Ձեր վստահելի աղբյուրը

«Այն է, ինչ կանխատեսում էինք», -այսօր Panorama.am-ի թղթակցի հետ զրույցում այսպես ասաց Արցախի նախագահի մամուլի խոսնակ Դավիթ Բաբայանը՝ մեկնաբանելով հունիսի 20-ին Սանկտ-Պետերբուրգում ղարաբաղյան հիմնախնդրի շուրջ բանակցությունների շրջանակում կայացած հանդիպումները:

Նախագահների հայտարարության մեջ նշվում էր. «Հայաստանի Հանրապետության և Ադրբեջանական Հանրապետության նախագահները վերահաստատեցին Վիեննայում ս.թ. մայիսի 16-ին կայացած հայ-ադրբեջանական գագաթնաժողովի պայմանավորվածությունները` ուղղված հակամարտության գոտում իրավիճակի կայունացմանը և խաղաղ գործընթացի առաջընթացին նպաստող մթնոլորտի ստեղծմանը: Այդ նպատակով նրանք համաձայնեցին մասնավորապես մեծացնել հակամարտության գոտում միջազգային դիտորդների թվաքանակը: Նրանք գոհունակություն հայտնեցին վերջին շրջանում շփման գծում հրադադարի ռեժիմի պահպանման կապակցությամբ: Կայացավ կարգավորման առանցքային/բովանդակային հարցերի շուրջ մտքերի հանգամանալից փոխանակում»:

«Ամենակարևորը՝ նշվել է խաղաղ կարգավորմանն այլընտրանք չլինելու փաստը, իսկ սա առանցքային բաղադրամաս է, և անհրաժեշտ է լինելու շարունակել աշխատանքներն այս ուղղությամբ», -մեզ հետ զրույցում նկատեց պարոն Բաբայանը:

Անդրադառնալով շփման գծում մեխանիզմների ներդրման ու նաև միջազգային դիտորդների թվաքանակի ավելացման հարցում է պայմանավորվածությանը, Բաբայանը նկատեց, որ մեխանիզմների մեջ պետք է լինեն տեխնիկական բաղադրիչներ, օրինակ՝ սարքավորումների տեղադրում սահմանի երկայնքով, ինչպես նաև ԵԱՀԿ գործող նախագահի անձնական ներկայացուցչի գրասենյակի ընդլայնում:

«Ըստ երևույթին, առաջնայինը համարել են կադրային խնդրի լուծումը, այսինքն՝ համալրել մասնագետներով ԵԱՀԿ նախագահի անձնական ներկայացուցչի գրասենյակը, ինչը ճիշտ է: Մենք, իհարկե, հասկանում ենք՝ ում հետ գործ ունենք, Ադրբեջանի պես պետությունը ամեն ինչ անելու է խոչընդոտելու բանակցային գործընթացը, բայց այնուամենայնիվ, պետք է աշխատել այս ուղղությամբ», -հավելեց Արցախի նախագահի մամուլի խոսնակը:

Ըստ նրա, ճիշտ է շփման գծում համեմատաբար հանգիստ է իրավիճակը, բայց փոխարենը հանգիստ չէ տեղեկատվական դաշտում և այստեղ էլ Ադրբեջանը «նույն ագրեսիվ վարքագիծն է դրսևորում»:

Այդուհանդերձ, ի՞նչ ակնկալիքներ ունի պաշտոնական Ստեփանակերտն այս հանդիպումից հարցին ի պատասխան, Դավիթ Բաբայանը նկատեց, որ երկար բանակցային գործընթաց է սպասվում կողմերի ստանձնած պարտավորություններն իրականացնելու համար և շատ հնարավոր է, որ ինչ-որ պահի Ադրբեջանը խոչընդոտի դրան:

«Ընդհանուր պայմանավորվածությունը կարծես՝ կա, և հիմա ընդհանուրից պետք է անցնել մասնավորի: Գրասնեյակի համալրումը կադրերով համեմատաբար հեշտ է անցնելու: Ավելի դժվար է լինելու տեխնիկական միջոցների տեղադրումը, քանի որ Ադրբեջանը խոչընդոտելու է, ինքն է չէ՞ խախտում, ինքն էլ պետք է դեմ լինի այդ գործընթացներին: Դեռևս պետք է մշակվեն այդ մեխանիզմները, հետո փորձ կատարվի կիրառել այն, հետո գոնե ֆիքսել զինադադարի ռեժիմի խախտումները՝ ով է արել, երբ է արել, ինչ վայրում: Հետո փորձել պատասխանատվության կանչել այն կողմին, որը մեղավոր է խախտման համար: Իսկ սա, տեսեք, ինչ երկարատև ու բարդ գործընթաց է:

Հետո սկսելու են սպեկուլյացիաներ, Ադրբեջանն ասելու է՝ ես չեմ կրակել, սա էնպես, նա էնպես և այլն: Բայց այլ տարբերակ չկա, մինչև այս ստորին օղակում, որը նույնպես շատ կարևոր է ու երկար տարիներ շատ անտեսված է եղել, մինչև այստեղ որևէ լուրջ քայլ չկատարվի, անհնարին է լինելու խոսել կարգավորման այլ շերտերում ինչ-որ հաջողությունների մասին», -կարծիք հայտնեց Դավիթ Բաբայանը:

Դիտարկմանը, թե լավատեսական տրամադրություններ Արցախում չկան, Արցախի նախագահի մամուլի խոսնակը արձագանքեց. «Մենք ավելի շատ իրատեսական ենք, քանի որ գիտենք ում հետ գործ ունենք, գիտենք, որ դա շատ բարդ խնդիր է, բայց պետք է աշխատենք այս ուղղությամբ, քանի որ ուրիշ ճար չկա, պարզապես»:

Հիշեցնենք՝ Սանկտ Պետերբուրգում հունիսի 20-ին կայացել էր Հայաստանի, Ռուսաստանի և Ադրբեջանի նախագահների եռակողմ հանդիպումը ու դրա արդյունքներով ընդունվել էր համատեղ հայտարարություն: