ռեսուրսի ներգրավում։
«Որևէ մեկը կարո՞ղ է բացառել, եթե նման վարչական ռեսուրս կիրառվում է սգո երթի համար, նույն ռեսուրսը չի կիրառվի արտահերթ ընտրությունների անցկացման դեպքում։ Ակնհայտ է, որ Նիկոլ Փաշինյանը չի կարող կազմակերպել ազատ, արդար, թափանցիկ ընտրություններ։ Նման ընտրություններ կազմակերպելու համար անհրաժեշտ է ոչ շահագրգիռ, այլ խոսքով արբիտրային գործառույթներ իրականացնող անձ և կողմ։ Այդպիսի անձ արդեն իսկ առաջադրվել է ընդդիմության կողմից։ Նա ՀՀ առաջին վարչապետ Վազգեն Մանուկյան է, որը ստանձնելով վարչապետի պաշտոնը, չառաջադրվելով այդ ընտրություններում իրականացնելու է արդար ու օբյեկտիվ արբիտրի գործառույթ, որը կարծում եմ, ցանկացած տրամաբանող մարդու համար ընդունելի տարբերակ է»,-ասաց գիտնականը։
Նա ցավով փաստեց, որ Հայաստանը երբիցե չի ունեցել անվտանգության նման ցածր մակարդակ, բնակչության մեջ չկա անվտանգության զգացում։
«Եթե ԱԱԾ-ն հայտարարում է, որ Սյունիքում ճանապարհ անցնելու ընթացքում պետք է ունենալ հեռախոսահամար, որ գերի ընկնելու դեպքում զանգահարեք, ապա դա ցույց է տալիս, որ բնակչության շրջանում չի կարող լինել անվտանգության զգացումը, ուր մնաց դա լինի պետական սահմանների ու ընդհանրապես պետության՝ որպես մարմնի, որպես տվյալ ազգի բարձրագույն արժեքի պարագայում։ Անցած երկուսուկես տարիներին անվտանգային որևէ խնդիր չի ապահովվել։
Մենք այժմ նաև պետական ստի ու կեղծիքի քարոզչության համատեքստում ու դրա հետևանքով ոչ միայն չենք կարողանում հասարակական շրջանակներին հասցնել անվտանգության կորուստը, այլև նույն այդ քարոզչամեքենան փորձում է դա հիմնավորել, այն կարծես լինի ադրբեջական քարոզչամեքենայի մաս։ Փոխարեն հակադարձելու, փաստացիորեն հիմնավորում է թշնամական կողմի գործողությունները՝ մեր հասարակության գիտակցության մեջ փորձելով սերմանել սխալ ու թշնամու համար հաճելի, ըստ էության թշնամահաճո գաղափարներ ու մտքեր։ Սա թե դավաճանության, թե ապիկարության հետևանք է»,- նշեց նա։
Լրահոս
Տեսանյութեր
Սամվել Վարդանյանի նկատմամբ կատարվել է ծանր հանցագործություն. Խուդոյան
