ԱԳՆ․ Հակարի կամրջի մոտ ռուս խաղաղապահների ներգրավվածությամբ տեղի ունեցած միջադեպի կապակցությամբ ՀՀ-ում ՌԴ դեսպանը կանչվել է ՀՀ ԱԳՆ

Երեկ Հակարի կամրջի մոտ ռուս խաղաղապահների ներգրավվածությամբ տեղի ունեցած միջադեպի կապակցությամբ ՀՀ-ում ՌԴ դեսպանը  կանչվել է ՀՀ ԱԳՆ։ Գերատեսչությունում կայացած հանդիպման ժամանակ ներկայացվել է Հայաստանի խիստ դժգոհությունը։ Այդ մասին 24News-ին հայտնել են ՀՀ արտաքին գործերի նախարարությունից:

«Կոչ է արվել ձեռնարկել բոլոր անհրաժեշտ քայլերը՝ միջադեպի հանգամանքները պարզելու և իրավիճակը շտկելու ուղղությամբ»,- նշել են ԱԳՆ-ում։

Հիշեցնենք, որ երեկ ԱԱԾ սահմանապահ ծառայությունը հաղորդագրություն էր տարածել ՝ տեղեկացնելով․ «Հունիսի 15-ին՝ ժամը 08:40-ի սահմաններում, Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ են կատարել՝ ՀՀ տարածքում դրոշ տեղադրելու նպատակով: Հայկական կողմի ձեռնարկած միջոցների արդյունքում ադրբեջանցի զինծառայողների առաջխաղացման և ՀՀ տարածքում դրոշ տեղադրելու փորձը կանխվել է»: