Ձեր վստահելի աղբյուրը

Եթե գտնվեն գնացողներ։
Աննա Հակոբյանի ընտանիքի անդամի քովիդը մի կողմ։ 

Պարզապես պատերազմի ժամանակ գեներալներին, դրանից առաջ ու հետո՝ դատավորներին կրթելուց հետո հերթը ԶԼՄ-ներինն է։

Կրթվելու հրավերը ֆեյսբուքյան նամականիով ԶԼՄ-ներին էր ուղարկել   Աննա Հակոբյանի օգնական Ստելա Սարուխանյանը։ Թե բա՝ «կրթվելընորաձևէ արշավ»։ 

Շատ խնդալու է, շատ։ Թե բա՝ նորաձև։ Մոդայի մեռածնե՞ր են փնտրում, թե՞ կրթությունը հանկարծ բացահայտողներ։ Չկար, հա՞, ոչ կրթություն, ոչ ինքնակրթություն, ոչ գիրք, ոչ ինտերնետ... ու Նիկոլ Փաշինյանի կողակիցը ստիպված է բիրդան արթնացածներին շահագրգռել նորաձևություն բառով, զույգ-զույգ կանչել իրենց կեցավայր, որպեսզի կրթի։ Այսպես ասած՝ կրթության տապան համատարած տգիտությա՞ն մեջ։

Ու՝ եկեք մի թեթև էլ նայենք, թե ում է տգետ համարում ինքնագոհ տիկինը։ 

Ըստ նրա տնօրինած «Իմ Քայլը» բարեգործական հիմնադրամի  գործառնությունների և հանրային կապերի գծով փոխտնօրեն Դավիթ Մկրտչյանի՝ լրագրողները պիտի անցնեն  «Հաղորդակցության հմտություններ» դասընթացների շարք, «ձեռք բերել նոր գիտելիքներ և տարանջատել, թե որ կառույցին ու ում ինչ հարց կարելի է ուղղել»։  

Փաստորեն «հաղորդակցության. այս գելը անձնական օրինակ է ուզում ծառայել՝ ունենալ հաղորդակցման հմտություն նշանակում է լինել իր պես։ Ո՞րն էր ճիշտ նշանակության բառը, լկտի՞։

Ընդ որում՝ իրականում ոչ թե լրագրողին է դրանով հարվածել, այլ շխկացրել է փաշինյանյան կառավարությանը՝ այնտեղից հարցերի պատասխան ստանալու համար դեպի հիմնադրամ ուղղորդող գրությունը ցույց է տալիս, և ուրեմն(c) հիմնադրամը իր կառավարությանը պիտի կրթի։ Մասնավորապես՝ վարչության պետ Արմեն Խաչատրյանին, իսկ տեղայնացված՝ կողակիցը իր ամուսնուն։ 

Ի դեպ՝ Փաշինյանը օր-օրի ամենավայրագ գրառումներ է անում, խլելով իրեն կարդացողների ուշքն էլ, միտքն էլ։ Օրինակ՝ անկախության մասին։ Թե բա՝ անկախացողը իր կախվածությունը քչերից փոխում է շատերից կախվածության։

Ինչ մեղքս թաքցնեմ, ես էլ մտածեցի այս մասին, ու միայն մի օրինակ գտա, որ իրոք այդպես է։ Ասենք՝ մորից անկախացող տղա երեխան մեծանում է ու վազում ուրիշ ու շատ կանանց հետևից՝ կախման մեջ ընկնելով նրանցից։ Բայց ինչ է ուզում ասել Փաշինյանը «ինչքան քիչ, նույնը այդքան շատ»  մանկամիտ մտքով՝ նույնիսկ մտքովս չանցավ, որ մտածեմ։ Տավտալոգիա՞ ստացվեց։ Ահա թե ինչի է հանգեցնում նիկոլներին կարդալը։ 

Մի թեթև էլ  Աննա Հակոբյանի այս անձնական գրությանը նայենք։ Փաստորեն տիկինը տգետ է համարում նրանց, ովքեր գտնում են, որ իր ձեռքը սեղմող չպիտի լինի, որ ոչ ոք չպիտի քաղաքակավարության զոհ դառնա ու կուլ տա սեփական սկզբունքները (եթե դրանք կան իհարկե) ու սեղմի որևէ հայրենադավի ձեռքը, ինչի համար էլ այն մեկնված լինի։

Այսպիսով՝ ըստ կառավարության ղեկավարի կողակցի՝ նրանք, ովքեր համարում են փաշինյանյան իշխանությանը  անկիրթ, անճար, ոչ գործունյա, ու իհարկե՝ դավաճան,... տգետ են։

Ու այստեղ սկսվում է «կրթվելընորաձևէ արշավի» դիլեման։

Ովքեր կհամարեն, որ իրենց պիտի կրթի Աննա Հակոբյանը, ուրեմն չեն համարում նրան անկիրթ ու հայրենադավ, այսինքն՝ չեն մտնում նրա սահմանած տգետների շարքը։ Ստացվում է գնում են կրթվելու պարզապես նորաձևությունից հետ չմնալու՞ համար, առանց ունենալու դրա կարիքը՞։

Էլի չստացվե՞ց, որ պետական բյուջեն քամուն եք տալիս։ Դպրոց ու բուհ քանդում են, որ իրենք մնան կրթողները։ Որովհետև «միակնանին կույրերի մեջ արքա է»։

Շատ խնդալու է, շատ։

Իսկ այնպես, էլի պիտի հիշեցնեմ Մահարու դագաղագործին ասածը՝ «քեզ ծառայի, բալամ, քեզ»։"