Ձեր վստահելի աղբյուրը

ԶՈւ գլխավոր շտաբի պետի նախկին տեղակալ, գեներալ-լեյտենանտ Տիրան Խաչատրյանի նկատմամբ կալանավորման որոշման դեմ պաշտպանը բողոք է պատրաստում։
«Պարտադիր ներկայացնելու ենք, հենց այս պահին դրա վրա եմ աշխատում։ Վստահ եմ, որ կալանքն անհիմ է»,-Panorama.am-ի հետ զրույցում ասաց փաստաբան Վարազդատ Հարությունյանը։

Նրա խոսքով, կալանքի այն հիմքերը, որոնք ներկայացվել են միջնորդության ու հետագայում միջնորդությունը բավարարելու որշման մեջ, առարկայազուրկ են։

«Դրել են քննության խոչընդոտում ու փախուստ։ Երկու հիմքերին էլ մենք մանրամասն անդրադարձել ենք, պահանջել ենք, որ այդ երկու հիմքերը հիմնավորող փաստական հանգամանքներ ներկայացվեն, չեն ներկայացվել»,-ասաց Հարությունյունյանը՝ ընդգծելով, որ Տիրան Խաչատրյանն ակտիվորեն համագործակցում է  նախաքննության հետ, վարույթային որևէ գործողություից չի խուսափում։

Փաստաբանը մանրամասնում է՝ փախուստի մասով հիմքում դրվել է այն հանգամանքը, որ Խաչատրյանին հյուրանոցից են հայտնաբերել։ Նրա խոսքով, այդ ընթացքում ինքը եղել է Տիրան Խաչատրյանի մոտ վերջինի հրավերով, որպեսզի միասին գնան ու ներկայանան ոստիկանություն։

«Ավելին մենք միջնորդել ենք, որ այլընտրանքային միջոցների համակցություն կիրառվի՝ տնային կալանք և  10 մլն դրամի գրավ։ Ի պատասխան դրա, մեղադրող կողմը հայտնել է, որ միգուցե դա փախուստի ռիսկը մեղմի, սակայն  խոչընդոտման ռիսկի հավանականությունը չի նվազում։ Խնդրել ենք պարզաբանել հավանականությունը։ Պատասխանել են՝ շփումները, դրանք կազդեն քննության վրա։ Հատկանշական է, որ ոչ միջնորդությամբ են պահանջել սահմանափակել նրա տեսակցությունները, ոչ էլ կալանքի որոշմամբ։  Բաց են նաև հեռախոսային խոսակցությունները։ Սա գալիս է ապացուցելու, որ կալանքը եղել է ինքնանպատակ, չի բխել Քրեական դատավարության օրենսգրքով նախատեսված հետապնդվող նպատակներից, կարելի է նաև ասել, այն կրում է պատժողական բնույթ։ Դա մեզ համար շատ մտահոգիչ է, գտնում ենք, որ կալանքը համաչափ չի եղել, անհիմն է եղել»,-ասաց փաստաբանը։

Վարազդատ Հարությունյանն ասաց, եթե շատ խորանանք, կհասկանանք, որ միջադեպի մասնակից իշխանամերձ շրջանակների անձանց  նկատմամբ  կալանք չի կիրառվել։
«Սա խոսում է տարբերակված մոտեցման, իշխանության կողմից Տիրան Խաչատրյանի նկատմամբ առանձնահատուկ խիստ վերաբերմունք ունենալու  մասին»,-նշեց նա։
Այսօր «Հրապարակ» թերթը որոշ մանրամասներ էր հրապարակել միջադեպի պատճառների մասին։ Ըստ փաստաբանի, հրապարակված տեղեկատվությունը չի համապատասխանում իրականությանը։

«Գրել են Արցախի հետ կապված վեճ է եղել, և այլն, և այլն։ Նման բան չկա։ Չեմ կարող հրապարակել, թե ինչի շուրջ է եղել, քանի որ չեմ կարող փաստական հանգամանքների մասին խոսել»,-մանրամասնեց փաստաբանը։

Հարությունյանը հատկաշնական է համարում, որ «Հրապարակ»-ի հրապարակումից հետո վարչապետի աշխատակազմի ղեկավարի տեղակալ Տարոն Չախոյանը  ֆեյսբուքյան գրառում է կատարել։
 
«Նա ըստ ամենայնի իշխանության խոսափողներից մեկն է, վարչապետի աշխատակազմում պաշտոն է զբաղեցնում, նշել է, որ թալանել են բանակը, հիմա էլ կրակում են մարդկանց վրա։ Այդ հրապարակումը նման կալիբրի պաշտոտանատր անձի կողմից ևս մեկ անգամ գալիս է վկայելու այն մասին, որ Տիրան Խաչատրյանի նկատմամբ ընտրված կալանքը, հնարավոր է, զերծ չէ որոշակի ճնշումներից ու ազդեցություններից։ Այսինքն, որոշման վրա որոշակի ազդեցություն է  եղել։ Ավելին ասեմ, որ նույն Տարոն Չախոյանի հետ կապվող լրատվամիջոցները, եթե կարելի է  դրանք այդպես համարել, քանի որ դրանք չեն համապատասխանում «Զանգվածային լրատվության մասին» օրենքով  լրատվական միջոցին առաջադրվող պահանջներին, ոստիկանության օպերատիվ ունեցած տեղեկությունները կայծակնային արագությամբ հրապարակում էին։ Ընդ որում, Տիրան Խաչատրյանին ձերբակալելու կադրերը, որ ձեռնաշղթաներով է, որտեղ երևում է Տիրան Խաչատրյանի դեմքի վնասվածքը, տեղի է ունեցել Ջրվեժի հյուրանոցում, մինչ մենք հասել ենք ոստիկանության Աբովյանի բաժին, արդեն կայքերում հայտնվել էին ոստիկանության օպերատիվ նկարահանումները։ Այդ շոուն ու հետագա կալանավորումը խոսում են Տիրան Խաչատրյանի նկատմամբ առանձնահատուկ և օրենքից չբխող  «հատուկ» վերաբերմունքի մասին»,-ասաց Վ. Հարությունյանը։

Հիշեցնենք, որ հունվարի 11-ի ուշ երեկոյան Արամուս գյուղում գործող հացատանը տեղի ունեցած զենքի գործադրմամբ խուլիգանության և մեկ անձի վնասվածք հասցնելու դեպքի առթիվ քննվող քրեական վարույթի շրջանակներում ձերբակալված 5 անձանցից մեկը ազատվել է արգելանքից, իսկ 4-ի նկատմամբ հարուցվել է հանրային քրեական հետապնդում։

Վերջիններիցս մեկին մեղադրանք է ներկայացվել ՀՀ քրեական օրենսգրքի 297-րդ հոդվածի 3-րդ մասով և դատարանի որոշմամբ վերջինիս նկատմամբ որպես խափանման միջոց է ընտրվել կալանքը։

Մյուս երեք անձանց մեղադրանք է ներկայացվել ՀՀ քրեական օրենսգրքի 297-րդ հոդվածի 2-րդ մասի 1-ին կետով։

Միջնորդություն է ներկայացվել դատարան նրանցից մեկի նկատմամբ ևս կալանքը որպես խափանման միջոց ընտրելու վերաբերյալ։

Մյուս երկու մեղադրյալների նկատմամբ ընտրվել է բացակայելու արգելք խափանման միջոցը և նրանք ազատ են արձակվել։

Քրեական օրենսգրքի 297 հոդվածը վերաբերում է խուլիգանությանը։