Ձեր վստահելի աղբյուրը

Ուզում էի ապացուցել, որ Փաշինյանը փողով նույնիսկ ալիևին կծախի, բայց եղավ նրանց մյունխենյան հանդիպումը ու թեման հետ ընկավ։ Թերևս մի թեթև՝ այս հրապարակման տակ։

Ինչն է կարևոր Մյունխենյան հանդիպման.
1. Ոչ ոք չի հավատում Փաշինյանի խոսքերին, թե «պայմանավորվածությունները, որ ձեռք են բերվել, պահվեն, ապա  այն կնպաստի սահմանային լարվածության նվազեցմանը»։
Ոչ ոք չի հավատում, ոչ թե «եթե»-ի պատճառով, այլ որովհետև բոլորս լավ ճանաչում ենք ալիևին, գիտենք նրա նկրտումները, ու որովհետև Փաշինյանի ոչ մի խոսքին պետք չէ հավատալ՝ ոչ վատին, ոչ էլ մանավանդ հանկարծ դուրս թռած լավին։

ՈՒ տեսեք, թե ինչ է ասում Փաշինյանը ԱՄՆ պետքարտուղար Էնթոնի Բլինքենի հետ հանդիպմանը. «Հայ դիրքապահներ սպանվեցին Ադրբեջանի հետ սահմանին»։ Ի՞նչ սահման։ Վախենում է ասել՝ Հայաստանի սահմանից ներս։ Կամ էլ այդ բառի անունը վախենալ չէ...

2. Թե բա՝ «Գերմանիան պատրաստակամություն է հայտնել օժանդակություն ցուցաբերել ՀՀ ԶՈւ տեղի ունեցող բարեփոխումներին»։
ՀՀ ԶՈՒ փաշինյանյան բարեփոխումներին օժանդակություն ցուցաբերելը՝ ոնց որ անեկդոտում. 
Դատավորը հարցաքննում է վկային, սա պատմում է.
- Անցնում էի փողոցով, լսեցի, որ կանչում են՝ օգնեցեք, ծեծում են, օգնեցեք։
- Ու ինչ արեցի՞ք։
- Օգնեցի, ծեծեցինք։

Ինչին եք օժանդակում։ Բանակ է, փաշինյանյան իշխանությունները փողով ազատում են բանակում ծառայելուց։ Դրամապանա՞կ եք տալու։

3. Փաշինյանը հանդիպում է Մեծ Բրիտանիայի գաղտնի հետախուզական ծառայության ղեկավարի հետ, ու այդ մասին շտապ հայտնում են կառավարությունից։ Ինտրիգը պահելու համար որևէ այլ բան չեն հաղորդում։ Սրան գումարենք, որ Ֆրանսիայում ՀՀ դեսպանությունը նոր շենք է տեղափոխվում, որովհետև ընդլայնվել է, ի թիվս՝ ավելացել է ռազմական կցորդի գրասենյակը, կարելի է կարծել, որ Հայաստանն է աջակցում Եվրոպայի ռազմական «բարեփոխումներին»։

4. «Փաշինյանը ՄԱԿ Փախստականների հարցերով հանձնակատարին ներկայացրել է ԼՂ-ից բռնի տեղահանվածների խնդիրներն ու կարիքները»։

Համոզված եմ՝ մանավանդ՝ կարիքները։ Հիմնական խնդիրը, որով զբաղվում է Փաշինյանը, Եվրոպայից արցախահայության անունով գումարներ բերել ու չգիտեմ ինչ անելն է։

Արցախահայությանը Հայաստան բերելը Նիկոլ Փաշինյանի ամենամեծ բիզնես-ծրագիրն էր, հանուն որի նա նույնիսկ արտասանեց «ցեղասպանություն», «բռնի», «տեղահանություն» բառերը։ Այլ կերպ, եթե մեջը գումար չլիներ, դուք չէիք լսի այդ բառերը։ Ավելին՝ հաստատ քարոզ, որ եղել-անցել է, լսած կլինեք։

Ռուսաստանը այս «օպերացիայի» համար Փաշինյանին գումար չէր տա, որովհետև արդեն մեղադրել էր նրան Արցախը ադրբեջանի կազմում ճանաչելու մեջ, ինչին էլ հաջորդեց  բռնագաղթը։ Ուստի Փաշինյանին «Հայաստան» գումարներ բերելու այլ ճանապարհ չէր մնում,  քան Եվրոպայի ծոցում լացել արցախահայության «խնդիրներն ու կարիքները»։

Իսկ մինչ այս՝ կրճատվում են Արցախցիներին տրվելիք գումարների չափերը, էլ չի բարձրաձայնվում նրանց ապահով վերադարձը Արցախ /պարզ է ինչու/, ալիևը զբոսնում է Արցախում, ադրբեջանցիները հայկական հուշարձաններն են ջարդում, Արցախը դարձնում են Նախիջևան, ու այդ մասին ոչ ոք չի խոսում ինչպես պետքն է։

Ալիևը գազ է վաճառում Եվրոպային, Փաշինյանը՝ Հայաստանը, հայերին ու հայկականությունը։

Անահիտ Ոսկանյան