Կոզա-Նոստրա կամ Յակուձա. Նորաստեղծ Երիտասարդական կոնգրեսը բանաձև է ընդունել
Քիչ առաջ Երևանի Կոնգրես հյուրանոցում ընթացող Հայ Ազգային կոնգրես կուսակցության Երիտասարդական միության առաջին համագումարում միաձայն ընդունվեց ՀԱԿ երիտասարդների բանաձևը: Դրանում մատնանշվում են Երիտասարդական կոնգրես վերանվանված նախկին միության նոր առաջնահերթությունները` տարածաշրջանային երիտասարդական համագործացության խորացում, ակտիվ ներգրավվածությունը մամուլում ու սոցցանցերում, հասարակական-քաղաղաքական դաշտում, ցույցերի երթերի ու ֆորումների կազմակերպում:
Բացի այդ ՀԱԿԿ երիտասարդները ծրագրում են մինչև սեպտեմբերի 30-ը ձևավորել օպերատիվ արձագանքման խմբեր, որոնք կպայքարեն տեղական իշխանությունների թույլ տված հանցագործությունների դեմ:
Երիտասարդական կոնգրեսի համագումարում ունեցած իր ելույթում ՀԱԿԿ անդամ, ԱԺ ՀԱԿ խմբակցության ղեկավար Լևոն Զուրաբյանը հայտարարեց, որ ՀԱԿ երիտասարդները տարիներ շարունակ «ահաբեկել» են երկրի իրավապահ մարմիններին:
«Այս կազմակերպության դեմ շատ լուրջ պայքար է գնացել, քրեական գործեր են հարուցվել, մարդկանց բանտերն են ուղարկել: Ես Կոզա-Նոստրայի և Յակուձայի (ճապոնական մաֆիա) մասին չեմ խոսում, ես խոսում եմ ՀԱԿ երիտասարդների մասին», - հայտարարեց Լևոն Զուրաբյանը:
Նա մատնանշեց անուններ, ովքեր նույն իրավապահ մարմինների կողմի «հալածանքների» են ենթարկվել` Տիգրան Առաքելյան, Արտակ Կարապետյան, Արեգ Գևորգյան, Սարգիս Գևորգյան, Դավիթ Քիչամիջյան և այլք:
Նա ասաց, որ այս երիտասարդները ճարտարապետներ են, գիտնականներ են, արվեստասեր են, լսում են Բախ, կարդում են հայտնի դասականներին, ինչպիսին Կաֆկան է, բայց տարօրինակ է, որ կրկնահանցագործ են: Պատճառը, ըստ Զուրաբյանի, հետևյալն է. «Նրանք դարձել են հանցագործ, որովհետև մեր երկիրը շուռ տված է և այստեղ կառավարում են ավազակները, նրանք ստանում են պաշտոններ, հարգանքի տուրք, իսկ լուսավորյալ և արժանապատիվ մարդիկ դառնում են կրկնահանցագործներ»:
Նաև ասաց, որ պայքարում են մի այնպիսի երկիր ստեղծելու համար, որտեղ հարգվում ու երկիր են ղեկավարում գիտուն մարդիկ:
Նախորդիվ`
ՀԱԿԿ ստեղծումից հետո երիտասարդներն առաջին անգամ համագումար են անում