Ձեր վստահելի աղբյուրը

Վազգեն Սարգսյանի անվան ռազմական ինստիտուտում այս տարի հունվարին կուրսանտներից մեկի` Հայկազ Բարսեղյանի սահմռկեցուցիչ սպանության փաստի առթիվ հարուցված քրեական գործն արդեն դատարանում է: Ինչպես Panorama.am-ը տեղեկանում է Դատական տեղեկատվական համակարգից, դատավարությունն անցկացվելու է Երևանի Ավան և Նոր Նորք վարչական շրջանների ընդհանուր իրավասության դատարանում` դատավոր Դավիթ Հարությունյանի նախագահությամբ: Դատարանն այն ընդունել է վարույթ, սակայն նիստի օր դեռևս նշանակված չէ:

Ավելի վաղ Panorama.am-ը անդրադարձել էր կատարվածին. Ըստ պաշտոնական հաղորդագրության, դեպքը տեղի էր ունեցել հունվարի 29-ին, ժամը 06:35-ի սահմաններում, երբ զորամասի մարզահրապարակում հայտնաբերվել է նույն զորամասի զինծառայող Հայկազ Արկադիի Բարսեղյանը՝պտտաձողի վրա պարանով կախված վիճակում: Դեպքի առթիվ ՀՀ քննչական կոմիտեի զինվորական քննչական գլխավոր վարչությունում հարուցվել էր քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 7-րդ կետով:

Կատարվածը մեծ աղմուկ բարձրացրեց ինստիտուտում` հրաժարական ներկայացրեց ինստիտուտի նախկին պետ Մարտին Կարապետյանը, նշանակվեց նորը`գեներալ-մայոր Արմեն Ղահրամանյանը: Բացի այդ, ողբերգական դեպքից հետո պաշտպանության նախարարի հրամանով աշխատանքից ազատվել էին ռազմական ինստիտուտի պետի տեղակալներ, գնդապետներ Արմեն Ռազմիկի Մզիկյանը, Զարմիկ Անդրանիկի Թևոսյանը, Պողոս Գարուշի Աբրահամյանը, ինչպես նաև մի շարք այլ սպաներ:

Ձեռք բերված ապացույցների համակցությամբ՝ նույն զորամասի զինծառայողներ Վաչե Սահակյանին, Մովսես Ազարյանին, Գնել Թևոսյանին և Նորիկ Սահակյանին փետրվարի 2-ին մեղադրանք էր առաջադրվել՝ ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանության համար: Նրանց նկատմամբ որպես խափանման միջոց էր ընտրվել կալանավորումը։

Ըստ մեղադրական եզրակացության, Գնել Թևոսյանին, Նորիկ Սահակյանին,Վաչե Սահակյանին և Մովսես Ազարյանին մեղադրանքն առաջադրվել է այն բանի համար, որ նրանք հունվարի 29-ին ժամը 02:00-ից 03:00-ի սահմաններում զորամասի ննջարաններից մեկում առանձին դաժանությամբ, խուլիգանական դրդումներով սպանել են Հայկազ Բարսեղյանին:

Այս գործով անցնում է նաև մեկ այլ կուրսանտ` Վարազդատ Սաֆարյանը, որին մեղադրանքն առաջադրվել է այն բանի համար, որ նա 2014թ. նոյեմբերի 16-ին ժամը 21.00-ի սահմաններում նույն մարտկոցի կուրսանտ Տ. Մանասերյանին շարքում խոսելու համար դիտողություն անելուց և վերջինիս կողմից հակադարձում ստանալուց հետո Վաչե Սահակյանի, Մովսես Ազարյանի հետ միասին, մի խումբ անձանցով խախտելով ՀՀ Զինված ուժերի ներքին ծառայության կանոնագրքի դրույթները ծեծի են ենթարկել Մանասերյանին, բացի այդ 2015թ. հունվարին լսարանում խոսելու համար ծեծի է ենթարկել համածառայող Արտուշ Սիմոնյանին:

Մեղադրյալներ Գնել Թևոսյանը, Նորիկ Սահակյանը,Վաչե Սահակյանը և Մովսես Ազարյանը չեն ընդունում իրենց առաջադրված մեղադրանքը: Ավելին, նրանց փաստաբանները հայտարարել են, որ Հայկազ Բարսեղյանը ինքնասպանություն է գործել:

Սակայն Հայկազ Բարսեղյանի իրավահաջորդ` հոր` Արկադի Բարսեղյանի ներկայացուցիչ-փաստաբան Գարիկ Գալիկյանը Panorama.am-ի թղթակցի հետ զրույցում տեղեկացրեց, որ այդ հայտարարությունները հերքում են դատաբժշկական փորձաքննության արդյունքները:

«Գործի իրավական ու փաստական հանգամանքները հաշվի առնելով և գործում առկա ապացույցները, մասնավորապես դատաբժշկի փորձաքննության արդյունքները ուսումնասիրելով հստակ նշվում է, որ տեղի է ունեցել սպանություն: Այն վարկածը, որ մեղադրյալների պաշտպանները տարածում են, թե եղել է ինքնասպանություն, ես համենայնդեպս, բացառում եմ: Դա հաստատում է նաև փորձաքննությունը, որի համաձայն տեղի է ունեցել սպանություն, այսինքն` մահն առաջացել է ոչ թե կախվելու հետևանքով, այլ Հայկազին սպանել են, հետո նոր կախել: Երբ նրան տարել են կախելու, ինքն արդեն մահացած է եղել», -ներկայացրեց փաստաբան Գալիկյանը:

Փաստաբանն ասաց, որ ընդհանուր առմամբ նախաքննությունից գոհ է:

Թեմային առնչվող հրապարակումներ`

Կալանավորվել է Վազգեն Սարգսյանի անվան ռազմական ինստիտուտի դասակի հրամանատարը
Ձերբակալվել է ՀՀ ՊՆ Վազգեն Սարգսյանի անվան ռազմական ինստիտուտի սպա, կապիտան Արտյոմ Ավետիսյանը
Նոր պետի նշանակմամբ առավելապես խիստ ուշադրություն է դարձվելու կուրսանտների կարգապահության ամրապնդման խնդիրներին. Ս.Օհանյան
Պնախարար. Մի շարք բացթողումներ են ի հայտ եկել ռազմական ինստիտուտի ղեկավարության կողմից (տեսանյութ)
Վազգեն Սարգսյանի անվան ռազմական ինստիտուտում կլինեն պաշտոնանկություններ
Վ. Սարգսյանի անվան ռազմական ինստիտուտի պետն ազատվել է զբաղեցրած պաշտոնից
Սեյրան Օհանյանը շտապ խորհրդակցություն է հրավիրել
4 զինվորի մեղադրանք է առաջադրվել՝ խուլիգանական դրդումներով համածառայակցին սպանելու համար
Զինծառայողին սպանելու կասկածանքով ձերբակալվել է 4 անձ
Հարուցվել է քրեական գործ՝ զինծառայողին մի խումբ անձանց կողմից սպանելու դեպքի առթիվ
ՀՀ ՊՆ. Երևանի զորամասերից մեկում պարանով կախված վիճակում զինվոր է հայտնաբերվել