Ձեր վստահելի աղբյուրը

«Շրջափակման հետևանքով Արցախի տնտեսության կորուստների գնահատման մասին» զեկույցը կարևոր գործիք է մեր համար, եթե ուզում ենք միջազգային կազմակերպություններից և երկրներից օգնություն ու աջակցություն ստանալ։ Այս մասին այսօր զեկույցի ներկայացման ժամանակ ասաց Արցախի նախկին պետնախարար Ռուբեն Վարդանյանը։

Նրա խոսքով՝ խոսում են Արցախում ստեղծված իրավիճակի՝ սննդի, գազի, էլեկտրաէներգիայի,  մարդկանց խնդիրների մասին, բայց չեն կարողանում ճշգրիտ, պրոֆեսիոնալ՝ միջազգային մակարդակով ներկայացնել, թե օրական ինչքան կորուստ է ունենում Արցախի տնտեսությունը։

«Եթե իսկապես հասկանում են մեր վիճակը, պետք է ավելի խորքային աջակցեն, քանի որ կորուստը մեծ է»,- ասաց Ռուբեն Վարդանյանը։

Քննարկման ժամանակ նշվեց, որ ՀՀ կառավարությունը 2023թ-ի համար 144 միլիարդ դրամի բյուջետային աջակցություն է տվել Արցախին։ «Մենք ենք մեր սարերը» տարածքային զարգացման գործակալության Արցախի նախագծերի ղեկավար Գրիգորի Մարտիրոսյանը հայտնեց, որ այդ գումարն առաջին հերթին կուղղվի թոշակների, նպաստների, աշխատավարձերի վճարմանը։

Ռուբեն Վարդանյանն անդրադառնալով ՀՀ կառավարության աջակցությանն, ասաց, որ 144 մլրդ դրամ աջակցությունից 60 մլրդ-ը Արցախը պետք է մուծի բանկերին։ Դա նշանակում է, որ այդ գումարը Արցախի տնտեսություն չի մտնում։

«Իրավիճակն ավելի լուրջ է։ Մենք ունեցել ենք բյուջետային դեֆիցիտ, որն այս տարի կկազմի մոտ 29 մլրդ դրամ։ Ընդհանուր առմամբ, ունենք սուր ֆինանսական ճգնաժամ, որին Արցախի և ՀՀ կառավարություններն այդքան ժամանակ չեն տրամադրում։ Ամենօրյա ծախսերը փակելով՝ հարցը չի լուծվելու։ Ընդհանրապես, մենք ունենք ավելի խորքային հարցեր. շրջափակման մեջ գտնվող ո՞ր տնտեսությունը կարող է աշխատել արդյունավետ, եթե չես կարողանում արտադրել և արտադրանքդ տանել ՀՀ կամ հումք ներկրել, երբ 10 հազարից ավելի մարդ գործազուրկ է։ Ցավոք սրտի, տնտեսության փոփոխության մոդելը հասարակությունում խորքային չի քննարկվում»,- նշեց Ռուբեն Վարդանյանը։

Նրա խոսքով՝ քիչ օրինակներ կան, երբ 120 000 մարդ շրջափակման մեջ է 100 օրից ավելի, և նման լուրջ հարցերը բավարար չեն քննարկվում և հետազոտվում։

Նշենք, որ «Շրջափակման հետևանքով Արցախի տնտեսության կորուստների գնահատման մասին» զեկույցը պատրաստել է հանրային ֆինանսների կառավարման միջազգային խորհրդատու Վարդան Արամյանի գլխավորած տնտեսագետների մասնագիտական խումբը՝ Արցախի հանրապետության նախկին պետնախարար Ռուբեն Վարդանյանի պատվերով: