Ադրբեջանի կողմից առաջխաղացման որևէ քայլ տեղի չի ունեցել. Պաշտպանության փոխնախարար

«Սահմանային իրավիճակը շարունակում է մնալ հարաբերականորեն կայուն, որոշակի լարվածության միտում նկատվում էր, վերջին օրերին ադրբեջանական մամուլը և առհասարակ Ադրբեջանն ապատեղեկատվություն է տարածում և, որպես կանոն, դրան հաջորդում են որոշակի քայլեր»,- ԱԺ-ում լրագրողների հետ ճեպազրույցում ասաց ՀՀ պաշտպանության նախարարի տեղակալ Արման Սարգսյանը։

Անդրադառնալով Երասխի ուղղությամբ Ադրբեջանի գործողություններին և պատասխանելով հարցին, թե արդյո՞ք սրանով Ադրբեջանը լայնածավալ էսկալացիայի համար հող է նախապատրաստում, Ա. Սարգսյանն ասաց. «Չեմ կարող ասել լայնածավալ գործողությունների վերածվելու, թե ինչ-որ լրացուցիչ էսկալացիային ուղղված քայլեր իրականացվում են, բայց որ սա չի նպաստում բանակցային գործընթացի դրական ընթացքին և բացասական հետևանքներ է առաջացնում, դա ակներև է: Որպես կանոն, նմանատիպ դեպքերում որոշակի էսկալացիայի համար հող նախապատրաստելուց հետո ձեռագիրը կարծես նույնն է, և նորից շարունակում են փոքր-փոքր լոկալ խնդիրներ ստեղծել»:

Պատասխանելով հարցին, թե արդյո՞ք Երասխում ադրբեջանցիներն առաջ գալու միտում ունեցել են, Արման Սարգսյանն ասաց. «Ըստ իմ ունեցած տեղեկությունների, դրանք հեռահար կրակոցներ են, առաջխաղացման որևէ քայլ տեղի չի ունեցել: Ամեն դեպքում, որևէ խուճապի կարիք չկա, որովհետև մենք ապրում ենք մի տարածաշրջանում, մի երկրում, որն անընդհատ կարծես թե սովորել է այս լարված իրավիճակում ապրելուն: Պետք է լինենք զգոն, ամեն դեպքում վստահ, որ մեր Զինված ուժերը և ուժային ստորաբաժանումները անհրաժեշտության դեպքում համարժեք պատասխան տալիս են ու կտան, սակայն ցանկալի չէ սրել իրավիճակը։ Մենք հույս ունենք, որ ադրբեջանական զինված ուժերի և այդ շրջանակների կողմից այս ապակառուցողական մոտեցումը վերջ կունենա»։

Նրա խոսքով, ոչ միայն ՊՆ-ն, այլև ԱԳՆ-ը և բոլոր շահագրգիռ պետական մարմիններն այս երևույթին արձագանքում են:

«Անընդհատ մենք տեղեկատվություն տրամադրում ենք, տեղեկատվության վերլուծությամբ ակնհայտ կդառնա, թե որն է իրական նպատակը: Սակայն նպատակը, կարծում եմ, լարվածություն ստեղծելն է, և, փառք Աստծո, որ մենք զոհեր կամ ավելի լուրջ վնասվածներ չունենք»,- ասաց Արման Սարգսյանը:

Նա նշեց, որ Հայաստանի բանակն ունի իր առջև դրված խնդիրները, և, ըստ իրադրության, այդ խնդիրները փոխվում են:

«Ամեն դեպքում, բանակը պատրաստ է և պարտավոր է համարժեք արձագանքել յուրաքանչյուր այսպիսի քայլի»,- ասաց պաշտպանության փոխնախարարը։