Ձեր վստահելի աղբյուրը

Մարտի 22-ին Երևանի Կոմիտասի անվան կամերային երաժշտության տանը, Երևանի Կոմիտասի անվան կամերային երաժշտության ազգային կենտրոնի աջակցությամբ տեղի կունենա Ստեփանակերտի Կոմիտասի անվան երաժշտական դպրոցի սաների մասնակցությամբ համերգ:

1938 թ․ Ստեփանակերտում հիմնադրված երաժշտական դպրոցը 1950-ից անվանակոչվել է Կոմիտասի անունով:

2023 թ․սեպտեմբերին՝ Արցախի բնակչության բռնի տեղահանությունից առաջ, դպրոցում գործում էին դաշնամուրային, լարային, փողային, հարվածային, ժող․գործիքների, երգեցողության բաժիններ, դպրոցն ուներ 386 աշակերտ, բավարար շենքային պայմաններ, 93 բարձրակարգ, իրենց գործին նվիրված մասնագետներ և որակյալ երաժշտական գործիքներ:

2023թ․ հունիսի 15-ին, լինելով շրջափակման դաժան պայմաններում, դպրոցը նշել է իր գործունեության 85-ամյակը` Ստեփանակերտի մշակույթի և երիտասարդության պալատում կազմակերպելով հոբելյանական համերգ։

Երաժշտական դպրոցի գործունեությունը Հայաստանում շարունակելու մասին են երազում դպրոցի տնօրինությունը, ուսուցիչները, սաները։ Նրանք, թեև հոգեպես ծանր վիճակին, համերգներ են կազմակերպում՝ այդպես ցույց տալով, որ իրենք կան, ցանկանում են շարունակել շուրջ ինը տասնամյակի պատմություն և բարի համբավ ունեցող կրթօջախի կենսագրությունը։

Ստեփանակերտի Կոմիտասի անվան երաժշտական դպրոցի տնօրեն Զարինե Բաբայանը Panorama.am-ին պատմում է, որ 2023 թ. սեպտեմբերին բռնի տեղահանությունից հետո արդեն երեք համերգ ունեցել են Հայաստանում։

«Առաջինը  եղել է նոյեմբերին։ Շատ դժվար էր մեզ համար կրկին բեմ դուրս գալ, հոգեպես ծանր վիճակում էինք, բայց ուժ գտանք, հավաքվեցինք, որպեսզի հայտարարենք՝ մենք կանք, մեզ ճանաչեին, նաև կառավարությունը իմանար, հասկանար, որ 85 տարվա պատմություն ունեցող դպրոցն իրավունք ունի շարունակելու իր գործունեությունը նաև Հայաստանում»,- ասում է տիկին Զարինեն։

Մարտի 22-ի համերգին ցանկացել են կրկնել դպրոցի 85-ամյակին նվիրված հոբելյանական համերգի ծրագիրը, սակայն հնարավոր չի եղել բոլոր սաներին հավաքել մեկ հարկի տակ, քանի որ, Զ. Բաբայանի խոսքով, նրանք բնակվում են Հայաստանի տարբեր շրջաններում։

«Բնականաբար, չենք կարող ծրագիրն ամբողջությամբ կրկնել, բայց հնարավորինս կփորձենք հագեցած ծրագրով հանդես գալ։

Համերգի տոմսերից ստացված գումարը տրվելու է դպրոցի ուսուցիչներին, որոնք այժմ անգործ են։ Դա կլինի մի փոքր օգնություն մեր փորձառու ուսուցիչներին»,- նշում է երաժշտական դպրոցի տնօրենը։

Նա պատմում է, որ աշակերտներն այժմ փորձերն անցկացնում են որտեղ հնարավոր է լինում, հիմնականում այն դպրոցներում, ուր հաճախում են։ Նախքան համերգը՝ երկու փորձ կունենան Կամերային երաժշտության տանը։

«Ով ինչպես կարողանում է, մեզ օգնում է, ինչի համար շնորհակալ ենք»,- ասում է տիկին Զարինեն։

Դպրոցը 2022-23 ուսումնական տարվա ընթացքում ունեցել է 468 աշակերտ, մինչև 2023 թ. սեպտմբերյան դեպքերը նրանց թիվը կրճատվել է՝ հասնելով 386, որովհետև շրջափակման պատճառով տրանսպորտ չի եղել, երեխաները չէին կարողանում հասնել դպրոց։

«Համերգին ելույթ կունենան այն երեխաները, ովքեր հնարավորություն ունեն այս պահին պարապել։ Մոտ 30 երեխա»,- ասում է Զ. Բաբայանը։

Նա հայտարարում է՝ իրենց նպատակն է վերաբացել Ստեփանակերտի Կոմիտասի անվան երաժշտական դպրոցը Հայաստանում. «Մեր դպրոցը 85 տարվա պատմություն ունի։ Երևանում կան երաժշտական, արվեստի դպրոցներ, որոնք չունեն այդքան տարվա պատմություն։ Ցավալի է, որ կոմիտասյան այս տաճարը,  դպրոցն այսպես ավարտի իր գործունեությունը։

Մեր գործունեությունը շարունակելու համար հոկտեմբերին դիմել էինք կառավարությանը, մեր նամակը հասցեագրվել է ԿԳՄՍ նախարարությանը, սական դեռևս պատասխան չենք ստացել»։

Զարինե Բաբայանն ասում է, որ իրենց սաներից մեկի հայրն է զոհվել սեպտեմբերյան դեպքերի ժամանակ, մյուսը կորցրել է եղբորը, իսկ ինքը՝ 25-ամյա որդուն։

«Մենք այսքան ապրումներով հանդերձ՝ շարունակում ենք պայքարել, որպեսզի բոլորին հասկացնենք, որ մենք կանք»,- նշում է Ստեփանակերտի Կոմիտասի անվան երաժշտական դպրոցի տնօրեն Զարինե Բաբայանը։