Ձեր վստահելի աղբյուրը

Ամեն տարի  հոկտեմբերի 17-ին նշվում է աղքատության վերացման միջազգային օրը: Օրվա նպատակն է բոլոր երկրներում բարձրացնել աղքատության վերացման դեմ պայքարի մասին իրազեկվածությունը:

ՀՀ վիճակագրական կոմիտեի կիրառած մեթոդաբանությամբ՝ աղքատ են նրանք, ում սպառումը մեկ չափահաս անձի հաշվով ցածր է աղքատության վերին ընդհանուր գծից, շատ աղքատ են նրանք, ում սպառումը մեկ չափահաս անձի հաշվով ցածր է աղքատության ստորին ընդհանուր գծից, իսկ ծայրահեղ աղքատ կամ թերսնված են նրանք, ում սպառումը մեկ չափահաս անձի հաշվով ցածր է աղքատության պարենային գծից:

Պաշտոնական տվյալներով՝ 2020թ-ին 2019-ի համեմատ աղքատության մակարդակը աճել է 0,6%-ով՝ կազմելով 27%։ 2021 թվականի աղքատության ցուցանիշները դեռևս ամփոփված չեն։
Panorama.am-ի թղթակցի հետ զրույցում տնտեսագետ Հրանտ Միքայելյանը նշեց, որ թեև  Հայաստանում կա բավականին մեծ տնտեսական աճ՝ մոտ 14%-ի չափով, սակայն բնակչության կենսամակարդակը չի բարելավվել։

«Տնտեսական աճը պայմանավորված է նաև ռուս-ուկրաինական հակամարտությունով,  քանի որ Ռուսաստանից տասնյակ-հազարավոր քաղաքացիներ են եկել մեր երկիր և դրա հետևանքով որոշակի գումար ուղղվել է Հայաստան։ Այդուհանդերձ, մեր երկրում կենսամակարդակն  առանձնապես չի բարելավվել, ինչը կարող ենք տեսնել մանրածախ առևտրի շրջանառությունից, մարդկանց բանկային հաշիվների չափից»,- ասաց տնտեսագետը։ 

Սովորաբար տնտեսության աճը պետք է հանգեցնի բնակչության եկամուտների աճի ու աղքատության կրճատման, մինչդեռ Հրանտ Միքայելյանի բնորոշմամբ, Հայաստանում այսօր հակառակ պատկերն է։ Նրա խոսքով՝ թեև մեծածախ և արտաքին առևտուրն աճել է, սակայն բնակչության 99 տոկոսի կյանքում ոչինչ չի փոխվում։

Տնտեսագետը նշեց նաև, որ վերջին տարիներին Հայաստանում ընդունվում են օրենքներ, որոնք չեն նպաստում աղքատության նվազմանը։ Դրանցից մեկն, ըստ նրա, Հայաստանում համահարթ հարկման անցնելն է, երբ աղքատներն ու հարուստները նույն չափով են հարկ վճարում, ինչը  աղքատների վրա համեմատաբար ծանր է անդրադառնում։

Հրանտ Միքայելյանի խոսքով՝ աղքատության հաղթահարման համար պետք է ռեալ ծրագրեր իրականացվեն։ «Մարզերում նախ պետք է գործազրկության հարցը լուծել, այդ դեպքում իրավիճակը որոշակի կփոխվի։ Մինչդեռ գյուղատնտեսության ոլորտում՝ գյուղատնտեսության նախարարության փակվելուց հետո գրեթե միշտ անկում է գրանցվում։ Դա նշանակում է, որ գրեթե մեկ միլիոն մարդու եկամուտ նվազել է»,- նշեց նա։

Տնտեսագեոը կարծում է, որ ադեկվատ քաղաքականության դեպքում հնարավոր է երկրում աղքատությունը, անհավասարությունը նվազեցնել։