Ձեր վստահելի աղբյուրը

ԿԳՄՍ նախարարությունը հանրակրթության նոր չափորոշչով  տպագրված 2-րդ, 5-րդ և 7-րդ դասարանների դասագրքերի շուրջ աղմուկից հետո նոր նախագիծ է առաջարկում՝ խնդիրներից զերծ ու որակյալ դասագրքեր տպագրելու համար։ Նախագիծն էլ կոչվում է՝ «Հանրակրթական առարկաների դասագրքերի ստեղծման, հրատարակման և Հանրակրթության պետական չափորոշչին դասագրքերի համապատասխանության գնահատման առարկայական հանձնաժողովների ձևավորման կարգի» մասին։

Panorama.am-ը զրուցել է կրթության փորձագետ Սերոբ Խաչատրյանի հետ՝ արդեն տպագրված դասագրքերում առկա թերությունների պատճառների ու նոր առաջարկվող նախագծի վերաբերյալ։

Panorama.am-Պարոն Խաչատրյան, ի՞նչ եք կարծում՝ այս նախագիծը որևէ բան կփոխի դասագրքերի շուրջ ստեղծված այսօրվա իրավիճակում։

Սերոբ Խաչատրյան-Իհարկե, պետք է բարելավել  դասագրքերի մրցույթի պրոցեսը, շատ բարելավումների տեղ կա։ Անթույլատրելի է դասագրքերը տպագրել առանց գիտական հիմնարկների երաշխավորության։ Դասագրքերը պետք է անպայման երաշխավորվեն առնվազն մեկ գիտական հաստատության կողմից՝ կլինի համալսարան, Գիտությունների ազգային ակադեմիա։ Այս դասագրքերն այդ երաշխավորությունը չունեն, քանի որ դրանք  այնքան հապճեպ են ընտրվել՝ ոտքի վրա։

Բոլոր խնդիրների գլխավոր պատճառը դասագրքերի  մրցույթի կազմակերպման սխալ ընթացքն էր։ Խնդիրները կարող էին այսքան չլիներ, եթե ընթացքը նորմալ կազմակերպվեր, նորմալ ժամանակ տրվեր ու նորմալ ֆինանսավորվեր այս գործընթացը։ Նախարարությունն ասում է՝ դասագրքերի մրցույթի հետ կապված գումարներ են խնայել։ Բայց ո՞ւմ հաշվին։ Դասագրքերի հեղինակների հոնորարներն իջեցնելու հաշվի՞ն։ Արժի՞ ցածր գումարով դասագիրք ստանալ։ Ավելի լավ չէ՞ մի փոքր ավելի վճարել ու որակյալ գիրք ստանալ։

Հանձնաժողովների անդամներին պետք է ընտրել ամենայն լրջությամբ։ Հանձնաժողովի կազմում պարտադիր պետք է լինի առնվազն մեկ գիտնական։ Չի կարելի գրել առարկայի մասնագետ և բավարարվել միայն ուսուցչով։ Հանձնաժողովում գիտնականի ներկայությունը պետք է լինի պարտադիր։

Պետք է արգելել, որ ընտրված մարդիկ ֆեյսբուքում տարածեն փոխնախարարի գրությունը, որ իրենք ընտրվել են հանձնաժողովի անդամ։ Սա հնարավորինս փակ պետք է լինի, մարդիկ չպետք է իմանան, որ այս ինչ մարդը  հանձնաժողովի անդամ է։ Սա անթույլատրելի է։ Հասկանում եմ՝ Հայաստանն է, իմանալու են, բայց  սա պետք է հնարավորինս գաղտնի պահել։

Կարծում եմ՝ դասագրքերը երկար ժամանակ պետք է լինեն առցանց հարթակում,  մասնագետները, ծնողները նայեն։ Եթե առաջարկներ կան, արվեն, որպեսզի մինչև տպագրվելը խնդիրները տեսնենք, ոչ թե տպագրվելուց հետո։ Դասագիրքը եթե տպագրվեց, դրանում փոփոխություններ անելը հսկայական ծախս է, տասնյակ հազարավոր դոլարներ։

Panorama.am-Իրենց խնայածից ավելի շատ ծախս կլինի։

Սերոբ Խաչատրյան-Իհարկե։ Այս պրոցեսը պետք է շատ լրջացնել, նորմալ ժամանակ տրվի,  որպեսզի ոտքի վրա չընտրենք դասագիրք։

Panorama.am-Այս ամեն ինչը նախարարության թերացման հետևանք է, այսինքն՝ ուշ են հայտարարել մրցույթ, երաշխավորություն չեն անցել դասագրքերը, ...

Սերոբ Խաչատրյան-Այո, մրցույթը չափազանց ուշ են հայտարարել։ Դրանից հետո բավական կարճ ժամանակ են տվել գիրքը գրելու համար։ Ակադեմիական հաստատություններում գրքերը երաշխավորություն չեն անցել։ Չեն ուղարկվել։ Դա էլ է խնդիր։ Դասագիրքը գիտական գործիք է, պետք է գիտական փորձաքննություն անցնի։

Panorama.am-Ներկայացվող նախագիծն, առաջարկվող փոփոխություններն անհրաժեշտ են։

Սերոբ Խաչատրյան-Այո, պետք է էլ ավելի խստացնել ու բարելավել։

Panorama.am-Շնորհակալություն հարցերին պատասխանելու համար։