Ձեր վստահելի աղբյուրը

Robomart ընկերության բազմազգ առաջնորդների թվում հայ տեխնոլոգիական մասնագետ կա։ Տիգրան Շահվերդյանը «Գիտուժ» նախաձեռնության ակտիվիստ անդամներից է, որը Robomart-ի համահիմնադիրն է, տեխնոլոգիական տնօրենը։

Ընկերությունն ինն աշխատակից ունի, որոնցից երեքը Հայաստանում են՝ արդյունաբերական դիզայները, երկու ծրագրային ճարտարագետները։

Այս թիմն աշխատում է սննդամթերքի, դեղորայքի, հյութերի, հիգիենայի մանրածախ վաճառքի ավտոմատացման ոլորտում: Առաջին հաջողության մասին Panorama.am-ին պատմել է Տիգրան Շահվերդյանը։

Նախորդ ամսվանից Կալիֆոռնիայի Լոս Անջելես քաղաքի թաղամասերից մեկում՝ Արևմտյան Հոլիվուդում գործում է շրջիկ խանութների կանչի ծառայությունը։ Ծառայության նախագծումը սկսվել է Սիլիկոնյան հովտում։

Այդ թաղամասի զբաղված կամ առողջական խնդիրներ ունեցող բնակիչները հեռախոսային հավելվածի միջոցով կարող են իրենց մոտ կանչել Robomart-ի շրջիկ խանութը, վերցնել այնտեղից իրենց անհրաժեշտ սնունդը, հիգիենայի պարագան, հյութը կամ էլ դեղորայքը։ Ծրագիրը կհաշվի գումարն ու այն կգանձի բանկային քարտից, վճարման կտրոնը կուղարկվի սպառողին։
Ծառայությունն ամբողջությամբ ավտոմատացված է։ Մեքենայի՝ նշված հասցեին մոտենալիս քաղաքացին ծանուցում է ստանում։

Տիգրան Շահվերդյանի խոսքով, այս ծառայության կյանքի կոչման համար աշխատել են երեք տարի։ Այդ ընթացքում ծառայության վերջնական տեսքը, դրա մաս կազմող համակարգերը շատ փոփոխությունների են ենթարկվել։

«Մեր ծառայությունը հարթակ է, որի միջոցով այլ ընկերություններ վաճառում են իրենց ապրանքը։ Զբաղված մարդկանց համար ժամանակը թանկ է, իսկ մեր ծառայությունը կոչված է խնայել մարդկանց ժամանակը»,- ասում է նա՝ մանրամասնելով, որ ծառայությունից օգտվող մարդը հնարավորություն ունի ինքնուրույն ընտրել իր նախընտրած ապրանքը։ Այս վերջին հանգամանքը հատկապես վճռական է թարմ սննդամթերքի դեպքում։

Շահվերդյանի խոսքով, ծառայությունն օգնում է մարդկանց խնայել ժամանակը, ճանապարհային երթևեկությանը՝ նպաստելով խցանումների նվազեցմանը և որպես արդյունք նպաստել բնության պահպանմանը՝ կրճատելով արտանետումները։

«Արձագանքները շատ դրական են ու ոգևորիչ։ Սա առևտրի լրիվ նոր տեսակ է։ Լոս Անջելեսում ծառայությունը դեռ կընդլայնվի։ Մեր հետագա աշխատանքները լինելու են այս ծառայության  զարգացման, ընդլայնման, նոր տեխնոլոգիաների ներմուծման ուղղությամբ»,- ասում է ընկերության տեխնոլոգիական տնօրենը։

Ինքնասպասարկման ոլորտում նորանոր ձեռքբերումներ գրանցելու ու աշխարհում առաջատարը դառնալու նպատակ ունի «Limetech» ընկերությունը։ Օրեր առաջ ընկերությունը նոր մոդելի տերմինալները արտահանեց Վրաստան։ Դրանք ոչ շատ մեծ քանակներով արտահանվել են Բելառուս, Մոլդովա, Ղրղզստան, Ղազախստան։ 

Earlyone և Limetech ընկերությունների հիմնադիր Գևորգ Սաֆարյանը, որ նույնպես գիտության ֆինանսավորման պահանջով ձևավորված «Գիտուժ» նախաձեռնության ակտիվ անդամներից է, Panorama.am-ի հետ զրույցում ասում է՝ տերմինալի նախագծումը ինժեներական աշխատանքի արդյունք է։ Դրա կաղապարն արտադրվում է Հայաստանում, իսկ բաղադրիչները ներկրվում են։

«Արձագանքները դրական են, մենք էլ մեծ պատասխանատվությամբ ենք վերաբերվում Made in Armenia բրենդին, աշխատում ենք որակյալ արտադրանք տալ, որ հետագայում թե մեզ հետ համագործակցեն, թե հայաստանյան ընկերությունների նկատմամբ կարծիքը դրական լինի»,-նշում է Սաֆարյանը։

Հիմա ընկերությունը համագործակցում է հայաստանյան 17 բանկերից 16-ի հետ, կապի օպերատորների հետ՝ տրամադրելով նրանց հոսքերի կառավարման համակարգերի սարքավորումների վերաբերյալ լուծումներ։ 

«Հիմա ներդրում ենք անում բանկային մեծ ինքնասպասարկման լուծում ստեղծելու համար։ Տարվա վերջ կներկայացնենք մեր նոր պրոդուկտը։ Մեր նպատակն է, որ ինքնասպասարկման համակարգերի ոլորտում Limetech-ն աշխարհում առաջինը լինի, ունենք շատ լավ պոտենցիալ, լավ մտքի տեր մարդիկ ու մասնագետներ»,- ասում է Գևորգ Սաֆարյանը։