ՔԿ-ն Աննա Հակոբյանի հայտարարությունների հավաստիությունն ստուգելու լիազորություն չունի
Ապրիլի 2-ին Տավուշի մարզում Նիկոլ Փաշինյանի կինը՝ Աննա Հակոբյանը մասնավորապես հայտարարել է. «Իրականությունն այն է, որ մենք 44-օրյա պատերազմի ընթացքում ունեցել ենք 11 հազար դասալիք, ես այլ կերպ չեմ արտահայտվում, դուք հասկացեք, թե ինչի մասին է խոսքը։ 11 հազար զինվորական, կամավոր, սպա և այլն, պատկերացնում եք, չէ՞, դա ինչ թիվ է»։
Այս հայտարարությունից օրեր անց Panorama.am-ը դասալիքների իրական թվի, այդ փաստերով հարուցված քրեական վարույթների քանակի, դրանց ընթացքի, Աննա Հակոբյանի հրապարակած թվերը ստուգելու վերաբերյալ հարցեր ուղղեց Քննչական կոմիտեին։ Երեկ՝ մայիսի 4-ին հարցերին պատասխանել է Զինվորական քննչական գլխավոր վարչության վերահսկողության վարչության պետ, արդարադատության առաջին դասի խորհրդական Պ. Այցազյանը։
Panorama.am-44-օրյա պատերազմում դասալքության հատկանիշներով Քննչական կոմիտեում քանի՞ քրեական գործ կա հարուցված։ Քանի՞ մարդ է այդ գործերով ներգրավված որպես մեղադրյալ։ Հարուցված քրեական վարույթներից քանի՞սի նախաքննություն է ավարտվել։
Պ. Այվազյան-ՀՀ քննչական կոմիտեի նախագահին հասցեագրված Ձեր 10․04․2023թ․ հարցման առնչությամբ տեղեկացնում ենք, որ 2020 թվականի 44-օրյա պատերազմի և հայտարարված ռազմական դրության ժամանակահատվածում (2020 թվականի սեպտեմբերի 27-ից մինչև 2021 թվականի մարտի 24-ը) զինվորական ծառայության կարգի դեմ ուղղված, ինչպես նաև այլ հանցագործությունների դեպքերով նախաձեռնված բազմաթիվ քրեական վարույթներ վերաբերում են ընդհանուր առմամբ շուրջ 12600 անձի։
Քրեական գործերն առնչվում են քաղաքացիների, զինծառայողների կողմից զորահավաքային զորակոչից խուսափելու, հրաման չկատարելու, դասալքության, զորամասը կամ ծառայության վայրն ինքնակամ թողնելու, անդամախեղման եղանակով զինվորական ծառայությունը կամ դրա առանձին պարտականությունների կատարումը դադարեցնելու, զինվորական ծառայության պարտականությունները կատարելուց հրաժարվելու, մարտական հերթապահություն կամ մարտական ծառայություն կրելու կանոննները խախտելու, ծառայության նկատմամբ անփույթ վերաբերմունք դրսևորելու, ՀՀ անվտանգության ապահովմանն ուղղված մարտական հերթապահության կամ մարտական ծառայություն կրելու կանոնները խախտելու և այլ դեպքերին։
Միայն 2020 թվականի 44-օրյա պատերազմի և հայտարարված ռազմական դրության ժամանակահատվածում զինվորական ծառայության պարտականությունները կատարելուց հրաժարվելու (ՀՀ նախկին քրեական օրենսգրքի 364-րդ հոդվածի 3-րդ մաս), զորամասը կամ ծառայության վայրն ինքնակամ թողնելու (ՀՀ նախկին քրեական օրենսգրքի 361-րդ հոդվածի 7-րդ մաս), և դասալքության (ՀՀ նախկին քրեական օրենսգրքի 362-րդ հոդվածի 3-րդ մաս), դրանց հետ համակցությամբ այլ հանցագործությունների դեպքերի առթիվ նախաձեռնվել է 1786 քրեական վարույթ, որոնք առնչվում են շուրջ 10690 անձի։
ՀՀ նախկին քրեական օրենսգրքի վերոնշյալ հոդվածներով և դրանց հետ համակցությամբ այլ հոդվածներով քննված քրեական վարույթներով քրեական հետապնդում է հարուցվել ընդհանուր 756 անձի նկատմամբ։
Նշված երեք հոդվածներով հարուցված 118 վարույթ՝ 143 անձի վերաբերյալ, ավարտվել է մեղադրական եզրակացությամբ:
Հարկ է նկատի ունենալ, որ քննության ընթացքում բազմաթիվ վարույթներ, այդ թվում նաև հարուցված ինչպես նշված, այնպես էլ ՀՀ քրեական օրենսգրքի տարբեր և/կամ մի քանի հոդվածներով, միացվել են իրար կամ վարույթներից անջատվել են մասեր։
Panorama.am- Քննչական կոմիտեն հաստատո՞ւմ է Աննա Հակոբյանի կողմից հնչեցրած տեղեկությունը։ Եթե ոչ, ապա Աննա Հակոբյանի վերոնշյալ հայտարարությունից հետո Քննչական կոմիտեն ի՞նչ գործողություններ է ձեռնարկել՝ ստուգելու այդ ինֆորմացիայի հավաստիությունը, աղբյուրը։
Պ. Այվազյան-ՀՀ քննչական կոմիտեն չունի կոնկրետ քրեական վարույթի շրջանակներից դուրս անձանց կողմից արվող հայտարարությունների հավաստիությունն ստուգելու լիազորություն։
Panorama.am-Դասալքության համար մեղադրվողներից քանի՞սն են սպա, քանի՞սը՝ ժամկետային զինծառայող, քանի՞սը՝ պայմանագրային, քանի՞սը՝ կամավորական։
Պ. Այվազյան-Այս հարցի առնչությամբ ՀՀ քննչական կոմիտեում առանձին հաշվառում չի իրականացվել։
Panorama.am- Այդ գործերի շրջանակում քանի՞ ազատազրկված, քանի՞ դատապարտված անձ կա։
Պ. Այվազյան-Հարցման 5-րդ հարցի վերաբերյալ տեղեկատվություն «Տեղեկատվության ազատության մասին» ՀՀ օրենքի 9-րդ հոդվածի 10-րդ մասի համաձայն՝ չի կարող տրամադրվել, քանի որ ՀՀ քննչական կոմիտեն չի հանդիսանում տվյալ տեղեկատվության տնօրինող։
Հարակից հրապարակումներ`
- ՔԿ-ն հերքում է Աննա Հակոբյանին. Զորամասն ինքնակամ թողելու, դասալքության համար քրեական հետապնդում է հարուցվել 756 անձի նկատմամբ
- Դատախազության ու Աննա Հակոբյանի դասալիքների թվի տարբերությունը
- Գեղամ Նազարյան. Մենք դասալիքների ազգ չենք, մենք հերոսների ազգ ենք
- Զոհվածի մայրը՝ Աննա Հակոբյանին. Եթե դասալիքների մասին հստակ թիվ եք հնչեցնում, ապա անուն առ անուն նշեք զոհերին, գերիներին, անհետ կորածներին
- Աշոտյան. Պատերազմի ժամանակ հայ դասալիքների մասին մեկ Ալիեւն է խոսել, մեկ Հակոբյան Աննան