Ուկրաինական ԱԹՍ-ների հարվածը հրդեհ է առաջացրել Տյումենի նավթավերամշակման գործարանում

Ուկրաինական անօդաչու թռչող սարքերի հարվածը հրդեհ է բռնկել արեւմտյան Սիբիրի Տյումենի նավթավերմշակման գործարանում։ Reuters-ի փոխանցմամբ՝ այսօր հայտնել են Ռուսաստանի իշխանությունները։

Ուկրաինայից ավելի քան 2000 կմ հեռավորության վրա գտնվող գործարանի վրա իրականացված հարձակումը ընդգծում է Կիեւի հեռահար անօդաչու թռչող սարքերի աճող հասանելիությունը՝ ուղղված ռուսական էներգետիկ ենթակառուցվածքների դեմ։

Տյումենի մարզի նահանգապետ Ալեքսանդր Մուրը հայտնել է, որ շտապօգնության ծառայությունները աշխատում են դեպքի վայրում՝ առանց լրացուցիչ մանրամասներ ներկայացնելու։ Դեպքի հանգամանքների վերաբերյալ այլ տեղեկություններ առայժմ չեն հաղորդվում։

Արդյունահանման ցանկացած խափանում կարող է ավելի մեծ ճնշում գործադրել վառելիքի ներքին շուկայի վրա, որը մայիսից ի վեր բախվում է վատթարացող իրավիճակի։ Այդ ժամանակահատվածից սկսած՝ Ուկրաինան ուժեղացրել է հարձակումները նավթավերամշակման գործարանների վրա՝ փորձելով խարխլել Ռուսաստանի պատերազմական ջանքերը։

Տյումենի գործարանի  հզորությունը տարեկան կազմում է մոտ 8 միլիոն տոննա։ Ըստ արդյունաբերության հաշվարկների՝ այն տարեկան մշակում է մոտ 6 միլիոն տոննա նավթ՝ արտադրելով մոտ 0,5 միլիոն տոննա բենզին եւ 2,5 միլիոն տոննա դիզել։

Դեպքը դիտարկվում է որպես հերթական հարված Ռուսաստանի էներգետիկ ենթակառուցվածքներին՝ այն ժամանակ, երբ կողմերը շարունակում են օգտագործել հեռահար հարվածային միջոցներ հակամարտության ընթացքում։