Ձեր վստահելի աղբյուրը

«Քաոսային վիճակ է»,- թշնամի Ադրբեջանի հարձակումից հետո Արցախում ստեղծված իրավիճակը Panorama.am-ի հետ քննարկեց Արցախի Հանրապետության Ազգային ժողովի «Արդարություն» խմբակցության պատգամավոր Մետաքսե Հակոբյանը։

Նա հայտնեց, որ չկա այնպիսի ընտանիք, որ չունենա տանը զոհ, վիրավոր, անհետ կորած։

«Մարդանց մի մասը գյուղերում, քաղաքներում դեռ շրջափակման մեջ են։ Մարդիկ փողոցներում են։ Կառավարությունն ինչքան կարողանում է, տեղավորել է մարդկանց, մի մասն էլ հարազատների տներում են։

Չգիտեմ բառեր, որոնցով կարող եմ նկարագրել ներկա վիճակն Արցախում»,- ասաց Մետաքսե Հակոբյանը։

Սեպտեմբերի 20-ի ժամը 21։30-ի դրությամբ, Արցախի մարդու իրավունքների պաշտպանի գրասենյակի կողմից հավաքագրված տվյալների համաձայն, Արցախում Ադրբեջանի հարձակման հետևանքով կա առնվազն 200 զոհ և ավելի քան 400 վիրավոր։ Քաղաքացիական բնակչության շրջանում վիրավորների թիվը գերազանցում է 40-ը, որոնցից 13-ը երեխաներ են։ Խաղաղ բնակիչների շրջանում այս պահին հաստատված է 10 զոհ, որոնցից 5-ը երեխաներ են։

ՀՀ նախկին ՄԻՊ Արման Թաթոյանն էլ գրել էր, որ Արցախում կան հազարավոր կորած մարդիկ։