Ձեր վստահելի աղբյուրը

Հայաստանի պետական սիմֆոնիկ նվագախումբը հուլիսի 9-19-ը կանցկացնի լեգենդար լեհ կոմպոզիտոր Քշիշտոֆ Պենդերեցկու անվան ժամանակակից դասականների փառատոնը։

Հայաստանի պետական սիմֆոնիկ նվագախմբից հայտնում են, որ փառատոնի շրջանակում տեղի կունենա երեք սիմֆոնիկ համերգ։ Հուլիսի 9-ին կհնչեն էստոնացի կոմպոզիտոր Արվո Պյարտի, ֆինն հեղինակներ Կաիյա Սաարիահոյի և Սեբաստիան Ֆագերլունդի ստեղծագործությունները։ Հուլիսի 16-ի երեկոն նվիրված կլինի Քշիշտոֆ Պենդերեցկու հիշատակին. կներկայացվեն նրա ստեղծագործությունները։ Իսկ հուլիսի 19-ի՝ փակման համերգային ծրագրում, որը կկրի «Աղոթքներ» խորագիրը, կլինեն համաշխարհային պրեմիերաներ։

Հուլիսի 19-ի համերգը բարեգործական է։ Տոմսերի վաճառքից ստացված միջոցներն ուղղվելու են «Վորլդ Վիժն Հայաստան» բարեգործական կազմակերպությանը. Սյունիքի մարզի սահմանամերձ համայնքներում դժվարին պայմաններում ապրող առնվազն 100 երեխա, այդ թվում՝ Արցախից տեղահանված երեխաներ, կապահովվեն դպրոցական պարագաներով։ Հայաստանի պետական սիմֆոնիկ նվագախումբը «Վորլդ Վիժն Հայաստան» բարեգործական կազմակերպության բարի կամքի դեսպանն է, ով օգնում է կազմակերպությանը դրական փոփոխություններ բերել կարիքի մեջ ապրող երեխաների կյանքում։

Panorama.am-ը հարցեր է ուղղել Հայաստանի պետական սիմֆոնիկ նվագախմբին և «Վորլդ Վիժն Հայաստան» բարեգործական կազմակերպությանը՝ բարեգործական համերգի, համերգային ծրագրի ու կազմակերպության՝ Հայաստանում  իրականացվող ծրագրերի մաաիսն։

Պատասխանում է Հայաստանի պետական սիմֆոնիկ նվագախմբի տնօրեն Սարգիս Բալբաբյանը

Panorama.am-Հաշվի առնելով այն, որ հուլիսի 19-ի համերգը բարեգործական է, արդյո՞ք ծրագիրը հատուկ համաշխարհային պրեմիերաներով է կազմած՝ ներառելու ավելի շատ ունկնդիր-բարեգործներ։

Սարգիս Բալբաբյան-Պենդերեցկու անվան ժամանակակից դասականների փառատոնի առաքելությունն է մեր երաժշտասեր ունկնդրին ներկայացնել պրեմիերաներ, նոր երաժշտություն։ Փառատոնի շրջանակներում շատ ստեղծագործություններ Հայաստանում կհնչեն առաջին անգամ։ Փառատոնային ծրագրում ներառված են նաև համաշխարհային պրեմիերաներ։

Մասնավորապես, հուլիսի 19-ին՝ փակման համերգին, որ կրում է «Աղոթքներ» խորագիրը, կհնչի ուկրաինացի կոմպոզիտոր Վալենտին Սիլվեստրովի թիվ 9 սիմֆոնիան։ Հեղինակի հետ համագործակցության արդյունքում սիմֆոնիայի համաշխարհային պրեմիերան վստահվել է Հայաստանի պետական սիմֆոնիկ նվագախմբին։ Նույն օրը սպասվում է ևս մեկ համաշխարհային պրեմիերա. կներկայացվի մեր օրերի ամենահայտնի կոմպոզիտորներից մեկի՝ Կառլ Ջենկինսի երգչախմբային պասակալիան, որը հեղինակը գրել է մեր նվագախմբի խնդրանքով, և այն նվիրված է Արցախյան 44-օրյա պատերազմի զոհերի հիշատակին։ Համերգի խորագիրը և ընտրված ստեղծագործությունները խորհուրդ ունեն. այս երեկոյի ընթացքում մենք կոգեկոչենք 44-օրյա պատերազմի զոհերի հիշատակը, որոնք իրենց կյանքը նվիրաբերեցին հայրենիքի պաշտպանության գործին։

Panorama.am-Ես գիտեմ, որ նվագախումբը հաճախ է բարեգործական համերգներ ունենում։ Այս մեկը, որ ոչ խաղաղ սահմանամերձի ու պատերազմներ տեսած Արցախի երեխաների համար, ունի՞ հատուկ նշանակություն նվագախմբի համար։

Սարգիս Բալբաբյան-Այո, Հայաստանի պետական սիմֆոնիկ նվագախումբը հաճախ է բարեգործական ելույթներ ունենում։ Երաժշտությունը բարձր արժեք է, այն բուժում է, սփոփում, ոգևորում, հուզում, և բնական է, որ այս հույզերը մարդկանց փոխանցող երաժիշտները չեն կարող անտարբեր մնալ իրենց շուրջն ընթացող գործընթացների նկատմամբ։ Մեր պարտքն ենք համարում մեր հնարավորությունների սահմանում աջակցել մարդկանց։

Հարցերին պատասխանում է «Վորլդ Վիժն Հայաստանի» ծրագրերի ղեկավար Շաղիկ Մարուխյանը

Panorama.am-Ո՞ր մարզերում է աշխատում «Վորլդ Վիժն» միջազգային բարեգործական կազմակերպությունը և ինչո՞ւ ընտրվեց հենց Սյունիքի մարզը։

Շաղիկ Մարուխյան-Վորլդ Վիժնն այս պահին աշխատում է Հայաստանի բոլոր մարզերում։ Երեխաների հովանավորության երկարատև ծրագրերով աշխատում ենք վեց մարզում (Սյունիք, Գեղարքունիք, Արագածոտն, Շիրակ, Տավուշ, Լոռի), սակայն դրամաշնորհային ծրագրերով կազմակերպությունը աշխատում է ամբողջ Հայաստանով։ Մարզային գրասենյակներն առայժմ վեցն են։ Հետպատերազմյան իրականությունից ելնելով՝ կազմակերպությունը ռազմավարական որոշում է ընդունել շարունակել իր գործունեությունը բոլոր մարզերում ըստ հնարավորությունների, բայց առաջնահերթություն տալ և անպայմանորեն ֆիզիկական ներկայություն ապահովել սահմանամերձ (կամ սահմանամերձ դարձած) բնակավայրերում։ Այսկերպ, որպես սահմանամերձ համայքն ունեցող մարզեր, դիտարկում ենք Տավուշը, Սյունիքն ու Գեղարքունիքը։ Սյունիքի մարզում գրասենյակներ ունենք Կապանում և Սիսիանում, որոնք գործում են ավելի քան 15 տարի։ Մենք ծանոթ ենք մարզին, խնդիրներին, անմիջականորեն աշխատում ենք այդտեղ բնակվող ընտանիքների հետ։

Panorama.am-Սյունիքում ընդհանուր առմամբ քանի՞ երեխայի, ընտանիքի է աջակցություն ցուցաբերում կազմակերպությունը։

Շաղիկ Մարուխյան-Այս պահին կազմակերպությունն իր ունեցած հնարավորություններով ուղղակիորեն աջակցում է 2500 երեխայի։ Միևնույն ժամանակ մենք իրականացնում ենք նաև անուղղակի աջակցություն, որն իրենից ենթադրում է համակարգային լուծումների ներդրում համայնքների զարգացման գործընթացին, ինչպիսին է օրինակ՝ համայնքային սոցիալական աշխատողի ինստիտուտի կայացումն ու հզորացումը։

Panorama.am-Կոնկրետ Արցախում կազմակերպությունը ծրագրեր իրականացնո՞ւմ է։

Շաղիկ Մարուխյան-Արցախում կազմակերպությունը դեռ ներկայացված չէ։ Արցախում մենք իրականացրել ենք կարիքների գնահատում պատերազմից առաջ, քանի որ այնտեղ սոցիալական ու կրթական ծրագրեր իրականացնելու նպատակ կար, սակայն պատերազմից հետո պատկերը փոխվեց։ Ներկա պահին առաջնահերթություն է տրվել Արցախից տեղահանված ընտանիքների օժանդակության և ծրագրերում ներգրավման, տեղահանված ընտանիքների մի զգալի հատված տեղեկայված է հենց Սյունիքի մարզում։