Ձեր վստահելի աղբյուրը

«Տարիներ շարունակ Հայաստանում քաղհասարակությունը մեծացվել է հենց այս նպատակով. երբ վերցնեն իշխանությունը, անեն այն, ինչ անում են»,-լրագրողների հետ զրույցում ասաց տեղեկատվական անվտանգության հարցերով փորձագետ Տիգրան Քոչարյանը, որը մասնակցում էր ԱԳ նախարարության շենքի դիմաց ընթացող Ադրբեջանի բանտում պահվող բանտարկյալների, Հայաստանում քաղբանտարկյալների ազատ արձակման պահանջով բողոքի ակցիային։

Նրա խոսքով, այժմ անազատության մեջ գտնվող Արմեն Աշոտյանն իրեն ավելի  վաղ պատմել է եվրոպացի գործընկերոջ հետ ունեցած խոսակցությունը։ Վերջինը խոստովանել է, որ եթե Աշոտյանի նկատմամբ հրապարակում ուժային որևէ գործողություն անեն, իրենք որևէ բան չեն անելու, քանի որ Նիկոլ Փաշինյանը «մեր մարդն է»։

«Սա իրենց ձագն է։ Իրենց ձագի համար իրենք աչք են փակելու այս ամենի վրա։ Կարող ենք ասել հիմա Հայաստանում չկան իրավապաշտպաններ այն թվով, ինչ կային նախկինում, արևմտյան բոլոր դեսպանատները աչք են փակում խժդժությունների վրա, իշխանությունների գործողությունների վրա։ Սա շարունակվելու է մինչև իշխանության փոփոխություն կամ Հայաստանի վերացում»,-ասաց Տիգրան Քոչարյանը։